Breaking News: Zahan Zantim Hnu Ah Palik An Chuak I Mipi Lak Ah A Pehpeh In Meithal Zun 50 An Puah Thluahmah Ko (+Video)
February 17, zaan nazi 8 hrawngah Mandalay palik nih CDM i ai tel ve mi tlangleng zung riantuan pawl umnak hmun an kulh i meithal zuun 50 hrawng an va puah hnawh hna tiah theih a si. “Palik an ra ti kan theih bak in bumbel kan tum thluahmah ve. Cuhnu ah cun palik nih cun a rualrual inn meithal voi 50 hrawng an puah chih thluahmah. Ai hliam mi minung cu an um kan theih i mithi an um le um lo cu tutiang ah cun kan thei rih loh” tiah tlangleng zung riantuan pawl umnak pawng i minung pakhat nih MND media sinah a chim.
Mandalay tlangleng zung i riantuan mi tamdeuh cu ralkap uknak doh in CDM cawlcangh nak ah an i tel i riantuan an mak mi nih nih rampi a hrawh tuk sual lai tiin ralkap cozah nih cun an rian awt than dingin biatak tein an nor hna. Ralkap cozah nih awka in an ti khawh ti hna lo ruang ah tu bantuk in hriamhrei/meithal hmangin Mandalay palik pawl an cawlcangh ter mi hna hi a si.
Hi kong he pehtlai in min chim a duh lo mi, Mandalay i a um mi mipakhat nih “chun ahcun mipi hi in ah kan i benh i duhning in pallik pawll an cawlcang ngam loh. Sinain zan ah ai chawkvak thang an si tik ah kan zumh bantuk in zan ah an caalcang taktak.
“Palik an ra ti kan thei bak in ralrin pek nak ding caah bumbel cu heh tiah kan tum chih len ve. Cu lio tak ah palik nih a rualrual in meithal an van puah tik ah cun mipi cu kan thintur bu bak in a him nak hmun ah kan i thup hna” a ti.
Mandalay tlangleng zung pawng 34/35 lam pawng i meithal an puah nak ah hriamhma tuar cu an um nain mithi an um le umlo cu theih fiang a si rih loh i tleihkhih mi an um le um lo zong biafiang theih a si rih loh.(MND)
Credit : Falam Online Media
