Press "Enter" to skip to content

Babilon Tiva Kam Ah Hi Hla In Ramchung Um Chin Mi Nih Ramleng Um Chin Miphun Unau Kan In Klam Hna (+Video)

Babilon Tiva Kam Ah Hi hla in ramchung um Chin mi nih ramleng um Chin miphun unau kan in hlam hna. Kan in ngai hna.Nanmah zong nih kan ram te ah kir in hmun khat ah rawl purhti le saduhthah biaphai ti nan duh theo lai.CNLD nih “Miphun Covo kan lak than lai” kan timi cu zeidah a si. Panglong biahrennak ah Kawl nih Kawl, Chin nih Chin, Shan nih Shan, Kachin nih Kachin tiin mahte in i uk cio ding timi kha a si. Mah kan biakamnak cu a tlamtlin lo caah kum 70 renglo ramchung raldohnak a chuak. Kan ram a rawk in U Nu chan ah Asia ram ah ramthawng bik, ram rum bik sinak in siifak bik ah kan i chuah. Ahrampi cu ral ruang ah. Ral a chuahnak hrampi cu miphun dang nih tlangcung mi covo an buar caah le Panglong biahren a tlam a tlin lo caah a si. Cucaah CNLD nih Panglong hnatlaknak ning in kan “Covo Kan Khirh Than U” tiah miphun caah kan dir hi a si.

Ramleng ummi Chin miphun zalongte in kan ram nan kir khawhnak caah Nay Pyi Taw pa va hal lo in kanmah te in khuakhan khawh kan duh.Ramleng ummi nih kan ram ah University an sak khawhnak, Airport sak khawhnak, fim nan kan chimh khawhnak caah Nay Pyi Taw pa hal hau lo in kanmah te in tuahnak nawl kan duh.Nay Pyi Taw pa nih ramchung thil chuak, ngunkhuai in hmuh mi tangka, Japan, Australia, World Bank tbk, … tangka a cawimi phawt chom in kan ram thanchonak tuah si lo in, Chin mi nih kanmah te in nawl ngeih in thancho tuahnak nawl, lairelnak nawl kan mah kut ah um seh, nawlngeinak le tawlrelnak nawl kan covo kha kan duh.

Kan miphun kong ah midang Bochan lo in kanmah te in ser ve kan duh. Pathian nih miphun tling ah a kan ser. Cawisan ding ah tuanvo kan ngei.Cucaah aralaimi November 8 ah Kawl nih Kawl Party thim seh, Chin nih Chin Party thim ve seh. Shan nih Shan, Karen nih Karen, Kachin nih Kachin tiin mah le miphun Party cio i thim hna usih.Cuti kan i thim lawng ah Chin nih Chin aiawh in kan ram sersiam thannak caah Parliament ah miphun dang he bia kan i ruahti lai, remdaihnak lamthluan ah bia kan i ruahti hna lai. Kanmah le miphun covo cio i upat in ramkomh cu kan ser than lai.

Panglong hnatlak bantuk in Chin nih Chin uk khawhnak caah Chin Party thim hram hna usih. Cu lawng ah Kawl he Shan he Kachin mah kanmah le kan duhmi cio bia kan i ruahti hna lai i, ramkomh Kawlram cu kan ser khawh lai. Panglong hnatlaknak tlamtlinter ding ah Kawl nih tuanvo a ngei i Chin nih kan ngei ve. Shan nih Kachin nih a ngei ve. Cu a tlamtlin nakhnga Mah le Miphun dirkamh cio hram hna usih! Source: Chin National League for Democracy – Hakha-Thantlang

Be First to Comment

Leave a Reply

Your email address will not be published. Required fields are marked *