Press "Enter" to skip to content

Europe Ram Meithal kah Zuamnak Ah Champion A Ngamhtu Pa Kong Rel Ve Hmanh, Khuaruahhar Bak Si

Karoly Takacs hi 1910, January 20 ah Hungary ram khua pakhat ah a chuakmi a si. Ralkap ah a lut i 1938 ah Europe ram methal kah zuamnak ah champion a hung si. Kum 1940, Japan ram ah tuah dingmi Tokyo Olympic meithal kah zuamnak ah teinak hmuh i Gold Medal lak dingin saduhthahnak a ngei.

Asinain vanchiatnak a tong ai! Olympic puai an tuah hlan deuh ah raltuk an cawnnak ah bomb pakhat kha hlonh dingin aa timtuah lioah a kut cungah a puak sual i meithal a kah tawnnak a orhlei kut cu a hram bak in a tlau ai!

Siizung ah thlakhat hrawng aa thlop, a kut pakhat a tlau lawng si loin Olympic ah methal kah in Gold Medal hmuh dingin aa ruahchanmi zong a tlau tikah mah le mah i thah duhnak tiang a ngei. Mah bantuk dirhmun ahhin cun ahopoah lungrawk le thachia in an um cio cu mu!

Asinain Karoly cu ka lungrawhnak hi a za cang, ka cungah a tlungmi ruangah lung dongin ka um ding a si ti lo, tiah biakhiahnak a tuah i kehlei kut in meithal kah a cawng ṭhan. Mi nih an ka hmuh lai i an ka nihsawh tikah ka tha a chia sual lai, ti a phang i mi an um lonak ramlak ah meithal kah cu a cawng tawn.

Thla zeimawzat a cawn hnuaah, 1939 i Hungary ram pumpi huap meithal kah zuamnak ah Karoly cu aa tel ve. Amah a theimi hna nih a zoh lei in tha nan kan pek caah kan i lawm tuk ee, tiah an ti i Karoly nih cun “tha pek dingah ka ra lo, zuamnak ah i tel dingin ka ra” tiah a leh hna tikah ahohmanh nih an zum lo, an khuaruah a har.

Meithal a kah tawnnak orhlei kut um lo buin kehlei kut in meithal kah i zuam ding cu zeitin hme an zumh khawh hnga mu! Sihmanhsehlaw cu zuamnak ahcun Karoly nih pakhatnak a hmuh. Mah tiang lawngah hin Karoly aa lungsi lo. Olympic ah Gold Medal hmuh dingin chunmang a manh ṭhan. Sinain ralpi voihnihnak a thawh caah 1940 le 1944 ah tuah dingmi Olympic puai cu an tuah kho lo.

Kum 1948 ah London ah tuahmi Olympic ah Karoly cu aa zuam i Gold Medal a hmuh taktak. Vawleicungah tuanbia thar a ṭial khawh. Mah hnu, 1952 i Finland ram khuapi Helsinki ah tuahmi Olympic ah Gold Medal a hmuh ṭhan. Kut khat lawng a si nain Olympic meithal kah zuamnak ah Gold Medal pahnih a hmu khomi Karoly Takacs cu January 5, 1976 ah a thi. Crd; The Chin Post

Be First to Comment

Leave a Reply

Your email address will not be published.