A Poi Tuk Lawmmam E! PDF Pasaltha Hna Hriamthil Chiahnak A Kang Caah Phaisa Tam Tuk Le Thilri An Sungh Dih Cikcek E
Depeyin Hrambunh Galon PDF Hriamthil Chiahnak A Kangh Caah Sing 3,000mmk Tluk Sunghnak An Tong. Sagaing ramṭhen, Depeyin peng hrambunh Ganung PDF hna nih hriamthil an i chiahnak kudawng cu a kangh caah sing 3,000mmk tluk kan sung tiah Galon PDF a thanh.
March ni 22, zinglei suimilam 6:00AM hrawng ah zenthong, mine le hriamthil chiahnak kudawng cu ruah lo piin puahkehnak a chuak tiah Galon PDF nih a thanh.
Ralkap pawl zinglei exercise an tuah Physical Training (PT) an tlik lioah hi thil a can hi a si. Meikanghnak ruang ah hriamhme hriamngan telh in hriamthil tamlak le phone lung 20, puan le hmanmi thilri vialte kan sunghmi dihlak hi sing 2,900 in sing 3,000 kar a si tiah Galon PDF nih a thanhmi ah a langhter.
Ralkap lei in hliamhma tuarmi cu kan um lo nain, mizapi nih harsa ngaiin an thawhmi le an kan bawmhchanhnak in hmuhmi thilri an si caah kan lung a ṭha lo tuk tiah an langhter chih.
Dohthlennak ding le hmailei kar kan hlan khawhnak ding caah hriamthil bawmhchanh kan herh ko, mipi nan thazaang le bawmhnak kan herh tiah Galon PDF nih nawlnak le bawmhhalnak cu 2023, March ni 23 ah a thanh. The Chin Post
Sagaing ramṭhen, Pale peng Ziphyokone(ဇီဖြူကုန်း) khua pyusawhti umnak sakhan cu Myanmar Royal Dragon Army (MRDA) nih kalhnawh in kan kahdoh hna caah SAC ralkap 3 an thi tiah MRDA phu in ṭuanvo ngeitu pakhat nih March ni 23 ah a chim.
March ni 22, zan suimilam 10:10PM hrawng ah Pale peng Ziphyokone khua pyusawhti sakhan cu MRDA phu nih a voi hnihnak luhhnawh in an kahdoh hna, ralkap 3 an thi tiah theih a si.
“March ni 22, kanmah lei nih pyusawhti an umnak khua cu hriamngan in kan kahdoh hna. Nihin March ni 23 zinglei thawngpang kan theihning ah cun nizan kahdohnak ah SAC ralkap 3 an thi, hliamhma tuarmi zong an um tiah kan theih” tiah Myanmar Royal Dragon Army in chimphuannak nawlngeitu nih a chim.
Pyusawhti tampi an umnak Ziphyokone(ဇီဖြူကုန်း) khua cu MRDA Myingyan battalion 1, Myingyan pengkomh battalion 3 phu nih March ni 21, ah a voi khatnak an kahdoh hna hnu ah March ni 22 ah a voi hnihnak an kahdoh ṭhan hna tiah theih a si.
