A Poi Tuk E! SAC Ralkap Hna Nih Khua Minung (5) An Tlaih Hna Hnu Ah An Thah Beh Hna E

Ralhrang Nih Tualchungmi 5 An Tlaih Hna I An Thah Hna, Kum 80 Tarnu A Umnak Inn Ah Mei In An Khangh Chih. Magway ramṭhen, Htilin peng Htilin-Gangaw lam um khua hna cu an luhhnawh hna i tualchung mi 5 an tlaih hna i an thah hna. Cun minung umnak inn 8 an khangh tiah Yaw Revolution Army-Htilin nih an chim.

Vaute 15,16 ah Htilin peng Shwekhontaing(ရွှေခုံတိုင်ကျေးရွာ)khua ah an lut i khua a hmuh ti lo ruangah ral a hrial kho lo mi kum 80 cungkai tarnu pakhat cu a umnak inn ah mei in an khangh chih. Hteintaing(ထိန်တိုင်း) khua ah a ummi hawi lolo kum 55 pa pakhat le Lei in a rak tlungmi kum 70 tarpa pakhat zong an thah hna tiah theih a si.

Cun Vaute 18 ah Htilin peng Saymintaw(ဆေးမင်းတောကျေးရွာ) khuami thluak tlinglo U Than Myin Aung le U Bo Tin zong SAC ralhrang nih an tlaih hna i an hrem hna hnu ah an thah hna tiah theih a si. Crd; CCN

NIHIN KAN DOTHLENNAK KONG AH RUAH A HERH NGAI CANG MI PAWL: Kan dothlennak hi a har lawng si lo in a caan zong a sau cang tik ah kan rak i ruah cia mi harnak lawng si lo in kan rak i ruah lo mi harnak zong kan tong cuahmah i hi pin zong ah tampi kan ton rih lai.

Cu ruang ah a si hnga maw, nihin ah mi tampi kan lung a dongpah cang. Pakhat le khat kan i mawhchiat. Cucaah a hnu ah cun Min Aung Hlaing nih doh hau lo in kanmah tein “Caangvat tilh in” tilh kan fawi.

Cucaah hi dothlennak lamthluan ah hin ruah awk le fian awk le tuah awk le thlen awk hna kan ruah le kan tuah a herh ngai mi a hung lang mi an tam ngai cang.

A tanglei hna hi kan dothlennak (CDF rian) dirhmun kong ah keimah nih dothlennak kan thawknak in nihin tiang a chung in siseh a leng in siseh ka hmuhton mi chung in zapi nih ruah awk ah zeimaw zat ka van chuahpi: (Ka palh mi a um kho ve ko)

# Ral kan doh lio a si i raal nganpi kan ngeih lio a si ca ah kanmah le kanmah i do in i hua hlah usih. Kan raal he kan i ton tik ah kan tha a der sual lai. Kan dothlennak hi kan ruah leng in a rau kho i a har kho hih!

# Kum hnih kan kal cang i kan ba ngai cang nain cho canceo hmanh kan kai rih lo tiin ruat hna sihlaw daithlang lo in i hne rih hna usih. # Kum hnih chung ah Min Aung Hlaing ralkap maw a zor deuh hnga CDF ralkap dah a zor deuh hnga? Min Aung Hlaing a tluk sual lo ding kha amah ca ah thinphang a si bantuk in CDF a tluk sual lo ding kha kan miphun ca ah thinphang dirhmun ah kan phan ve cang ti hi thei usih!

# Ralzaam nulepa kir duhnak maw a fak deuh hnga mino nih CDF ralkap tuan an duh ti lo le an i harh dah a fak deuh hnga? # Ramleng um dothlennak thawhvo tuk maw a har deuh cang hnga ramchung CDF ralkap khawmhsuat rian dah a har deuh hnga? # Ramchung mino CDF le F lo karlak dirhmun hi hruaitu le nulepa nih thlopbul lo ahcun “Kuang ti zut” bantuk si khawh a si.

# Nihin kan dothlennak rian nakin a herh deuh mi rian dang a um awk a si ti lo. Hi lio ah khua thanchonak rian ngan (big projects) ramleng lei nih kan i hmaithlak awk a si rih lo. # “Min Aung Hlaing Ralkap an batuk cang, an dertuk cang!” kan ti mi nakhmanh in kanmah CDF le rammi kan ba in kan der deuh cang sual maw?

# Dothlennak ah hriamnam maw kan chambau deuh miphun dawtnak lungput dah? # Dothlennak ah ramchung lei kan santlaih lo maw ing a puang deuh ramleng lei kan baat ruang i biaholh dah? # Kawlrawn lei in MAH ralkap kham khawh lo in a hong kai cuahmah mi zoh maw tha a chia deuh, khuachung mino pawl “sia hnaar vuak” bang raldoh a tih mi le auh khawh an si ti lo mi zoh dah tha a chiia deuh hnga?

