Press "Enter" to skip to content

๐„๐ฅ๐ž๐œ๐ญ๐ข๐จ๐ง ๐š ๐’๐ฎ๐ง๐ ๐ก ๐ซ๐ฎ๐š๐ง๐ ๐š๐ก ๐ƒ๐ฎ๐ก๐ฅ๐จ๐ง๐š๐ค ๐‹๐š๐ง๐ ๐ก๐ญ๐ž๐ซ ๐๐ข๐ง๐ ๐ข๐ง ๐“๐ซ๐ฎ๐ฆ๐ฉ ๐ง๐ข๐ก ๐Œ๐ข๐ฉ๐ข ๐๐ฎ๐ฆ๐ก ๐š ๐“๐ข๐ฆ๐ก ๐ก๐ง๐š ๐ฅ๐ข๐จ ๐š๐ก ๐๐ข๐๐ž๐ง ๐œ๐ฎ ๐–๐ก๐ข๐ญ๐ž ๐‡๐จ๐ฎ๐ฌ๐ž ๐œ๐š๐š๐ก ๐“๐ข๐ฆ๐ก๐ฅ๐š๐ฆ๐ก๐ง๐š๐ค ๐š ๐๐ ๐ž๐ข ๐œ๐š๐ง๐ 

๐„๐ฅ๐ž๐œ๐ญ๐ข๐จ๐ง ๐š ๐’๐ฎ๐ง๐ ๐ก ๐ซ๐ฎ๐š๐ง๐ ๐š๐ก ๐ƒ๐ฎ๐ก๐ฅ๐จ๐ง๐š๐ค ๐‹๐š๐ง๐ ๐ก๐ญ๐ž๐ซ ๐๐ข๐ง๐ ๐ข๐ง ๐“๐ซ๐ฎ๐ฆ๐ฉ ๐ง๐ข๐ก ๐Œ๐ข๐ฉ๐ข ๐๐ฎ๐ฆ๐ก ๐š ๐“๐ข๐ฆ๐ก ๐ก๐ง๐š ๐ฅ๐ข๐จ ๐š๐ก ๐๐ข๐๐ž๐ง ๐œ๐ฎ ๐–๐ก๐ข๐ญ๐ž ๐‡๐จ๐ฎ๐ฌ๐ž ๐œ๐š๐š๐ก ๐“๐ข๐ฆ๐ก๐ฅ๐š๐ฆ๐ก๐ง๐š๐ค ๐š ๐๐ ๐ž๐ข ๐œ๐š๐ง๐ 
=========================================================================================================

Lungthin ai thenhmal tuk cangmi America i President pakhat dirhmun in tawlrel colh hau a si mi pulrai le a dang buaibainak vialte kongah Sunday in khan cun Biden nih timhlamhnak a thok cang, tiah thawng theih a si.

State tampi ah Biden nih buan a co a theizing tiang zongah Trump cu a lung a thawng peng ko rih i, Biden nih buan a comi cu Congress ah a ummi a Republicans hawi le hna nih an cohlang lo.

Election phichuak challenge tuah dingin Trump nih mipi a pumhkhomh hna, tiah a campaign aiawhbiachimtu Tim Murtaugh nih Sunday ah a chim.

โ€œMithi hna vote an thlak. Cucaah, vote kan relpiak than u,โ€ tiin Trump nih state tampi ah nawlnak a tuah. A chimmi hi hrihhram ngaingai a ngeihter kho fawn lo. Mipi pumhnak cu zeitik tuah a si te lai, timi kong belte Murtaugh nih a langhter lo.

A tutiang ko rih ah cun vote kongah ai ningcanglo mi thil zeihmanh hmuh awk a um rih lo. Cucaah Trump campaign nih tehte fiangdeuh in an kawl khawh a hau lai, tiah state election officials nih an chim.

Ram pumpi huap i popular vote ah cun Biden nih Trump hi 4.1 million tluk in a tei i, Electoral College vote in 300 lenglo a hmuh.

Lungrualnak le remdaihnak um dingin Saturday i a khua Delaware ah biachimnak a ngeih hnu ah, Jan. 20 i office a thut tik i ai hmaithlak colh dingmi rian (ngandamnak le economy) kongah Biden le a team pawl timhlamhnak an thok colh hna.

Monday in cun coronavirus task force ka thlah colh lai. Cu rian cu former Surgeon General Vivek Murthy le former Food and Drug Administration Commissioner David Kessler nih an hruai lai, tiah Deputy campaign manager Kate Bedingfield nih a chim.

Minung 237,000 lenglo an thi cang, nai hrawngin cun a zawmi an karh fawn. 10 million lenglo rian lo in an um. Federal lei in bomhnak a cat fawn. Biden nih hin kan ram ah lungrualnak um dingin thazaang a chuah lai – lungrualnak umter, thinlinghnak thumh, campaign lio i biaka in khat le khat i phomhnak vun dongher le biataktein hruainak kalpi ai tim, tiah Bedingfield nih a chim.

๐๐ข๐๐ž๐ง ๐ง๐ข๐ก ๐œ๐ฎ๐ง ๐‘๐ข๐š๐ง ๐ข ๐‚๐ก๐š๐ฐ๐ง ๐ค๐จ๐ง๐  ๐š๐ข ๐›๐ฎ๐š๐ข๐ฉ๐ข, ๐“๐ซ๐ฎ๐ฆ๐ฉ ๐ง๐ข๐ก ๐œ๐ฎ๐ง ๐•๐จ๐ญ๐ž ๐ซ๐ž๐ฅ๐ญ๐ก๐š๐ง ๐ค๐จ๐ง๐  ๐š๐ข ๐›๐ฎ๐š๐ข๐ฉ๐ข

A administration tangah rian a tuan dingmi official pawl thimnak kong zongah Biden le a advisers pawl riantuan thok chom an i tim. Biden tangah CIA director ai cuh dingmi ah hin former US intelligence officials 2 Michael Morell le Avril Haines hi an si.

