Press "Enter" to skip to content

2021 CHIN MIPHUN NI SUNHSAKNAK AH, THE HAKHA TIMES NIH PAIH KAN TUAH LAI

2021 CHIN MIPHUN NI SUNHSAKNAK AH, THE HAKHA TIMES NIH PAIH KAN TUAH LAI. A min: Chin Wrestling Championship (CWC) ti a si lai. Tinh mi: Tutan 2021 Chin Miphun Ni cu COVID-19 tlaangrai ruang ah kum dang bantuk in Chin Ramkulh Cozah thithruainak in hlunghlai ngai in tuah awk a that lo ca ah Chin Miphun Ni a daidamtuk sual lai, cun kan nunphung Paih a uar mi hna nih hi ni caan ah nan hlam sual lai ti le aa pai tawn mi le paih a zuam mi hna ca ah i paihnak hmun le caan um ve seh, tiah The Hakha Times nih kan ti khawh tawk chuah in timh mi a si.

A hmun: The Hakha Times Zung (Pyidawtha, Lunghleiva kam, SDO zung a cung dot). Aa pai ding: A duh poh, hmunkip in rak i paih khawh a si. Thantlang le peng chung siseh, Hakha le peng chung in si seh rak i paih khawh a si. Asinain min a pe mi le mee a zuk mi lawng i paih khawh a si lai. Ni khat chung lawng i paih a si lai ca ah kum dang ah tuah tawn mi Club, le Zuamcawh a um lai lo. Zaatlaang (zapi) paih lawng a si lai. Min a pe mi chung in mee zuh in i paih a si lai. A hnubik a thawngbik kha Bual co (Champion) a si lai. Pound (Heavy & Middle Weight) then ding kan ti mi kha then a um than lai lo.

A nicaan: February 20 (Zarhte) zing 10:00 in kan thawk lai. Aa pai ding vialte zing 9:00 ah a herh mi biaruah le mee zuh a si lai. ca ah zing 9:00 ah phanh dih ding a si lai. Min pek ning: Phone 09-256649505 ah siseh, The Hakha Times zung ah mah rat in siseh pek khawh a si. Pek tik ah min, kum, sang, phone number, pek ding. Atu hin min pek kan cohlan cang. Laksawng: 1. Bualco (Champion)-Ks.500,000, taisawm le roca. 2. Pahnihnak-Ks.300,000 le roca. A karlak ah sponsors hna kan hmuh ahcun hi nakin a tam kho. Bualcotu hi 2021 CWC Champion (Bualco) ti a si lai.

Paih zulhphung: Bualrikhiak (Dailuci) sawm mi tel in Committee nih suai mi kha aa pai ding sin le zapi sin ah thanh a si te lai. Aa pai mi nih lungtlinlonak cu TV replay challenge tuah khawh a si lai.

Paih zoh ning: Covid rai ruang ah a hmun ah zoh khawh a si lai lo. The Hakha Times Facebook Page (Live) in zoh a si lai. A hmasa ah a man a pe mi lawng zoh khawh ding in kan rak thanh na in kan ruah than tik ah, kan nunphung Paih a uar mi le tha a pe i zoh a duh mi vialte nih diriam tein nan zoh khawh ding kha kan hun ruah than ca ah a man lak (pek) a si than lai lo. Asinain The Hakha Times riantuannak le kan Lai caholh thapeknak in The Hakha Times ah bawmhnak pek a duh mi nih bawmhnak peknak le a pek ningcang kan hun thanh te lai i mahka cun bawmhnak pek khawh cio a si tei lai.

Bualrikhiak: β€œBualrikhiak” ti hi kan Laiholh tein kan ngei ko nain Kawl holh kan i hlan mi β€œDailuci” khi a si. A kan tuanpiaktu ding cu Pu Chan Zam le a dang pahnih an si lai. Bual a co bal mi le Bualrikhiak a tuan bal mi an si.

Tutan paih a phun aa dannak: COVID tlangrai ruang ah ramleng paih thawng an i tel khawh lai lo ca ah ramchung paih thawng lawngte an i ton lai ca ah pumrua le thazaang in an i thlau hna lai lo ca ah zoh an dawhtuk lai i Ramchung Champion bak aa fiang lai.

COVID-19 zulhphung: COVID-19 Social Distancing Policy lonh lo ding in, paihbual ah aa pai lio mi, bualrikhiak (Dailuci), video thlatu, biachimtu lawng an um lai. A dang aa pai ding pawl cu a leng ah um a si lai. Cozah lei nih an kan bawmh khawh ahcun aa pai ding poh COVID zawtnak chek le tah dih a si te lai.

Sponsors kan cohlan: Hi Paih tuahnak ah Chin Miphun Ni upat, kan nunphung Paih thapeknak le kan caholh le media riantuannak thapeknak he a cunglei laksawng hi zaanghlei cawi in pekpiak khawh a si. Cun hi rian ah a dang a herh mi zawn ah ramchung ramleng in chawva in i tel khawh a si. Sponsors le bawmtu hna cu The Hakha Times media in hi Paih lio TV in siseh, nifatin kan ca chuak mi ah siseh nan riantuannak fakthanh special in kan in tuahpiak hna lai. The Hakha Times

Pehtlaihnak:
Phone: 09-256649505
Email: thehakhatimes@gmail.com.
Photo credit: Chin New Year Paih Championship 2019

Be First to Comment

Leave a Reply

Your email address will not be published. Required fields are marked *