Press "Enter" to skip to content

Billy Graham a Tunu: Biden tu Vote ka Pek Lai; Vote Hmuh Duh Ruangah Trump nih Kan Zumhnak Hijack Tuah a Kan Timh Cuahmah Cang

Billy Graham a Tunu: Biden tu Vote ka Pek Lai; Vote Hmuh Duh Ruangah Trump nih Kan Zumhnak Hijack Tuah a Kan Timh Cuahmah Cang
=============================================================================

“Pro-life (nunnak dirkamhnak) a kalpitu ka si ko nakin, President Trump nih vote hmuhduh ruangah kan zumhnak Hijack tuah ai timh cang caah, tutan election ah hin cun Biden hi ka vote cang lai,” tiin tleicia Rev. Billy Graham a tunu Jerushad Duford nih a chim.

Jesuh nun cawngin midang hi zeitindah ka biakchonh, ka zohkhenh hna lai, ti hi tleichia ka Pu Billy Graham nih ai nunpi mi a si. Cu ka Pu i a nuncan te cu kum ka tlin hnu in ka conh pengmi le ka cawn pengmi a si. Dingfeltein riantuan, velngeihnak te he midang dawt, toidor tein khuasaknak kong hi Cathiang nih a kan cawnpiakmi a si. Cu vialte cu kan zumhnak ai futnak a si i, kan President belte nih cun cu bantuk nunzia le zumhnak cu a pelte hmanh a langher in ka zum lo, tiah Duford nih a chim. Hringtu a nu hi Rev. Billy Graham le Ruth Graham i a fanu upabik Gigi Graham a si.

Trump ai thim thannak ralchanh dingin karhlannak a tuahtu Lincoln Project’s women coalition zongah cun Duford cu naite ah khan a lut lawlaw ve cang i, “Mikhamhtu ka kawl lo – Khamhtu cu kan i ngeih diam ko cang – kan President nih hin ka zumhnak hi ai hrawm khawh lai ka zum lo” tiin Duford nih a chim.

“Asinain, Trump nih vote hmuhduh ruang rumro i kan zumhnak Hijack tuah ai tim cuahmah ko nain, a tuahsernak le a ziaza kongah kan evangelical hruaitu pawl daitein an umter ko rihmi nih hin kan zumhnak hi muisam dangpi a kenter cang i, cucu a palh taktakmi thil a si i, minih Jesuh an hmuhning tiang zong hi faaktuk in a hrawh dih cang,” tiin Duford nih a chim.

“Ai seng tlailomi communities pawl Trump nih a tuahto ning hna le, nunau pawl zeiah a kan rello ning te hna hi khrihfabu cheukhat le evagelical hruaitu pawl nih an hmu, an thei na ko in daitein an i umter rihmi ka hmuh ko ah hin sual ka phawt hna nak khun hi a si. A tu bantuk i daitein an i umter mi nih hin minih kan zumhnak an hmuhning hi faaktuk in a hrawh, a chiatchuah cang,” tiin Duford nih a chim.

“Jesuh cawnpiaknak ai tlaihmi khrihfabu hna nih hin zeitindah Trump hi an dirkamh khawh hi a si,” tiin kan hnung thla hnih thum hrawnghrang i a ka halmi an tam ngai cang, tiah Duford nih a chim.

“Kan biakmi Jesuh nih hin zaangfahnak, dinfelnak, toidornak hna hi a kalpi zungzal. Hi President nih hin khrihfa kan zumhnak hi ai a awh lo. White House i kan hmuhmi pa a muisam hi Jesuh muisam a si lo i, kan zumhnak zong hi bang hin a si lo, ti hi vawleipi nih kan theihpi u law ka duh,” tiin Duford nih a chim.

“Nihin kan politics a dirhmun kongah thlaicia pa Pu zong a lung a rawk ve hrimhrim lai, tiah ka zumh. A ngaih a chia lai. Ka Pu i ai a duhbikmi hi policies thatha suaisam len hi a si theng lo. Mi vialte Jesuh leiah hruai hi a duhbikmi cu a si. Asinain, nihin kan cozah nih a chuahtermi i thenhmalank nih hin cu bantuk i midang Jesuh lei hruai dingin thazaang kan chuahmi vialte cu a chiatchuah ngaingai cang,” tiin Duford nih a chim.

