Chin ramkulh, Matupi ah kumdang nakin dinding ti a har tuk caah rawlchuannak ti an i pha zo lo, tiah theih a si. Matupi khua mi pakhat nih, “Cheukhat sang hoi hna cu zarhkhat ah voi khat lawng ti a ra. Cheukhat sang ah cun voi thum hrawng a ra.
A luancia caan ah Matupi khua cu ti a har tuk caah mawṭaw in ti an zuar. Atu cu mawṭaw in zuar a ngah ti lo, Lemyo(လည်မြို) tiva va ṭum i tikholh zong ngah ti lo. Ei-din awk ti hmanh a har tuk cang. A ruang cu ti kan laknak hmun ah SAC ralkap Khah Lah Yah 304 Battalion nih, ning cang loin an hman caah a si,” tiah a chim.
Cu leng ah Ṭhal a si i ti a har khun. Ti ser kal hmanh ah duh poh in va kal sianh a si lo. SAC ralkap pawl va nawl ta an hau i, a har tuk. Matupi ah mah pumpak in ti a la mi; cozah ti le biaknak lei ti lawng a ngah i, atu hi cu cozah ti le biaknak lei nih an lak mi ti lawng an ding, tiah theih a si. Crd; The Chin Post
Kayin ramkulh, Demoso le Pharusu peng, April thladonghlei zarhkhat chung kahdohnak ah SAC ralkap 24 an thi i, Loikaw peng Lawpihta(လောပိတ) hmunhma ah security hngaktu palik 8 cu an hriamthil le tlaih an si, tiah KNDF nih an thanh.
Demoso pengchung April thladonghnak zarhchung ah SAC ralkap le Kyinni hriamtlai phufonh hna cu nifatin ngawt in an i kap i, Dawkhami(ဒေါခမီး) kahdohnak ah KNDF in minung 2 an nunnak a liam, tiah theih a si. SAC ralkap nih Pharusu peng Thalay(ထားလဲ) in Bawlakhe (ဘောလခဲ) peng Nanphe(နန်းဖဲ) lei ah rallam an sial khawh nakhnga Shan ramkulh chaklei Pinlawng(ပင်လောင်း) peng in Kayinni ramkulh lei ah SAC ralkap motor ruun 30 tluk in minung thazaang an chap, tiah KNDF nih an chim.
April 29, Lawpihta(လောပိတ) hmunhma ah security hngaktu palik hna cu KA le KNDF nih a thli tein an luhhnawh hna i palik 8 cu an hriamthil he an tlaih hna. Tlaih a tong mi hna cu Kayinni ramkulh palik department (KSP) ah an kuat hna, tiah theih a si. Demoso peng Kungta(ကုန်းသာ), Dawngankha (ဒေါငံခါး) le Khohpalawt(ခေါက်ပလော့) sang ah umhmun khua mi SAC ralkap hna cu Kayinni ralkap phufonh nih an kah hna caah nihin tiang kahdohnak a chuak peng rih, tiah KNDF nih an thanh.
Relchap; Falam Khua Kam Ah Bomb Phum Mi Lamh Sual Ruangah Mino Pakhat A Kut Le Ke A Bul!: Chin ramkulh, Falam khua kam, Rih lam pawng ah May 1 zanlei sml 2:30 hrawng ah mino pakhat cu bomb aa lamh sual caah a kut le ke a bul, tiah theih a si. Falam in Laimual khua ah Volleyball bengh ruah ah a kal mi mino hna cu,
Rih lamṭhen in Furlong 2 aa hlatnak ah Salai Mawng Lian Thang, kum 18 cu bomb aa lamh sual, tiah theih a si. Salai Mawng Lian Thang cu Falam Sii-inn ah an ratpi i a kehlei kut le a kehlei ke cu tan a hau lai, tiah Sii-inn ṭuanvo ngeitu pakhat nih a chim. Amah he kalṭi mi nu pakhat cu aa hliam lo, tiah theih a si.
Salai Mawng Lian Thang cu thi laang(unit) 3 an rawnh i May 1 zan ah Operation an tuah lai, tiah theih a si. Bomb hi mizei nih dah an phum ti cu hngalh a si lo. Crd; The Chin Post
Min Aung Hliang hruai mi SAC ralkap nih nawlngeihnak an laak hnu in Myamar ramchung hmunkip ah kumtling lo ngakchia 243 an thah cang hna, tiah Media Monitor Collective nih cathanh a chuah. SAC ralkap nih kahdohnak chung ah mizapi umnak hmun le khua hna cu i sel in kahdohnak an tuah caah kumtling lo ngakchia 131 hliam an tuar i, minung 251 cu a ruang um lo in an tlaih hna, tiah theih a si.
Cu SAC ralkap hna nih an thah mi le an tlaih mi hna ngakchia cazin ah sianginn kai lio siangngakchia le University a kai lio mi hna zong an i tel, tiah theih a si. Ngakchia an tlaih mi hna cu an thah hna leng ah tlaih tong mi ngakchia hna chung in lam hmuhsaktu ah minung 104 an hman hna.
Duhlonak lamzawh ruangah an tlaih mi 65 a si i, khuate lei an luhnak ah an tlaih mi minung 38, EROS he an i pehtlai tiah lunghrinh in tlaih mi 3, ralzaamnak ah an tlaih mi 3, khualeng zaamnak ah an tlaih mi 2 hna an si, tiah theih a si.
Be First to Comment