# Nunnak a thaap mi le a pe cuahmah mi miphun Ralkap an ralthatnak maw a sang deuh hnga, hi lio ah “Vokte kawm tel” in leiba tampi he ramdang kal aa tim mi mino hna tinh mi dah sang deuh hnga? # Min Aung Hlaing nih a uknak a kalpi ning (strategy/policy) a thlen a biapit tluk in nihin CDF kan kalpi ning (Ralkap kong) kan thlen le remh a herh ve.

# Min Aung Hlaing ralkap nih fahnak a kan pek mi maw a tuar a har deuh hnga, kanmah chung in a chuak mi hnahnawh buaibainak dah kan ca ah tih a nung deuh hnga? # Min Aung Hlaing nih hong kan tei sual sehlaw a kan teinak ding hi a meithal le bomb in si lo in cu hlan kum 60 leng tiang an kan uknak ah an rak hman peng mi “kanmah le kanmah sehter i thencheuter hnu i uk) ti mi a hriamnam hlun a si lai kha kan philh lo a herh cang.

# Nihin ralram ah a dir lio mi kan CDF ralkap khi anmah lawng, hi dothlennak a dongh tiang an hmun kho lai lo ti cu 100% in a fian bantuk in khuachung um mino vialte CDF rian ah luhter than dih le i tel dih kan herhtuk than cang ti zong 100% in a fiang mi hmanthlak a si. # Kum hnih chung ah CDF ralkap “vom sa chumh zor in” kan zornak ah CDF hruaitu upa lawng si lo in nulepa le ramleng unau tiang kan i tel dih ti hi kan fian le tuak ah a tha.

# Dothlennak ca ah ramchung ramleng in a pethotu vialte nih kan pekthawh mi hi ramchung pumpak le a bu ca ah pek si lo in kan ram ca ah nan pek mi a si ca ah i hngalsak in holhchuahnak ah hman sual lo le ram dawtnak thinlung taktak a si a biapituk.

# Nihin Raalhraang uknak doh hi ramchungmi rian lawng a si lo ca ah ramleng mi he a dongh tiang kut tlai in kan tuanti khawh nakding ah CDF le Dothlennak hruaitu upa hna nih kalpi thiam a biapituk.

# Nihin kan dothlennak rian tawlrel le thithruai hi ceertual tlaang in bawlung chuih zoh bantuk a si lo i nunnak thaap le thisen he raal doh a si zia kha zapi nih theihfian lo ahcun dothlennak lamtluan ah kanmah le kanmah i chuihpah lengmang a fawituk ti hi philh lo ding a si. # CDF hruaitu le CDF Ralkap hna nih rili raal in nihin kan dothlennak raal a kan dohpitu kan unau hna thazaang lawng si lo in an thinlung le ruahnak zong kan cohlan thiam a herh ti philh lo a biapituk.

# Ramleng kan unau hna zong nih hi dothlennak rian cu ka rian a si ve tiin a dongh tiang telpi le dirkamh khawh a biapi ngaingai. # Nihin kan dothlennak rian hi Min Aung Hlaing tei vial lawng ah ruat lo in kan unau Mizo le miphun dang nih an miphun an dawt le an dirkamh bantuk in miphun dawtnak ah i thangh le sersiamnak caan tha a si tiin ruah a biapituk.

# Hi kan dothlennak hi “Reformation” nakin “Transformation” tu a si deuh ca ah kan rian khiing a rit deuh i a har deuhnak a si ti hi kan fian cia a herh.

# Nihin CDF Ralkap hna hi a ruang tampi ruang ah (an hawile an i dinh cio bang) thaizing ah aa din kho le aa ngol kho dih mi an si ca ah thaizing ah a taang mi mino lawng si lo in a herh ahcun upa zong raal doh ah i thawh ve ding ka rian a si ti philh hlah usih.

# Kan duh mi teinak hmuh taktak nakding ah midang thazaang chuahnak lawng si lo in nangmah le keimah nunnak zong zeimaw zat pek ve a herh rih ko ti hi philh hlah usih.

# Chinmi cu kan lung dongh a fawituk ca ah Dothlennak aa lim tiang Chinmi nih kan zuamnak le kan thazaang nih a tlinh te hnga maw ti hi ralrin ngaingai a hau.

# Dothlennak hi a caan a sautuk cang, kan batuk cang, a dih mi zong a tamtuk cang tiin ngol taak men awk a tha mi thil a si lo ca ah aa lim tiang in cu hlan nakin kan i hneek a hau ti hi zapi nih kan fian a herh.

# Kan tih ruang ah maw kan zuam lo ruang ah maw kan i pek lo le kan i tel ve lo tik ah, kan ram nih uknak tha hun hmu ve te usihlaw, nunnak le thisen he cu uknak tha le zalonnak a kan phanhtertu kan hawile hmai kan khaap te hnga maw?

# Dothlennak ah kan raal hriamnaam tluk in tih a nung mi zumhtlaklonak le ziknawh eihmuarnak hna nih a kan luhhnawh pah ziahmah cang sual maw ti hi kan raal i ven tluk in i ven kan hau.

# “Raal lak ah or zaal” ti bantuk in MAH sin ah tangka, rian, min thatnak tibantuk hmuh duh ah cozah riantuan, pastorte, khua upa le mirum pawl nih caan tha kawl le laak a fawituk ca ah hi zong hi dothlennak ah kan raal nganpi an si ve ti kha philh hlah usih.