“Naithlaknak (abortion) kongah hin cun Democrats pawl nih hin nunau kan nauinn chung i a ummi nunnak thaw hi faakdeuh in vun sunhsak hna sehlaw ka duh hringhran ko. Cun Republicans pawl zong nih hin nunau kan nauinn lenglei ah a um cangmi nunnak thaw hi faakdeuh in vun sunghsak ve hna sehlaw ka duh. A pakhat deuh lawng i thlir riangmang in ‘keicu nunnak a dirpitu ka si’ tiin tlaang na tlir len awk a si lo,” tiin Duford nih a chim.

Duford i a khuaruahnak belte hi a sahlawh a si mi, Franklin Graham i a fanu, Cissie Graham Lunch he ai ralchanh ngai.

“America hi hnahchawlram ah ser dingin Biden-Harries nih an i ngeihmi chunmang an ngeihmi hi zumhnak ai tlaihmi kannih caah hmunhma a um lo. Cucaah, zumhnak ai tlaihmi paoh nih cun Trump a cozah hi thanh ko hna u sih,” tiin Republican National Convention tuahnak hmun ah kum 34 a si mi Lynch nih a chim.

“Biden te nih hin cun Pathian maw, Caesar dah nai thim deuh lai, tiin duhthimnak an chuahpi te lai, zeicahtiah misual pawl (radical left) i an Pathian cu cozah nawlngeihnak hi a si. Cucaah, tleicia ka Pu Billy Graham bia bangin, politics zalonnak, ziaza zalonnak, biaknak zalonnak le American mipi kan nuhrin covo hi dirpi hna u sih law, cu vialte chuh a kan timtu hna hmaika ah a sungh khaan hrimhrim hna hlah u sih,” tiin Lynch nih a chim.

“Trump president i thim a si hnu lawngah hin White House ah khrihfa zumhnak ai a awhtu palai kan i ngeih hna i, cu hna nih cun First Amendment a uptu biaceihbawi pawl rian an pek ve chin hna. Hurduhcuainak (sexuality) kongah le nuva khuasaktinak (marriage) i khrihfa an pom ning he pehtlaiin biaceihzung i khrihfa pawl an chuah tikah hin phung (legal) ai tlaihmi pawl nih an namneet tawn hna. Cu ti i namneet a tongmi Khrihfa pawl cu Trump a cozah nih a dirkamh hna. Cun, mizeihmanh an zumhnak cio hranhram in ralchanhter hna lo dingin Trump a cozah nih biaknaklei ministry (religious Ministry – cozah) bia a bauh fawn hna,” tiin Lynch nih a chim.

“Ni kum i biaknak zalonnak a biapinak kong UN ah Trump nih a chimmi hrim kha ka thangthat ngaingai. Democrats pawl nih ka thawng daihter an i tim zungzal ko nain, America ah hin cun, biaknak ruangah taksa in hrem kan tuar hraw lo. Pulrai a tlun chung zongah kan sining zeitluk khulrang in dah ai thlen, ti cu kan hmuh cio mi a si. Khuhsi cakuak, zuu, zukhmuammi pawl an zuarnak dawr le nauhhrawhnak siinn pawl hi cu an “biapituk” le on ding an si, tiin Democrats nih an chim i, biakinn i i pumhkhomh vial cu khap dih an i tim. Asinain, zei hi dah a “biapitukmi” a si, ti nan thei maw? Zalongtein Pathian biak le kan nunnak a zawnkakip ah kan zumhnak i nunpi hi a biapitukmi cu a si ko cu,” tiin Lynch nih a chim.

Franklin Graham le Anne Graham Lotz telhchih in, Bill Graham a tefa dang belte nih cun Trump hi zapi theih in an dirkamh. Trump dirkamhnak kongah vunrang evangelical pawl karlak ah thenhmalnak a um ngai ko nain, Pew Research Center nih kan hnung thla i poll a lakmi zoh tikah, vunrang evangelicals vialte lakin 82% nih cun Trump hi vote pek an i tim hna, ti a si. Chelsea Bawi

Source; The Christian Post

Be First to Comment

Leave a Reply

Your email address will not be published. Required fields are marked *