Press "Enter" to skip to content

Bawipa Nih A Ca Thiang Cu A Humhim : Rialti Biakinn Kanghah Baibal A Kaanglo

Rialti Biakinn Kanghah Baibal A Kaanglo. Kawl ralhrang nih October 14.2021 chun ah an khanghmi (Falam,Lungpi veng) Rialti Biakinn cu a za te’n akaang nain Baibal cauk pahnih le hla cauk a kaanglo tiah theih asi. Photo:Michael Van

thawngpang dang relchap : Oct 27, Chun Hnu Thawngpang Biapi Deuh Hna

Shan Ramkulh Ah Tlangcung Hriamtlai TNLA Le RCSS An I Kap, Khuami An Thin Phang: Shan ramthen chaklei ,Kyaukmay ( ကျောက်မဲ ) peng chungah Kyu Shaw (ကြူရှော) khua pawngah tlangcung hriamtlaibu pakhat le pakhat an i kah caah khuachung inn cheukhat kuan nih a khen. Khuami hna cu thinphang le lungrethei in an um ko tiah theih a si.

October 27, 2021 zing suimilam 3:00 am hrawng in Kyu Shaw (ကြူရှော) khua pawng ah kahdohnak thawng cu kan theih i zing sml 8:00 hrawngah khuachung inn cheukhat kuan nih a khen. October 22 khan Kyaukmay ( ကျောက်မဲ) peng Pan Hone (ပန်းဟုန်း)khua le Pan Pyat (ပန်ဖြတ်)khua hna pawngah TNLA le RCSS hna hmaitonh kahnak a um i nifatin hriamngan le hriamhme kah thawng hna cu a pawngkam khua hna nih an theih.

TNLA le RCSS kahdohnak ruangahkhuami hna cu thinphan dai loin an um. Khua chuahtak in ramlak a himnak hmun i a zammi hna zong atu tiang khua ah an tlung ngam rih lo tiah Thachileik News Agency nih a tial.

Kawlin (ကောလင်း) PDF nih phungninglo in a lutmi thing phor kee 12 ngei motor an khangh: Sagaing ramthen, Kawlin peng mipi vengtu KLPDF nih phungninglo in thing a phormi kee 12 ngei motor cu meikhangh in an hrawh tiah October 27 ah KLPDF nih an langhter. Kawlin-PDF nih October 25 ni ah Kawlin peng Namaith(နမိတ်), Shwebo, Myitgyina lampi in phungninglo thing a phortu kee 12 ngei motor cu an tlaih i meikhangh in an hrawh.

Motor mawngtu cu an luatter. Hmailei ah phungninglo in fir, pawngkam rawhralnak a tuahtu hna cu KLPDF nih fak piin hmalaknak kan tuah lai, tutan thil a cangmi hi phungninglo thil tuahmi hna nih zohchunh ding in kan langhter, hmailei ah cun hinak fak in hmalaknak kan tuah cang lai tiah KLPDF nih cathanh an chuah mi cu Than Lwin Khet nih a langhter.

China-Myanmar Ramri Ah China Nih Ramri Lonh In Vanpaang A Khammi Cu Mipi Nih An Hrawhpiak: Shan ramkulh ni tlak lei, Chin-Myanmar ramri, Muse peng, Pankham(ပန်ခမ်း) khuafonh hmunhma chungah China nih ramri lonh in thirhri hling in an rak kulhmi cu khuami nih an hrawhpiak hna tiah theih a si.

Cuka khuami hna nih anmah ramchung a si mi cu a kan chuh thai sual lai tiah Kum 2021, Oct 25 ah khan an hrawhpiak hna i ramri an kan chuh nakhnga lo pehzulh in a si khawh chung kan cawlcang lai tiah khuami hna nih an chim.

China-Myanmar ramri paohpaoh ah China nih ramri khamnak a tuahmi kongah Myanmar ramleng vuancizung a liamcia August 31, kum 2021 ah khan tonbiaruahnak an tuah cang i, China-Myanmar ramri kongah lungtlinnak minsen thut cangmi cu fel tein zulh dingin biachahnak zong an tuah cang nain China cu nihin tiang ramri lonh in an cawlcang lengmang tiah Tachileik News Agency nih a tial.

