Biden 100 Days Plan le Coronavirus Rescue Plan

Biden 100 Days Plan le Coronavirus Rescue Plan
**************************************************
President Elect Joe Biden nih Coronavirus ruangah harnak a tongmi hna chanh chuahnak caah $1.9 trillion hmang in timhlamhnak a ngeihmi cu a thanh cang bantuk in a tawifiannak in ka rak tial lai. Mah plan hi ni 100 chungah cun a tuanchuah khawh lai tiah zumh a si. Georgia Senator thim tharmi democrats palai pahnih Certified an tuah hnu ah an fehter colh dingmi plan pawl zong a tel chih.

1. Stimulus Check $1400 ngah than a si lai. Second Stimulus Check $600 he fonh chih in $2000 tiah an ti. Asinain tuan deuh ahcun Biden nih a dang tein $2000 ti phun in a chim nain President an thim hnu ah a bia a dang deuhmi a lo. Zatlak sa hei ti ko usih 🙂 Hi hnu kum 15-20 hrawng i Retired, Pension lami caah phaisa thoh ding a um te men lai lo. Tuan deuh i $600 pek lio ahcun kum 17 a chunglei dependent pawl kha $600 ngah a si lo, asinain tutan ahcun $ 1400 hi an ngah le ngah lo ding a fiang rih na loin an ngah men lai tiah zumh a si. A rauh hlan ah a dikdiar in a chuak lai i kan theih than te lai.

2. Biden plan ahcun Unemployment Benefit kha zarh khat ah $400 pek ding ti a si. Second Stimulus ahcun zarh khat ah $300 pek a si i, pek caan kha March thla 2021 tiang lawng a si. Asinain atu Biden plan ahcun zarh khat ah $400 a si lai i, September thla tiang ngah khawh a si lai. Biana ah punghman i $200 a ngah tawnmi nan si ahcun atu an pek dingmi $400 he fonh chih ahcun zarh khat ah $600 lengmang September thla tiang na ngah lai tinak a si. [ Rian luh than a duh lomi an tam chin kho men.

3. Federal Minimum Wage cu sumilam pakhat ah $15 in karhter a si lai. Atu lio Federal Minimum Wage cu $ 7.25 a si. Asinain New York, Washington D.C tibantuk le a cheukhat state ahcun state cozah nih minimum wage hi $15 tiang a pe cangmi an um. State cheukhat ah mininum wage $15 a phan rih lomi nan um ahcun atu tan plan ah fehter hnu ahcun $15 ngah cio a si cang lai. [ Mah nih hin small business pawl a tha te men hna lai.

4. Coronavirus ruangah Inn man mortgage a pek kho lomi, inn hlan man a pe kho lomi hna caah bawmhnak a um lai. Foreclosure le Eviction moratorium bawmhnak zong September thla tiang a caan an sauh rih lai. 5. State, County le City cozah bawmhnak pin ah sianginn le coronavirus testing caah bawmhnak le Coronavirus khamhnak si phawtzamhnak caah bawmhnak a te lai. [ Democrats pawl nih an penmi State le City cheu khat pawl bankruptcy an si dang caah an chanh chuahmi hna sidawh a si.

6. Kum dih 2020 caah, ngunkhuai tax nan file tik ah Child Tax Credit timi kha kum 6 in kum 17 karlak ngakchia pakhat caah $3000 na ngah khawh lai. Kum 6 a tling rih lomi ngakchia caah Child Tax Credit $3600 ngah khawh a si lai. 7. Small Business caah bawmhnak pek thawnmi PPP loan a si lomi Grant pekmi bawmhnak a um kho lai tiah zumh a si. A cung le plan paw hi House ahcun an pass ciami a si. Senate ah an chuahpi lai i, an pass le cangka Joe Biden nih minthut hnu ah fehter colh a si lai.

8. Second Stimulus Check $600 a ngah rih lomi nan um ahcun tax nan file tik ah recovery rebate credit ti in claim than khawh a si lai. Tax file an tuah piak tu kha nan chimh lai i, ngah than khawh a si lai. 9. Joe Biden President a si le cangka ni 100 chung Federal Cozah nih mask i hruk dih ding in a thanh lai. 10. President Trump nih Muslim ralhrang an tamnak ram tralvel ban a tuahmi, visa a phihmi ram pawl cu a on than hna lai. [ Muslim ralhrang US ah a lut chuak than khomi dirhmun kan phan kho.

11. President Donald Trump nih a rak chuah taakmi, Paris Climat Agreement ah a lut than lai. [ China, India le Russia nih zulh phung na zulh duh lo ruangah President Trump nih a rak chuah taakmi a si. 12. US ah phungning loin a rak lutmi million 11 renglo hna cu US citizen pek dingah congress nih an pass lai tiah zumh a si. [ Democrats pawl nih thimnak paoh i an tei khawhnak dingah Citizen an pek dingmi hna si lai ka zumh.

13 Siangngakchia hna nih sianginn kainak caah phaisa an cawi leiba Student Loan cu pek rih lo ding in a ngol ter hna lai. [ $10000 tiang cham ti lo ding in a pek khawh men ti a si. ]
14. World Health Organization [ WHO ] lut than ding in biachahnak atuah lai. [ WHO nih China lei a ttan hlei ah China nih phaisa a thawhmi a tlawm tuk caah President Trump nih a chuak taakmi a si.

15. Nu sinak le pa sinak a thlengmi pawl [ Trangender ] cu sianginn zun inn ah anmah duhning in pa zun nak le nu zunnak ah luh le chuah khawh a si lai. [ Kan fanu, fapa tete caah a him lo ngai cang lai. Ralrin ngaingai kan hau lai. 16. Canada ram Alberta province in US Nebraska tiang khan 1,200 a sau dingmi gas pipeline pi an cawh cuahmah liomi cu Joe Biden nih Executive Order hmang nih a ngolter hna lai. **Mi tam deuh nih an hgalh le an theih khawh ve nak hnga share cio khawh a si. Salai Lairamthang