Press "Enter" to skip to content

๐— ๐—ถ๐—ฝ๐—ต๐˜‚๐—ป ๐—ฆ๐—ฒ๐—ฟ๐˜€๐—ถ๐—ฎ๐—บ๐—ป๐—ฎ๐—ธ: ๐Ÿฐ Pastor Lal Pek Lian.

Jakob nih hin a pa Isak le a pu Abraham zumhnak le dirhmun kha felte in aa lak khawh i aa nunpi khawh. Pathian aw a thei i Pathian he biakamnak a tharchuah tu kha a si. A min Jakob cu Pathian nih Israel tiah a thlen piak i a fapa le 12 in Israel miphun cu Pathian nih a ser. Jakob hi amah nih lihchim le a pa Isak hlen kha a duh lo nain, a nu nih a herh a ti ruangah a hlen. Chiatserhnak tlung ai kun, a nu nih keimah cungah tlung ko seh a ti i fapa upa sinak ro vialte kha a mit a caw cangmi Isak kha an hlen. A nu hi mifim ngaingai a si. Jakob nih miphun sersiamnak aa thawk ahhin a nu lungthin cheuhnak le ttanpinak kha biapi ngai in a lang.

Kan Baibal cauk chungah rel a nuam theng lomi Baibal cang cu โ€œJakob cu ka dawt i Esau cu ka huatโ€ timi hi a si. Baibal thiam sang nih an kan chimh ning ahcun miphun hruaitu pacan dirhmun in dir ding ah Esau hi aa tlaknak a um lo an ti, rawl voi khat einak ding caah fa upa sinak a zuarmi pa a si, cun ramdang minu na tthi lai lo timi zong a nu le a pa bia a ngai lomi a si, duhtlong a si. Cucaah Esau nunzia le nundan kha ro pek ngam awk a ttha rua lo, a nunzia kha duh a nung lo i huat a tonnak hi si dawh a si.

Therphang te in a nu nih meheh sa a pa duhning in a chuan mi cu Jakob nih aa put i thluachuah a va hal. Isak kha a lung a hring pah ko nain, a tongh a muai hnu ah Pathian sin ah thluachuah a hal piak. Jakob cu a nunnak a himnak ding caah inn in a zam i a pu sin ah a kal. Pathian nih a umpi i innchungkhar tiang a dirh. A rak kir lei ah Pathian he zan khuadei an i pai. Pathian le minung na piah i na tei, na min ah Israel siseh tiah Pathian nih thluachuah a pek. Tuchan khrihfa innchungkhar mit in cuanh ahcun Jakob te chung hi aa nuam mi an si hrim lo, dawt deuh mi an um, zun ngeihnak in Jakob hi a nun a hmang mi pa a si ti awk te in a um.

A donghnak ah Izipt ram ah Pathian nih a pem pi ve hna i minung 100 hmanh a tling lomi kha miphun lian ngan ah Pathian nih a sersiam hna. Pathian bochannak he a herh ruang i ramdang kan pem hi miphun sersiamnak caah a ttha hnem kho ngaimi a si ve ko. Pathian aw kan theih mi he pem ve bel a herh mi a si. Esau bang duhtlong in a tlongmi kan si lo ding zong hi a bia pi ngaingai fawn.

Be First to Comment

Leave a Reply

Your email address will not be published. Required fields are marked *