Press "Enter" to skip to content

๐— ๐˜†๐—ฎ๐—ป๐—บ๐—ฎ๐—ฟ ๐—ง๐—ต๐—ถ๐—บ๐—ป๐—ฎ๐—ธ ๐—œ ๐—ง๐˜‚๐—น๐˜‚๐—ธ & ๐—œ๐—ป๐—ฑ๐—ถ๐—ฎ ๐——๐—ถ๐—ฟ๐—ต๐—บ๐˜‚๐—ป | by Si Bawimang Lian.

Ramkomh bu Myanmar thimnak cu zarh thum hlei aa duh ti lo. Ramchung kong lawngte kan ceih i zeitindah ram innpa hna nih an cuanh ve, a bikin India le Tuluk nih zeitindah siter an duh timi tlawmpal in vun zoh usih. Mi zei ram le miphun paoh nih anmah ram ca a hlawkmi (interest) hi pakhatnak ah an chiah cio. Tuluk le India hi Asia le kan ram caah a biapimi an si caah zeibantuk dah tutan thimnak ahhin an i ruahchan, zeitindah an buaiter ve? USA thimnak ah an i thlaak bantuk in kan ram thimnak zong ahhin a tlawm tamin an i thlak ve. An i thlak ti tikah an ram hnih nawlngeihnak kha Myanmar cung ah langhter an i zuam veve.

Nichuah lei Asia a cuantu thiamsang hna nih cun Tuluk nih Ralkap le USDP an sungh ding hi an duhdeuh tiah an chim. A ruang cu Suu Kyi hruaimi NLD nih a tei hi Ralkap nih uknak vun tlaih tthan nakin cun Tuluk caah hlawknak a tamdeuh lai. Minung covo a buar i democracy a duh lomi Tuluk nih tutan ah Democracy le minung covo a auhpi tu tiah ruahmi Suu Kyi le a party NLD nih teinak hmu seh ti an duhmi cu khuaruahhar ding cu a si lo.

Asia Times nih a ttialning ah Tuluk hruaitu pawl nih hin Ralkap cozah le uktu pawl hi Tuluk nih a hlan bantuk in a tlaihhip kho ti hna lo, phundang chim cun a khonthrawl kho ti hna lomi a vun hmuh cang. Cucaah a luancia kum hnih hrawng khan Tuluk hruaitu hna nih Aung San Suu Kyi hi ralkap nakin an uardeuhnak kha thup lo in an langhter lengmang. Tutan thimnak zong tei seh ti an duhnak kha an langhter.

Ralkap le USDP hi tutan thimnak zong ah teinak an hmu lai tiah an zumh lo ruang zong ah aa tel kho. Teitu a si lai tiah ruahmi minung le party a naihtu cu an um rengreng. Cu lakah biapi in Tuluk nih NLD teiding a duhnak cu ralkap nih Tuluk ah i hngatchan lo ding in an i zuammi le ramdang i hngatchan lo in rampi runvennak ttuanvo kan ngei an ti lio ah nitlak lei ram pawl sin i a limhang a zor cuahmahmi Suu Kyi nih Tuluk hmai ah ai phahmi hi a si bik. AA khi Tuluk ser hrimnam lawngte an hmang i Min Aung Hlaing nih Tuluk cu a mawhchiat ngai, Russia a tlawn lio ah. Tuluk ser meithal tam tuk AA sin a phan ding an tlaihmi zong a tam caah Suu Kyi he rian 33 leng hnatlaknak a ngeimi Tuluk president Xi nih NLD tei ding a duhdeuh.

Naite ah India nih ralkap cu titang lawng a pek hna (an i caw). Mah hi Myanmar a dawt tuk ruang lawng a si lo, India le Tuluk cu an i ral caah Myanmar ah nawlngeihnak an kawl veve nakah an tuahsermi a si. Tuluk nih India Sea ah hmun a hun khuar cuahmahmi hi Myanmar ralkap nih ai runven khawh nakding ah a si tiah VOA nih a ttial. Thimnak a vun naih tikah India nih Myanmar cozah cu a lungtluanh aa zuam i a hleiin ralkap hi a bawmh hna. Bianaah tu chun ah khan Indo-Myanmar ramri i hriamtlai pawl cu Myanmar cozah ralkap Sunrise-3 timi Operation min in an phomh hna i India nih mawhchiat lo in a bawmh salam ko.

Indo-Myanmar ramri ahhin kanmah Chinmi/ CNF zong hriamtlai an um. India nih Northeastern State pawl ah ral a thawh duh tikah, a siloah khonthrawl a duh tikah Myanmar ramri i an i dor a si ahcun Myanmar le India pehtlaihnak tthat caah an him lo. Tuluk nih Myanmar ah nawl a ngeih tuk ding hi a duh ve lo. Cucaah cozah lawng si loin ralkap hrimhrim hi thazang tthawnter ai zuam cuahmah.

Tuluk kan zoh a si ahcun ralkap le USDP nih uknak an tlaih, asiloah ralkap uknak ah Myanmar a kir sual ahcun international tlangtlaknak a hun tam tthan lai, phihnak a tam lai, asiloah rampi buainak a chuak tthan lai i Myanmar i Tuluk pawl caah harnak a chuah khawh pinah chawlehnak a tuahmi a sung /rawk dih kho. Ralkap uknak a dotu hna nih nitlak lei ram pawl an i bochan tthan hna lai ti kha an hngalh.

Trump America First le MAGA nih Tuluk hi Asia ah lor caan saupi a pek cang. American nih ramkip fonh bu le rianttuannak ah an rak dirpimi democracy policies kha a aw thang ti lo. Cu chinchap ah Rakhine kong ah Suu Kyi cu nitlak lei ram pawl nih an zumhnak a zor. Democracy party le Suu Kyi cozah he pehtlaihnak ttha an rak i ruahchanmi, leiba ngaihthiam an duhmi vialte kha a zor dih tthan. Suu kyi nih nitlak lei ram pawl he a tthami pehtlaihnak a lamte a kawl i a zulh tthan lo a si ahcun Tuluk sinah ai phah peng a herh lai cucu a cang lai tiah Tuluk nih an theih.
Teirial catial tu

Be First to Comment

Leave a Reply

Your email address will not be published. Required fields are marked *