18th century tein American democracy i a hmelchunhnak a si bangin, President pakhat nih a chawngtu president kut ah daitein nawlngeihnak le rian apnak tuah dingin nonpartisan good-governance group nih Trump an nawl.

Tutan bantuk in faakpi in campaign tuah hnu zongah a chawngtu president kut ah nawlngeihnak le rian velngeihnak te he apnak tuah hi US tuanbia chungah a um pengmi a si, tiah Partnership for Public Serviceโ€™s Center for Presidential Transition nih a chim.

Kum 28 chungah Trump hi ahmasabik term hnihnak a peh kho lo mi US persident a vun si ruangmang cang lai. โ€œMake America Great Againโ€ ti ai tialmi lukhuhsen he cun Sterling, Virginia ah golf a tu huar ko.

โ€œLamestream Media nih next president a ho a si, ti cu zeitik ah hme a thanh?โ€ tiin Trump nih golf tuk ai lim hnu ah Twitter ah a tial.

Vote million 5 lenglo a umnak ah Biden nih vote 10,353 in Trump a teinak state Georgia ah vote relthannak tuah dingin Trump campaign nih nawlnak an tuah i, cu cawlcanghnak cu US Presentative Doug Collins tuanvo an pek. Wisconsin, Pennsylvania le Arizona zongah vote relthannak tuah dingin Trump campaign pawl an cawlcang hna.

Vote relthan a va si ko hmanh ah election a phichuak hi a thleng kho lem lai kan zum lo, tiah experts pawl nih an chim. Trump campaign nih an i kenmi biasu zong hi an hmetuaituk caah, election a phichuak hi a thlen khawh lai kan zum lem lo, tiah legal analysts nih an chim.

Trump a tanhtu mipi tampi hna nih cun an sunghmi hi an conhlang kho rih lo. โ€œTukum i mail-in ballot a tamtukmi hrimhrim hi ka lung a hring. Mail-in vote thlak hrimhrim hi phungning a si lai ka zum lo,โ€ tiin Pen. State i Harrisburg khuasa Lynn Nester, 53, nih a chim.

Vote peknak kongah Pennsylvania nih rii a khiahmi a um lem lo. Cucaah mail-in vote hi a mikip nih pek khawh a si. Pulrai tih ruangah, tukum cu tuan tein mail siseh, minung pumpaak in siseh vote a pemi an tam ngaingai.

โ€œPhung zulh in challenge an tuahmi paoh cu onh ding an si. Cu hnu lawnglawng in cun tutan thimnak hi aho set nih dah a tei, ti hi America nih bia a chah khawh lai,โ€ tiah House of Representatives ah top Republican a si mi Kevin McCarthy nih Foxx News ah a chim.

โ€œTrump i vote fir kong a chimmi nih hin kan democracy a hnursuan ngaingai. Lungthiangtein White House a chuahtaak lio hi vawleipi nih hmuh kho seh, ti ka duh ngai ko nain, cu bantuk lungput cu kan mipa (Trump) nun ah a um ve fawn lo,โ€ tiah CNNโ€™s โ€œState of the Unionโ€ ah 2012 lio i Republican presidential nominee a si bal mi Senator Mitt Romney nih a chim.

Republican president hlun George W. Bush nih Biden cu a chonh i teihnak a hmuh ruangah a cungah lomhnakbia zong a hei chimh. โ€œPolitics kongah kan dirhmun ai khat lo nain, Joe Biden mitha a si, ti ka theih. Kan ram hruaitu dingah le lungrualnak umtertu dingah caantha ai hmuh ve cang, ti zong ka theih,โ€ tiin Bush nih a chim.

๐๐Ž๐‹๐ˆ๐‚๐˜ ๐ค๐จ๐ง๐  ๐ข ๐“๐ข๐ฆ๐ก๐ฅ๐š๐ฆ๐ก๐ง๐š๐ค

Biden hi US senator le vice-president dirhmun in cozah rian a tuannak hi kum 50 deng a si ve cang. January 20, 2021 i White House a phaak te tikah khin kum 78 a phan cang lai i, White House a thumi President vialte lakah kum upabik a si lai. Vice-president hrangah ai thimmi nu hi US Senator Kamala Harris a si i, US ah a sangbikmi 2nak office ah a hmasabik Black American nu, cun Asian thi ai cawhmi nu a si te lai.

Sunday i Wilmington, Delaware ah a ummi biakinn pumh an dih hnu ah a fapa Beau le a dang a sahlawh 3 an vuinak khrihfabu thlanmual lei ah Biden le a chungkhar rual an va kal. Election Day zingka zongah cuka a vung pal, ti a si.

Muslim an tamnak rammi pawl US tlawn khap ai tim. International Climate change lungtlinnak peh than ai tim. WHO in Trump a chuahmi zong peh than a timh. Illigal in US ah hngakchia an luhpimi pawl an ram lei tlunter viar dingin Trump nih program a suaisammi zong hrawhpiak ai tim, tiah Biden a adviser nih a chim.

Republicans nih US Senate an i tonenh khawh a si ah cun, chamber pi i fehternak an tuahmi kilven khawhnak dingah a chunglei in Cabinet officers pawl Biden nih a thim ve hna lai, tiah a advisers pawl nih an chim. Chelsea Bawi

Be First to Comment

Leave a Reply

Your email address will not be published. Required fields are marked *