# Ralkap party USDP a rak si mi cheukhat nih “Ralkap uknak kan duh/pom ti lo” tiin muihmai i thlen le aw cawi thlen a fawi tluk in a thli tein a hrik a thi lo mi le “Vomkhuai thi kaw ngalhriang a hnaak a faak” tiin lungthli tein Party feeling a ngei mi um khawh a si ti ralrin a herh.

# Nihin kan dothlennak hi “ramchung ral” (civil war) a si bantuk in teinak ca ah ramchung le Tlangmi kan biapitbik ti hi kan fian a hau. # Dothlennak ah khuami le Tlangmi nih kan CDF hi lohma bantuk in kan i hmaithlak i a herh mi riahcaw, mehhaang le an Camp hngahpi ti pawl hi kanmah rian a si ti hi chimh hau lo in i fian kan hau.

# Patung no pawl vialte zong nih kan tlangval pawl an ba ve cang, kan chawnpah ve hna awk le kan rian cio a si tiin kan luh cio a herh i CDF upate le tuanvo ngeitu zong nih an i tel cio khawh nakding in rian /policy/training hna tuah a herh.

# Hi dothlennak ah hin meithal i tlaih in raal ram kal lawng hi rian a si lo, zapi: nungak siseh, pumtlinglo siseh, nutung le patung siseh, upa siseh, ngakchia kum tling lo tiang zong nih mahle ti khawh tawk rian tuan ding a um dih ti hi kan fian le kan i thawh cio a herh cang.

Tahchunhnak ah: Camp ah rawlchumh, tithan, kheeng tawl, camp thianhhlimh, zunput ti than le thianhhlimh, vok-ar zohkhenh, cycle remh, thing hlam, khualtlung mileng lakphakti pek le zohkhenh, buk remh, ralram umkal mi chiah le thlah don, khuachung ah herhhai zaltu, ralram in a rak kir i camp ah aa din mi a rak thutpitu le biaruahtu nungak tibantuk le camp chaplain rian tibantuk tiang in tuan cawk lo rian a um ko ti kha fiang hna usih.

# Nihin CDF hruaitu le ralkap a tuan lio mi zong nih hi dothlennak rian le raldoh hi “kanmah lawng nih kan tuan lai, kanmah nawl a si…” ti lungput si lo in zapi rian, zapi thil le nawlngeihnak tang ah a um mi a si ti kha philh lo a haerh ve.

# Nihin kan dothlennak ah mino tampi cu an zuamnak, an lungthawhnak, an i pek khawhnak le an ngamhnak nih a daih ve ti lo i hiti ning lawng in kalpi peng awk a tha ti lo ti cu 100% a fian cang ca ah, “Thangthar hna” (next generation) kum 18 tang mino pawl hna hi nihin kan dothlennak ralkaap ca ah timhlamh le an thisa ah luhpi kan hau cang (sianginn ah siseh, a leng ah siseh training) pek an herh cang ti kha CDF hruaitu upa lawng si lo in nulepa zong nih fian a hau cang.

# Nulepa nih raalhraang pawl le vanlawng bomb thlak vial tih ngai tung i fapale vial CDF luh tih le sianh lo ti mi lungput hin cun a rauh hlan ah CDF hi a piat te lai i cupin ah kan dothlennak lohma zong kan chuah kho te lai lo ti hi atu in hngalh cia kan hau.

# Ramleng kan unau cheukhat nih “CDF hi a hau lo, tangka bawmhnak lam aa thencheu, cun nan kan kalpi ning zong rammi ca ah thilrit men nan si, CNF tu ah kan naule hi rak kalter deuh hna u…” nan ti mi hi, a policy cu a tha nain a practical ca ah, CNF tlak cu chim lo hitluk ralkap sikaan a neem mi CDF tlak hmanh an i harh i an duh ti lo tik ah CNF cu baan rawt dah lo cun an lut hlei ti hnga maw, ti hi ruah a hau. (CNF tlak a tha lo ti si lo in kan mino hna nih dothlennak ralkap tlak an i harh cangnak langhternak ah)

# Nihin ah CDF hruaitu le aa pe ngai rih mi mino a tam deuh hna zong hi a rauh hlan ah an hawile bantuk in: Dam lo ruang, raal kut in thih ruang, thih tih le ngamh ti lo ruang, nupi pasal ngeih ruang, zuam ti lo, nulepa nih thloh, chungkhar inn-lo harsat, hruainak sikan le upadi zulh khawh lo,

hruaitu le hawile he i sikvelh le lung i khah lo ruang, ramdang kal le sianginn kai, hmailei an bavuah rawk lai phan tibantuk ruang pawl ah an i din cio te hna lai i khipinlei kan dothlennak zei dirhmun dah kan phanh te lai ti hi nihin hruaitu le nulepa nih ruah cia a herh. # Zeibantuk miphun dothlennak zong ah teinak hi meithal nakin miphun lungput in a si deuh ti hi kan dothlennak lungput a si a herh. cRD; PAPUI