Press "Enter" to skip to content

ASEAN Meeting An Thok, US President Joe Biden Aa Tel Lai

Myanmar aiawhtu aa tel lomi ASEAN meeting cu Oct 26, tuni ah thok a si cang. ASEAN chungtel ram pakhat khat an bau a voikhatnak a si. Myanmar ramkhel aiawhtu kan sawm lai lo tiah ASEAN biachahnak cu ralhrangbu nih an lungtling kho lo i ralhrangbu hotu nan sawm lo hmanh ah Union minister pakhat khat tal sawm ding kan si tiah nizan ah cathanh an chuah. A sullam cu ralhrangbu aiawh in an sawmmi ramleng vuancizung upa U Chan Aye cu meeting a kai lai lo tinak a si. Cucaah tutan ASEAN meeting cu Myanmar aiawhtu an bau tinak a si. NUG nih meeting ah kanmah kan kai lai an t nain zeihmanh lehnak a um lo

ASEAN Meeting le US Dirhmun
Oct 26, tuni i ASEAN-America meeting ah US President Joe Biden aa tel lai. Hihi kum li chungah ASEAN meeting i US President aa tel a voikhatnak a si. US President nih hin meeting ah ralhrangbu hotu he thutti a duh lo i hihi ASEAN meeting ah ralhrangbu sawm a si lonak a ruang nganpi pakhat a si tiah thiamsang hna nih an chim. Hi nih hin US nih ralhrangbu le ralhrangbu nih a sermi innhngak cozah a cohlan lonak kha a fianter ngai tiah chimceih a si fawn.

ASEAN hmangin ramkip cawlcanghnak le tonnak ah ralhrangbu an i tel ve ding kha Britain cozah zong nih a duhlonak a rak thanh cang. Britain nih inntek tuanvo lak in tuah dingmi G-7 ram hna le ASEAN meeting ah siseh, vawleicung huap khuachan buainak tuahremhnak kong ceihhmainak ah siseh nawlngeihnak latu ralhrangbu cu telnak nawl kan pe hna lai lo tiah Britain cozah nih a thanh cangmi a si.

ASEAN le NUG
Khatlei ah atu tiang ASEAN nih NUG hi Myanmar ram aiawhtu ah a pom rih lomi zoh tikah Myanmar buainak kong i ASEAN hnatlaknak phun 5 a tak in tuanchuahnak ah ralhrangbu telpinak le bawmhnak a hau ti kha ASEAN nih langhter an duhmi a si tiah cheukhat nih an chim. Oct 25, nizan ah khan US President i National Security advisor Jake Sullivan le NUG hruaitu tonnak an ngei tiah theih a si. Hi nih hin US nih ralhrangbu nakin NUG a dirkamh/cohlan deuh ti a langhter ngai ko tiah ramkhel thiamsang hna nih an hmuhning an chim.

ASEAN Meeting le Myanmar buainak
Tutan ASEAN meeting ah a bik in ceih dingmi cu Myanmar buainak le ASEAN ram chung covid zawtnak kong a si tiah theih a si. ASEAN palai Erywan Yusof nih Myanmar buainak kong chimthanhnak (report) a ngei lai tiah ASEAN kong thiamsang Daw Moe Thu Zar nih a chim. ASEAN palai cu rian an khinhnak a sau pah cang nain Suh Kyi le President U Win Myint he tonnak an pek lo caah atu tiang Myanmar ah a ra rih lo.
ASEAN palai nih hin ASEAN hnatlaknak phun 5 kha pehzulh in a tuanchuah ding hrimhrim a si. Atu i ASEAN chairman hi a caan (term) a dih cun Cambodia nih ASEAN chairman a tuan lai, cutikah palai chiahmi zong an i thleng te lai tiah ruah a si. ASEAN palai nih amah lawng riantuan cu rianhma a kal kho lai lo, cucaah amah bawmtu bu ser ding a si timi ruahnak zong a um pah tiah theih a si. Tutan ASEAN meeting ah Myanmar kong a dik a hmaanmi biakhiahnak an tuah khawh lai ti zumh cio a si.

By. Salai CP Lian (Source: BBC)

Be First to Comment

Leave a Reply

Your email address will not be published. Required fields are marked *