Press "Enter" to skip to content

Attorney General William Barr:Nih Trump sin ah biadik a chim duh lo.

Tu zarh ah khan Trump he naihniam tak in a um i Trump caah zumhtlak a simi US Attorney General William Barr nih tutan thimnak a phi chuak a thleng khomi thimfung fir/ nawnnoknak kan hmu lo tiah a rak chim. Mah cu thimnak an nawnnok a tiah zahan i minit 46 sau bia a chimtu president Trump caah theih a nuam lo taktakmi a si.

Cucaah Barr cu White House ah a kawh i suimilam tam ngai bia a ruah. Cu he pehtlai in thawnghaltu nih bia an hal.“Barr nih zeihmanh a tuah lo. Ttha tein a hlathlai in a kawl lo,” tiah Donald Trump nih Justice Minister Barr kong cu a chim. “Nangmah sin ah lungthiang tuk i biachim a hau ko. A ruang cu thimfung an firmi a tam tuk,” tiah Barr hi an dirkamhtu ah na zum kho ti lai maw tiah an halmi cu let lo in a chim.

“Mah bia hi tuhnu zarh tlawmpal ah ka hal tthan te u. An hlathlai ta a hau. Barr nih ram kong ah a ruah. Ram kong a si lo, Criminal (misual) he ai pehtlaimi kong a si (very bad criminal stuff), tiah Trump nih a leh hna.Trump nih hin kum li president a ttuan chung ah riansang tlaimi 50 leng rian a phuah hna. Caan sau ttuan rih ding si sehlaw Barr zong hi a phuah khawhmi a si, tiah experts nih an ruah.Teirial catial tu

Thawngpang dang asi a tang hi:

Mi ngaithiam dingin White House asiloah amah he ai pehtlaimi polictical committee phaisa in an ziknawh hna, tiin lunghrimhnak a um caah Justice Department nih hlatlainak a tuah lio pi a si. Cu thawngpang cu Tuesday i federal court nih record a langhtermi ah an tial.Trump i a top advisers tampi hna cu federal phung buar ruangah an sual biakhiahpiak an si hnu, cun amah a tanhmi minung Trump nih ngaihthiam a timh hna, tiin cheihphainak a tam chinchin hnu in cun, tutan hi donghnak a panh cuahmah cangmi Trump cozah caah a nehnungbik phungbuarnak a si.

Ziknawhnak kong cu cahmai 20 ah khat lakin an tial i, Tuesday ah DC District Court nih mipi theih awk tha in a chuahmi a si. Sual ngaihthiampiak dingin ziknawhnak kong he pethlaiin capar an tialmi cu bihzoh kho ve dingin August tein khan prosecutors pawl nih nawlnak an tuah. Cu kong cu Chief Judge Beryl Howell nih a zohfel cangmi a si, tiah record nih a langhter.Ziknawh an timhnak a ni le thla, asiloah zihnawh rian ah ai telmi minung an min belte cu capar an tinmi ah an langhter lo. Summer hlan i a office an vung luhhnawhmi sihni pakhat telh in, ziknawh kong i an i chonhbiaknak kong lawng hi an langhter.

Hi ziknawhnak he pehtlaiin, nihin tiangah zapi theihin tazacuai a tongmi an um rih lo. Biaceihzung nih capar an tinmi kongah White House nih comment pek a duh lo. Trump office in a chuah hlan ah a minung pawl an sual ngaihthiam ta manh dingin an nawl, tiah CNN nih thawng a rak thanh bal. Tuesday capar an tinmi he pehtlaiin Trump a minung lakah DOJ ni an hlathlaimi hna kong theihternak a um rih lo.Culan ah siseh, nihin tiang zongah ah siseh, tutan capar tinmi he pehtlaiin cozah official minung pakhat te hmanh hlathlai an si rih lo, tiah JD official pakhat nih CNN ah a chim.Summer a dih hrawng i hlathlaitu pawl nih cozah theihpi lo mi offices pawl an luhhnawh hna i, iPhones, iPads, laptops, thumb drives le computer drives he ti bantuk tehte 50 lenglo an lak. Asinain, cu tehte pawl cu prosecutors pawl sinah an ap duh lo.

Tehte pawl hman kan duh ve ko, tiin tazacuaitu (prosecutors) pawl nih biaceihzung ah nawlnak an tuah. Email chungah hin ngaihthiam halpiaknak kong siseh, ziknawh an i timhnak biathli, thilthup an um lai, tiah tazacuaitu pawl nih an zumh. Sihni le an minung pawl karlak i biachonhnak hi cu upat pekpiak an si ko i, tazacuaitu hna sinin hi pawl hi cu fimpiak an si tawn ko. Asinain, tutan thil sining ah hin cun sihni le a minung pawl karlak i biakchonhmi vialte bihzoh kho dingin Howell nih tazacuaitu pawl a onh cang hna.Sualnak kongkau ceihhmai a si tikah hin cun, law (upadi) ningah sihni le a minung karlak i biakchonhnak hi humzualpiak an si lem ti lo.

President sinin sual ngaihthiamnak hmuh khawhnak lam hi political strategy ningtein a si awk a si i, sihni pakhat le a minung karlak i tawlrelmi thil hei ai khat ve lo, tiah Howell nih a court order ah a tial.An min cu langhter a si lem lo nain, tutan hlathlainak an tuahmi hna pawl hi senior White House officials pawl sinah nawlnak a tuahtu hna he pethlaihnak a ngeihmi an si hna. Hi hna pawl nih hin sual ngaihthiamnak hmuh khawhnak dingah lamkaltu hmangin ziknawhnak phaisa kuat an i tim, tiah record nih a laghter.Direct in ziknawh phaisa an pek mi kongah, tazacuaitu pawl nih baiceihbawi sinah tehte an ap rih lo. Mipa pakhat nih hin a liamcia caan le hmailei caan i a politics kalpinak caah ngaihthiam halnak lam a kawl, timi belte cu tehte in an langhter.

An i biachonhnak he pethlaiin minung 3 hi hmaitonh tein ton kan duh ta rih hna. Cuhnu ah cun hlathlai rian hi kan lim te lai, tiah tazacuaitu pawl nih biaceih zungah an chim.
Tutan tazacuainak le hlathlainak kongah lunghrimhmi minung hna hi pakhat hmanh a takin tazacuai an si rih lo caah hin, hihi cu confidential thil a si caah, biaceihzung nih capar an tinmi hi kan fim chung rih lai, tiah kan hnung zarh ah khan JD nih Howell an chimh.

US Pardon Attorney office nih a chim ningah, Trump nih president a tuan chung i sual a ngaihthiammi hna hi minung 29 an si i, an sual a nemterpiakmi hna hi 16 an si. Cu hna lakah a tam u hi cu amah he ai naihniammi an si hna. An minfang khek in chim ah cun, 19th century lio i vote peknak kong i rualrannak um dingin a aupitu Susan B. Anthony, former Illinois Gov. Rob Blagojevich, Bush i a adviser Scooter Libby le, 2016 lio i Trump cawlcanghnak kilvenpiak duh ruangah Congress ah lih a chimtu longtime Republican political adviser Roger Stone hi an i tel.Kan hnung zarh ah khan, Trump nih a former national security adviser Michael Flynn a sual a ngaihthiampiak. Anih hi FBI a dehhlengtu, Turkey caah a thli in rian a tuantu a si pinin, hmai lei pi tiang zongah a in te dingmi a dangdang a sualnak vialte zong cu ngaihthiampiak a si.Chelsea Bawi.

Be First to Comment

Leave a Reply

Your email address will not be published. Required fields are marked *