Ralhrang Nih Tlaihmi Mino Pahnih, An Ruak In An Char Hna: Tanintharyi ramthen, Dawei peng chung Yiwaing ramhual kalnak lam( ရေဝိုင်းတောလမ်း ) ah ralhrangbu nih an tlaihmi mino pahnih cu a thaizing ah an ruak in char a si. Mino -2 hna cu Dawei khuapi, Utahyan(ဥတ္တရံ ) sang ummi Ko Htet Wai Naing (kum 22) le Ko Than Soe (kum 23) an si.

Cu mino pahnih hna cu zeiruangah dah ralhrang nih an tlaih hna i meithal in an kah hna ti a raung theih a si lo tiah an chungkhar hna nih an chim.

Khuami pakhat nih “An nih cu mino an si bang zalong tein a um kal sawhsawhmi an si hna pinah buaibainak zongah an i tel bal lo. Zeiruangah dah tlaih an ton i an nunnak tiang an lakmi hna kongah kan lung a fak ko. An ruak cu Dawei sii-inn pi ah kan laak cang hna tiah” tiah a chim.

Mandalay Kah- Nya – Nah (ကညန ) Zunghmai Ah Bomb Puak, Cycle 10 hrawng Kang: Madalay, Mahar Aung May ( မဟာအောင်မြေ) peng tetpan lam (သိပ္ပံလမ်း) kam ah a ummi tlanglam phurhthiarnak nawlngeitu (ကုန်းလမ်းပို့ဆောင်ရေးညွှန်ကြားမှုဦးစီးဌာန), Kah- Nya – Nah ( ကညန) zunghmai ah Oct 27, tuzing suimilam 11:00am hrawngah pehtlai in bomb voihnih a puak. Bomb a puakmi nih mawtaw saikel 10 leng a kangh hna tiah theih a si. Minung hliam a tuarmi zong an um.

Cu puahkehnak cu Special Attacking Force-SAF (Upper Burma) nih kanmah tuahmi a si tiah puahkehnak a chuah hnu tlawmpal ah cathanh an chuah colh. SAF cathanh ah cun mipi thahnak ding kuanfang hna cawknak dingah ralhrangbu nih tangka an laknak lam chah piak kan duh caah atu bantukin kan tuahmi a si i mipi nih hliam kan tuar lonak dingah ralhrang le anmah lei minung cu hrial cio dingah an langhter.

A voikhatnak a puah ahhin minung pali hliam an tuar i a voihnihnak a puah ah minung pakua hliam an tuar than tiah Maha Aungmay sang uktu upa pakhat nih a chim. Hliam a tuarmi tam deuh cu an saikel licence peh dingin aa tlarmi an si. Puahkehnak ruangah mawtaw saikel 14 an kang i a rawk dih tiah meithatzung nih an thanh.

Mandalay Kah-nya-nah zung cu covid zawtnak ruangah 2020, December 5 khan caan karlak khar a si mawtaw le mawtaw saikel licence peh a duhmi hna caah tiin tukum May 1 khan ralhrangbu nih an on thanmi a si. Cuti an on hnu July, August le September ah bomb puahkehnak a um cang. Tutan hi a voilinak a si tiah The Irrawaddy nih a laughter.

Tamu Khuapi Electric Zung Le Biaceih Zungah Bomd Voihnih A Puak: Sagaing ramthen, India ramri ah a ummi Tamu khuapi i peng electric zung le biaceih zung ah Oct 27, tuzing ah bomb voihnih a puak tiah theih a si.

Zinglei suimilam 4 ah peng electric zungah a puak i zinglei suimilam 8 ah pengkomh biaceih zung ah a puak than tiah khuami nih an chim.

Khuami pakhat nih cun “Electric zung le biaceih zung hi naih teah a ummi an si. Electric zung hi mei man an kholh lengmang ruangah an puahhnawhmi a si lai. Zung a rawkmi a um len. Minung hliamtuar cu an um lo. Bomb a puah hnu zongah runvennak tha deuh in an tuah hlei lo” tiah a chim.

Be First to Comment

Leave a Reply

Your email address will not be published. Required fields are marked *