Press "Enter" to skip to content

American, Uk Le UN Nih Myanmar Ram Chung Raldohnak Hi Thazaang An Pe Bak Lo

USA le UK le UN nih Kawlram mipi cu za ah za khan in an kan dirpi/an kan ttanh. Asinan ramchung i ral doh le ralthawh cu an duh bak lo/tha an pe bak lo. Cuti si ahcun Laimi caah cun USA le UK le UN zong “Dalaan nganpi” an si tinak si lai cu. Annih nih cun raldoh le ralthawh nih tthatlonak tampi a chuahpi kha an i fiang tuk cang. Ralthawhnak nih ram a thleng kho taktak lo ti kha an i fiang tuk.

Anmah nih an bawmhmi hna phu le ram, le Russia le Tuluk nih an bawmhmi hna karlak ah ral i dohnak faktuk a um len cang i san a tlai lo ti kha an i fiang tuk. Teinak zong um huaha loin a dih ko. Minung tamtuk an thi, mangttaam a tlung, ralzam an karh, inn le lo tamtuk a rawk, raldohnak ah phaisa tamtuk a dih fawn i sipuazi vialte zong a rawk dih fawn.

A phunphun in raldohnak le ralthawhnak nih tthatlonak a chuahpi kha an i fiang tuk, tamtuk hmuhtonnak an neih cang ruangah raldoh an duh ti lo/tha an pe lo. Pathian nih phubahlam cu keimah rian a si a ti. Laimi cu phubahlam kho ding kan si lo. Kan zeizong te nih a tlinh lo.

Aluancia kum 60/70 lio in Karen le Kachin le Shan ram hna ah ral an do i phubahlam nak an tuah nan zeite santlaihnak a um lo/tthat lonak tuk tamdeuh a chuak. Atu chan cu fimchan a si, social media chan a si i ahohmanh raldoh an duh ti hna lo. Khrihfa a simi nih cun Bible nih a kan cawnpiak ning in zulh le i nunpi khawh hi kan i zuam peng ding a si ko. Kawl ralkap ziaza tthalo nawl i cawnpeng ding kan si lo. Anmah tuahmi bantuk tuah ve ding kan si lo. Anmah bantuk si i zuam ding kan si lo.

Pathian kan lei ah a um peng ko/a kan dirpi peng ko. Ramhruaitu le miphun caah rian a ttuanmi nih cun Pathian a bochan bak a hau, a bik in Lai miphun caah. Pathian bochan loin mah duhnak lawng a zulmi ram hruaitu cu hlawhtlingnak a hmu lai lo/thluachuah a um lai lo. Raldoh le ralthawh tha a pe lomi cu Khrihfa cawnpiaknak an zulh i an i nunpi tikhawh a si. Asinan a poi tukmi cu Laimi caah cun “Dalaan” kan ti hna. Dalaan sullam hmanh kan i fiang lo buin. Laimi caah cun USA le UK le UN zong Dalaan an si ko ne hi. Crd; Saya Van Tum

May be an image of 1 person and outdoors

 

CDF-Tonzang sin ah Ralkap Pakhat aa Fonh. Shan ramkulh Maingyawng khua hrambunh SAC ralhrang Kha La Ya (335) ah rian a ttuanmi ralkap Hau En Lian cu September 7 ah khan SAC ralhrang a chuahtak i nihin November 2 ah CDF-Tonzang sin ah aa fonh, tiah CDF-Tonzang nih thawng an thanh.

Thantlang Khuami Hnemhnak le Thluachuah Halpiaknak HBA le HCMF nih an Tuah. SAC ralhrang kut in ngaihchiatnak le sunghzatlaknak fak tuk in a tongmi Thantlang khuami hnemhnak le thluachuah halpiaknak program cu nihin zinglei sml. 10:00 ah HBA Hall ah an tuah, tiah thawng kan theih.

May be an image of sitting and indoor

Thantlang khua upa Pu Ram Khar nih, “HBA le HCMF min in HBA Hall ah Thantlang lei in kan pastorte le kan palete he i hnemh thlacam ttinak le rawldum ttinak an kan ngeih piak. HBA min in Thantlang khuapi ngaihchiatpinak Roca zong an kan pek chih,” tiah a langhter. Nihin ah tuahmi program nih a langhtermi cu Hakha le Thantlang cu chiat-tthat kan i hrawm tti tinak a si.

HBA le HCMF cung ah Thantlang aiawh in lunglawmhnak ka chim, tiah Pu Ram Khar nih a langhter chap. Nihin ni tiang Thantlang khua ah SAC ralhrang kut in biakinn pahnih telh in inn 184 a kaang i minung 7 an nunnak a liam cang. Crd; The Chin Journal

Dalaan ruang ah Ralhrang nih Rev. Van Cem inn kan chuh, tiah ca an taar i amah tlaih ding ah kawl. November 2| Hakha Cawbuk Sang um Rev. Van Cem cu Dalaan ruang ah Ralhrang nih a inn an chuh, amah zong tlaih ding ah an kawl len, tiah kan theih. “Ralhrang leitang Dalaan hmursau rual hna nih thi ding in an report hnu ah an tlaih i Pathian thawnnak nih a khamh i a luat than. Cu hnu October 29 ah ralhrang pawl nih tlaih nolh ding in an kawl than,” tiah khuami pakhat nih The Hakha Times ah a chim.

Rev.Van Cem cu a inn an bauh i thilri an lak leng ah a inn tawh an hrenh i kan ting (chuh) cang tiah ca an tar, tiah kan theih. Cun, an inn pawngkam minung umlonak inn pawl zong an bauh hna i thil an lak pin ah dum chung i an hmuh mi thingthei le haanghnah an tawh (lawh) dih, tiah kan theih. Ref; the Hakha Times

Be First to Comment

Leave a Reply

Your email address will not be published.