Press "Enter" to skip to content

Aung Min Thang Ka Dawtm Lai Mi Phun Hna ISRAEL” TIMI BIAFANG NIH A SAWHMI AI DANG CIO

Kan Bible ah Israel timi biafang hi 2000 renglo hmuh asi. Asinain “Israel” timi biafang nih a sawh duhmi, a chim duhmi hi hmun khat le hmun khat kha ai dang cio. Aikhat peng in kan char sual ahcun tlau a fawite. Cucaah theidan kan thiam nakhnga:

1. ISRAEL CU JAKOP I PUMPAAK A MIN ASI
Pathian nih Jakop thluachuah a peek ah khan a min a thlen i Israel ti asi. Cucaah Genesis cauk chungah kan hmuhmi “Israel” timi biafang nihcun Jakop kha pumpaak in a sawhmi asi i, Jakop timi min aiawh in hmanmi biafang asi.

2. JAKOP HRINSOR MIPHUN MIN ASI
Josef chan kum sarih mangttam a tlun lio ah Jakob chungkhar dihlak cu Izip ram ah an rak peem. Cutikah miphun pakhat ah an von i cang cang. Cucaah Jakop cu Israel tiah a min leet asi bantukin Jakop hrinsor vialte kha “Israel miphun” tiah auh an si. Jakop nih tefa tampi a von ngeih hna tikah Israel timi hi pumpaak (Jakop) min sinaak in Jakop hrinsormi miphun min sinaak ah ai tthial. Atawinaak in chim ahcun Exodus cauk in Solomon a thih tiang kha Jakop fale vialte hi Israel miphun tiah auh a rak si.

3. JAKOP FALE NIH A COMI RAM I A MIN ASI FAWN
Pathian nih Abraham, Isak le Jakop sinah peek dingin bia a kamhmi Kanaan ram cu Joshua chan lanwglawng ah anmah ram ah ai cang kho. Cu hlan ahcun Kanaan miphun hna ram a rak si. Joshua nih a laak dih hnu lawnglawng in Jacob tefa hna ram ah ai cang hi cu ram cu “Israel” tiah auh asi. Cucaah Israel timi hi miphun min lawng si lo in ram min zong asi ve.

4. CHAKLEI PENNAAK RAM LAWNG KHA ISRAEL A RAK SI
Solomon a thih hnu in Israel ram cu a fale pahnih nih cheuhnih ah an rak cheu. Thlanglei pennaak kha Judah ti a rak si i an khuapi cem cu Jeruslem a rak si. Chaklei pennaak kha Israel ti a rak si i a khuapi cem cu Samaria asi. Cucaah chaklei pennaak le thlanglei pennak ti in ram an tthen ri in Balylone sal in a tlun tthan tiang kha Israel timi biafang nih a chim duhmi cu Israel miphun hna vialte kha si loin, Jakop fale nih an comi ram vialte zong si loin, an ram ai tthenmi i chaklei pennaak lawng kha a sawh duhmi le a chim duhmi cu asi. “Israel” timi biafang nih a miphun ram a zapii tein a huap lo. Chaklei pennaak ram i a min lawng kha a rak si.

5. AN RAM LE AN MIPHUN ZAAPI HUAP IN ISRAEL ASI TTHAN
Babylone sal i an tan hnu in Jesuh chan tiang cu sal ah chan khat hnu chan kaht an rak taang lengmang. Ram khat hnu ram khat nih an rak uk lengmang hna. Balylone sal i an tan hnu in acheu nih “Judah miphun” (Jews) an ti hna i a cheu nih “Israel mi” tiah an auh hna. Biakam thar zong ah an miphun min he an ram min he “Israel” ti a rak si. Asinain Israel ram cu “peng” in an rak tthen hna i Judea Peng, Galilee Peng, Peria Peng, Decapolis Peng, Samaria Peng ti in a rak um.

6. NIHIN AH AN RAM MIN
Nihin ahcun Israel ram i an va um zong um lo zongah Jakop hrinsormi fale pawl poh cu Judahmi (Jews) ti an si i an ram min kha Israel ti asi. Atu ahcun Israel ram chung zongah miphun dang tampi an um ve i rammi sinaak zong kha an ngeih ve cang. Mizo kan unau cheukhat hna zong nih Israelmiphun kan si an ti i an ram ah an um ve cang. Cucaah “Israel rammi” timi nih hin Israel i rammi sinaak a ngeimi minung poh kha a sawh cang i “Jews” timi tu nih hincun Jakop hrinsor bak kha a sawhmi asi. Israel ram i a ummi minung poh Judahmi (Jews) an si dih lo, Israel rammi tu cu an si fawn.

Be First to Comment

Leave a Reply

Your email address will not be published.