Press "Enter" to skip to content

ASEAN Palai Le Ramkhel Party Ton Ding An Let Than, A Ruang An Langhter Duh Lo

ASEAN Palai Le Ramkhel Party Ton Ding An Let Than, A Ruang An Langhter Duh Lo: Oct 12, tuni zanlei ah Naypyidaw i UEC zungah ASEAN palai Ery Yan Yusof le ramkhel party cheukhat tonnak ngeih dingmi cu let than a si tiah theih a si.

USDP chimnak nawlngeitu Dr. Nanda Hlah Myint nih “Tonnak a um ti lai lo, a rawk cang. UEC nih tuzing ah thawng an kan thanh. Zeiruangah ti an chim lo, thawng kan in thanh than hna lai an ti” tiah a chim.

ASEAN palai he tonnak ah sawmmi party hna hi fiang tein langhter a si lo. USDP, Naypyidaw hrambunh party pali telh in sawmmi dihlak party 8 an si. Tlangcung party chungin Arakan National Party (ANP) le Shan National Democratic Party (SNDP) an i tel tiah theih a si.

Myanmar buainak kong ASEAN hruaitu hna cu April 24, 2021 ah Indonesia khuapi Jakarta ah tonnak an rak ngei i hnatlaknak 5 an rak tuah. Cu hnatlaknak 5 chungah ASEAN palai chiah ding ti a um bantukin Brunei ramleng vuanci pahnihnak Ery Yan Yusof cu Myanmar buainak tuahremh dingin ASEAN nih palai ah an khinh. Palai an khinh hnu thlahnihnak ah Myanmar a rat hi a si.

Tutan ahhin ralhrangbu nih NUG, CRPH, Tlangcung hruaitu hna, Suh Kyi le President U Win Myint hna he tonter an tim hna lo. Bochoh Zaw Min Tun nih cun “Suh Kyi pakhat lawng tonnak in buainak tuahremh khawh a si lai ti zumh cu mitcaw zumhnak a si” tiah tuan ah khan a rak chim bal. Ref: BBC

Sanga Auto-rickshaw Association Nih Ralzam Hna Ca Ah Charity Service An Tuah: Nizan October 11, 2021 ah khan Auto-rickshaw Association; Sangau nih cun Myanmar rambuai ruangah Mizoram i aa dormi hna bawmhnak dingah charity service an tuah.

Ralzam hna ca i charity service tuahnak ahhin Auto-rickshaw Association; Sangau Adviser Pu F. Lalliana nih thlacamnak hi caan hram a thok i charity service cu zing suimilam 6 in zanlei 4 tiang tuah a si.

Auto-rickshaw Association; Sangau Secretary, Pu V. Ramluahsanga chimning ah cun Sangau Auto-rickshaw Association hna nih hin kum fatin November thla ah midang bawmhnak caan rak tuah tawn lengmang a si. Tukum belte cu Committee nih ralzam hna caah bawmhnak tuah siseh, tiah bia a khiah ruangah atu bantuk in an tuah hi a si.

Ralzam hna ca i charity service an tuah lengah hin Sangau khua chung i aa dormi paoh nih cun Auto-rickshaw hman man 100 kha 50 in an lak lai, tiah kan theih fawn. Oct 11, nizan i an hmuhmi phaisa vialte hi ralzam hna ca ah an pek lai.

Auto-rickshaw Association; Sangau ahhin members 20 hrawng an um i an dihlak in Auto-rickshaw cu pawcawmnak ah a hmangmi an si hna. By. Tluanga Zathang

Be First to Comment

Leave a Reply

Your email address will not be published.