Press "Enter" to skip to content

By:Salai Lairam Thang’Senate Judiciary Committee Nih Amy Cone Barret An Fehter.

President Donald Trump nih US biaceihzung sangbik Supreme Court ah biaceihtu ah a thimmi Amy Coney Barret cu tuchun ah Republican Senate Judiciary committee hna nih thimfung an thlak I, President nih nomination tuahmi cu fehternak an tuah cang. Hmaizarh cacawn nikhat ni ah senator minung 100 nih senate ah thimfung an thlak than lai I, thimfung tam deuh in fehternak an tuah hnu ah, Supreme Court biaceihtu a si cang lai.

Tuchun Senate Judiciary committee thimnak cu democrats pawl an nuar caah democrats senator pawl thimfung an thla duh lo. Cucaah Republican lawng nih thimfung an thlak i, vote 12-0 in an fehter. Senate Judiciary committee ah hin Republican senator minung 12 le democrats senator minung 10 an um. Democrats pawl Senate ah mitlawm deuh an si pin ah kan sungh lai ti an theih caah an nuar.

Cu lawng si loin president thimnak result chuah hnu ah mipi duhning in kan kalpi lai tiah an ti. Asinain President Donald Trump le Republican party hna nih cun President cu kum 4 caah thimmi a si caah President nih a caan a ngeihmi chungah thimnak le nominate tuahnak nawl a ngei. US phunghram ning tein kan tuahmi a si an ti.

Supreme Court ah Amy Cone Barret an fehter hnu ahcun Supreme court ah conservative biaceihtu minung 6 le Liberal minung 3 an si cang lai. Cucaah Supreme Court biaceihhnak cu conservative pawl nih hi hnu kum 30 renglo an hip khawh cang lai caah zumtu khrihfa mi hna caah thawngtha taktak a si lai. Asinain zum lotu hna le liberal democrats pawl caah ngaichia taktak a si ve lai.

Democrats pawl nih Supreme court ah kan sung lai ti an theih le cang ka in 2020 US president thimnak ah President, Senate le House I teinak kan hmuh ahcun Supreme court cu court packing kan tuah lai” tiah an I hrocer. Court packing timi cu Supreme court I, biaceihtu minung 9 aummi kha minung tam deuh chap in minung 13 maw minung 15 tibantuk in karhter an duh.

Mah lawngah zumlo tu hna le Liberal pawl nih anmah duhmi biaceihtu kha hmunhma a ngei kho lai tiah an ruah. Asinain Republican pawl nih tuchun ah Democrats pawl nih court Packing an tuah khawh lonak dingah atu tein phung kan ser lai tiah an hrocer ve hna.

Be First to Comment

Leave a Reply

Your email address will not be published. Required fields are marked *