Atulio Kan Doh Cuahmah Mi Min Aung Hlaing Le A Ralkap Hna Hi Kan Tei Hna Lai Maw?
Ralhrang MAH le rual hi kan tei lai maw? Kan ral MAH le rual hi NUG le a ralkap rual PDF lawng le Karen le Kareni le Chin tbt lawng cun kan tei lo ding hi a fiang pah ko cang. Ral kan teinak ding ahcun FPNCC i tlangcung hriamtlai ah ai tel mi KIO,AA,TNLA, UWSA,SSPP,MNDAA le NDAA hna hi an thazang dih lakin an i tel ve hrim a hau mi a si.
Zei ruang dah an thazang dik lakin an i tel duh lo? Cu hlan ah NUG hi zei dah si ti kan zoh hmasa lai. NLD MPs cheu khat nih CRPH an dirh. CRPH nih NUG le NUCC a hrin hna. Cu a hrin mi NUG le NUCC cu a kut tangah a hum hna i CRPH hnatlaknak tel loin zeihmanh an tuah kho lo. CRPH cu NLD kawl party lila kha a si. An nih hi Federal Democracy kha an hmurka lawngin a chim i an Party thawnnak lawng a ruatmi an si.
NUCC nih Federal Democracy dirhnak caah a hrampi a si i Kawl State ser ve dingin propose an tuahmi zong an cohlang lo i Interim government thit hruainak kong tu biapi deuh ah an chiah. 2020 thimnak lio i Chin NLD pawl nih a CAAN si rih lo timi kha CRPH nih an i cawn ve cang.
Federal Democracy dirhnak caah CRPH nih tlangcung hriamtlai hna sinah a fekmi hnatlaknak (Political Agreement) a tuah duh lo caah FPNCC hriamtlai buu hna nih ralring tein thil sining an cuanh i an thazang dihlak chuah in an doh lo nak a ruang hi si dawh bik a si. Cucaah KAWL CRPH nih tlangcung hriamtlai a komh thiam lo, a fekmi hnatlaknak a ser duh lo ahcun MAH le a ralkap rual tei ding cu “Mang” lawng si rih lai. Credit: Salai Tin Maung Win
Thawng tial cawnnak Part 1: Ralhraang a rak kai mi Vaar chuk ah lung an hrilh hnawh hna motor pali an i let pakul leng an thi. Kalay in a rak kai mi Ralhraang pawl cu 2023 March 21 Lungbang khuataw Vaar chuk an zuan lio ah kiangkap khuami nih lung an hrilhhnawh hna i an motor pali lamthlang ah an i let i Ralhraang pakul leng an thi tiah khuami sin in kan theih.
Hi kong he pehtlai in Falam peng kiangkap khua upa min langhter lo mi pa nih “Ralhraang pawl kan khuataw Vaar chuk an zuan an i khumh dih lecaangka in kan khuataw lam cung lungpang ah bomb kan rak i sawh cia mi kha kan puahhnawh hna i lung nih a rilhhnawh ciammam hna i kan hmuh hnganbak ah an motor pali bak lamthlang ah an liam i Vaar tiva ah an va tla. A tlawmbik minung pakul cu an thi lai tiah kan zumh,” tiah The Hakha Times ah a chim.
Cun a dang motor pawl zong “lung nih a rilh, a tlak hna ca ah an motor an rawk lawng si lo in a chung um mi ralkap zeimawzat fak ngai in a hliamh hna ti cu a langpaar in an cawlcangh le an i tuamhlawm ning kan hmuhnak in a lang. Cu lawng si lo in an phurh mi an hriamnam le eidin thilri pawl zong ceilakte a rawk,” tiah a cunglei upa nih a chimchap.
Hi bomb puah ding an rak timhlamh ning kong he pehtlai in “Kalay in an van i thawh ti thawng kan theih caangka khan khua mino hna hruainak in hi thil cu timhlamhcolh a si. Bomb kha lungpang kua ah tam nawn kan tenh hna i a nawnnak (a fiu) sau nawn in kan i tuah cia. Ralhraang pawl Vaar chuk ah an i khumh dih lecangka in kan puahhnawh hna. Lung nih a rilhhnawh hna le Vaar tivakuang tiang an motor aa leh i an choi mi zoh ah cun lung a hnui khotuk,” tiah a cunglei upa nih a chim.
Hi an thil tuah mi kong ah CNF Ralbawi pakhat nih “Hi khuami thil tuah mi hi thil thatuk a si. Minung tampi zong a herh lo. A him pin ah a dih mi zong a tlawm. Hi bantuk in mahle tiram hmunhma kha raldohnak ah tan laak thiam le hman thiam hi a herhbak mi a si,” tiah The Hakha Times ah a chim.
Tutan a rak kai mi Ralhraang pawl hi March 10 ah motor sawmthum nih ralkap zale sawmsarih van phur in a van i thawh mi an si. Tutan ram buai hnu ah tutan hi a voi nganak Chinram ah an rak kainak a si.#
(Biakilh: Hi thawng cu media rian tuan mi pawl ca ah thawng laak le tial tik ah, Topic tial ning, Lead (Biahramdomhnak) tial ning, Body (A chung bia kong) tial tik ah hi thawng hi a dikbak mi a si ko ti langhternak ca ah Quatation “…” (a theitu pa nih a chimbak mi bia) tial ning le, Background (Atu thil a cang mi nih a chuahpi mi le hi bantuk thil cu hlan ah a rak cang mi kong tibantuk tial ningcang cawnnak ca ah ka bunhchom mi, a dik mi ah ruah lo ding a si) Pa Pui
