Press "Enter" to skip to content

ASEAN Meeting Ah Min Aung Hlaing Sawm Lo Ding Timi Cu ASEAN Chairman Nih A Fehter Cang

ASEAN Meeting Ah Min Aung Hlaing Sawm Lo Ding Timi Cu ASEAN Chairman Nih A Fehter Cang, Thlennak A Tuah Hlan Cu ASEAN Meeting Ah Sawm Ti Lo Dingin Indonesia Nih A Chuahpi: October 26 in 28 tiang tuah dingmi ASEAN Meeting ah ralhrang hruaitu Min Awng Hlaing cu sawm lo ding tiah biachahnak cu Oct 16, tuni ah ASEAN chairman a tuanlio mi Brunei ram nih fehternak a tuah cang.

Oct 15, nizaan ah tuahmi ASEAN ramleng vuanci hna online tonnak ah ASEAN hnatlaknak l phun 5 hna cu ralhrangbu nih pakkhat hmanh a zulh lo caah, Min Aung Hlaing cu ASEAN meeting ah telnak nawl pek lo dingin biakhiahnak an tuahmi cu ASEAN ram hna nih an lungtling cio tiah theih a si.

Indonesia ramleng vuanci nih cun ralhrangbu nih thlennak a tuah hlan chung poah cu SAC ASEAN meeting ah telnak nawl pek ti lo dingin biatung a chuahmi cu midang zong an lungtling cio tiah theih a si.

Deputy Sergeant(ဒုတပ်ကြပ်) Kyaw Hliang Oo Le Palek Kuang Thet Zaw Hna CDM An Lut, A Himnak Hmun An Phan Cang: Sagaing ramthen Ayarthaw peng ah Deputy Sergeant( ဒုတပ်ကြပ် ) Kyaw Hliang Oo le Palek Kuang Thet Zaw cu CDM an tuah i a himnak hmun ah kan phakter cang hna tiah Ayarraw Mizapi ukhruainak phu nih an thanh.

Ayarthaw Palek Sakhan ah Amah Kuang Thet Zaw No. Lah / 255953 le Deputy Sergeant ( ဒုတပ်ကြပ်) Kyaw Hliang Oo cu October 6 ni ah CDM an tuah i October 15 ni ah a himnak hmun an phan cang tiah theih a si.

Ralhrang lei in Ralhrang, plek hna CDM tuah nan duh ah cun zeitik caan poh ah pehtleih khawh asi i ahim nak hmun ah kan in um ter lai tiah Ayarthaw peng mizapi ukhruainak phu nih an langhter.

Swe Bo Sikkhun khua ah CDM Siibawi Doctor Aye Min Oo Telh In Khuami 9 Cu PDF Tiah Lunghrinh In Ralhrang Nih An Tlaih Hna: Swe Bo peng Sikkhun khua ah October 14 zing Suimilam 6:30 ah ralhrangbu an rak lut i CDM Sibawi Doctor Aye Min Oo telh in khuami 9 cu PDF an si tiah lunghrinh in ralhrang nih an tlaih hna tiah khuami nih an chim.

Khuami pakhat nih cun “Sikkhun khua ah sualnak ngei lomi khuami 9 hna cu ralhrang nih PDF an si tiah hramhram in an tlaih i an kalpi hna .CDM siibawi Doctor Aye Min Oo zong an tlaih. October 15 ni Myawaddy (MWD) thawngthanh nak ah siibawi cu ralhrang nih Swe Bo PDF tiah a si lo ningin an puh. Hi siibawi pa cu Covid – third wave lio ah khua i Volunteer phu hna he i bawm in mizaw an zoh khenh hna, khua nih kan i bochan mi Siibawi a si. Siibawi pa cu CDM na tuah i mizaw na thlop hna tiin an tlaihmi a si. Ralhrang nih anmah thawngthanhnak ah cun siibawi pa cu PDF tiah a si lo ningin an puh. Siibawi pa le sualnak ngei lomi midang hna nunnak kongah lungrethei a si ko” tiah a chim.

Ralhrang nih an tlaihmi chungah hin taangkua kai lio mi aa tel, a pa an tlaih khawh lo caah a fapa cu an tlaih. A pa nih cun amah cu i tlaihter in a fapa cu a thlah than dingin a chimh hna. Ralhrang nih a fapa cu an thlah than ko nain a nu tu an tlaih than tiah theih a si.

Kyaitthu (ကျိုက်ထို) le Belin ah ralhrang hna cu KNU nih an kah hna, ralhrang 3 an thi, 2 hliamhma an tuar: Kyaitthu (ကျိုက်ထို) peng le Belin peng ah October 15 ni ah ralhrang hna cu KNLA tat-mah 1 chungah ah kah an tong i ralhrang 3 an thi, 2 cu fak ngai in hliamhma an tuar tiah theih a si.

Nizaan zinglei ah Belin peng, khua pakhat i kawl biaknak sianginn ah umhmun khuarmi ralhrang hna le BGF hna cu KNLA brigade 1 nih an kah hna cash ralhrang le BGF in minung 2 nih hliamhma an tuar.

Cun zaanlei suimilam 5:00 luan hnu hrawngah Kyaitthu (ကျိုက်ထို) peng Buka khuapawng ralhrang sakhan umnak ah KNLA nih bomb hmanh in an doh hna. Cu bomb hmanh mi ralhrang motor cu a puahhnawh caah motor chungah ummi ralhrang 3 an thihnak a si.

Ralhrang nih hramhram nawlngeihnak an lak hnuah Kyaitthu le Belin pengah ralhrang le KNLA brigade 1 kahdohnak atu le atu a chuak tiah Khet Thit Media nih a tial.

Khin U PDF Le Ralhrangbu An I Kap, Ralhrang Le Pyu Saw Htee 60 Hrawng An Thi: Sagaing ramthen, Khin U peng ah October 15 zing suimilam 4 hrawng ah thazaang tam pi in a rak phanmi ralhrang hna cu mipi vengtu ralkap nih bomb in an doh caah ralhrang 60 hrawng an thi tiah Khin U PDF nih a thanh.

Khin U PDF hruaitu pakhat nih “Kanmah Khin U peng mipi vengtu ralkap, Yee Oo le Swe Bo peng mipi vengtu ralkap hna i bawm in ralhrang an ratnak ding hmun hnih ah bomb kan hmah, bomb 20 kan hmanh. Ralhrang le Pyu Saw Htee tam tuk an hliam. Khuami hna nih kan theih tawk ah cun hliam a tuarmi le a thimi hi 60 hrawng an si. An dihlak in Yee Oo lei ah an kal pi hna” tiah a chim. Credit : The Chin Post

Be First to Comment

Leave a Reply

Your email address will not be published.