Press "Enter" to skip to content

CDF-Mindat Le Ralhrang Karah Kahdohnak Fak A Chuak Tthan

November 4 Mindat ah i kah nak hmun hnih ah a cang, atu zawng an i kap liopi asi. Zinglei 8:00AM ah Mindat khuapi in nitlak lei Mindat-Matupi lam meng 6 le Meng 9 hrawng ah an i kap. Hriamngan hmang in Ralhrang nih an kah hna.

Mindat-Matupi lam Mengtung 43 ah zaanlei 2:00PM hrawng ah an i kap. Matupi in a rak ttum mi tank pahnih le Raldonak motor hna cu a hnuhmai in CDF-Mindat nih an kah hna. Hliamhma a pu mi an um le um lo theih asi rih lo. CDF-Mindat caah thlacam bawm hna uh sih.

Relchap; Kawl ralkap nih Loilone tlang bo 1228 tiah an timi Mu Bum tlang hi khuasik thla ah cun ti zong khal dih tiang in a kikmi tlang a si i China le Burma ram an i tonnak a si. Kawl ralkap hi 1991 kum lio te khan Mu Bum tlang ah hin umhmun an rak khuar.Kahdaihnak tuah lio caan ah khan Mu Bum tlang ah a ummi Kawl ralkap pawl riahcaw chanh le ralkap thlennawn tik ah Loije khua hi pal hrim hrim a hau. Lwe Je khua hi KIA kutchung um a si ca ah KIA hnatlaknak he lawng luhchuah khawh a si.

2011 kum June thla hnu kahdohnak a fah hnu cu Kawl ralkap pawl nih KIA hmunhma pal khawh a si ti lo. Cu tik ah, Loije in China ram chung ah an lut i Ya Ling, Cian Phung, Nawng An khua hna hel hnu ah China ram leikap i a ummi Mu Bum tlanghram ah si ai le riahcaw hna cu zan caan ah an hei chanh tawn hna.

Cu ti i a thlithup in thil an tuahmi cu China ram lei i a ummi Kachin khuami hna nih an theih tik ah zan ah lam an kham i mawṭaw lutchuak an hlathlai tik ah China ram lei in Mu Bum ralbuuk ah riahcaw chanhnak a vun har.

 

Cu caah, Mu Bum ah umhmun a khuarmi Khah Mah Yah 321 Kawl ralkap pawl cu si ai le riahcaw an dong. Loije khua ah umhmun a khuarmi battalion he phone he lawng an i pehtlai kho cang. Mu Bum tlanghram thluangthluan ah KIA ralkap pawl nih hmunhma an lak caah voi dang bantuk in zalong tein cawlcanghnak a har. Kawl ralkap pa nga ruk te khi mitchinh kamseh in ramlak ah rawl an kawl.

Mu Bum tlang he aa naihbik Kachin khuate hi Hkai Bang khua a si i Mu Bum tlang in suimilam 2 leng ke in kal a hau. Chuk ṭum le cho kai lawngte a si. Hkai Bang khuami hna hi Mu Bum tlang hram hrawnghrang ah hin tlang lo an thlo. Fungvoi lo an tuah.

Liam cia kum 10, 2011 kum Octorber 28 ah khan Hkai Bang khuami Slg Maru Ze Dau (kum 70) cu a fapa Slg Maru Dau Lum le a fapa nupi Sumlut Roi Ja (kum 28) hna he Fungvoi lo ah Fungvoi an boh. Cu lio thengte ah cun Mu Bum ralbuuk in rawl kawl ah a vakmi Khah Mah Yah ralkap 6 cu lakhruak in an hung pawt i khuami 3 hna cu meithal in an hmuah hna i vawlei ah an bawh ter hna.

Khuami hna bohmi Fungvoi pawl cu Kawl ralkap pawl nih buri le ruksai khat tittet in an i sanh. KIA theih lai an phan caah a rianrannak in Fungvoi tun pawl cu an i phorh i an ralbuuk ah an kir. Khuami 3 hna zong cu Fungvoi tun an phorh ter ve hna i Kawl ralkap pawl nih cun karlak thlak in an kalpi hna.

Khuami hna hi hram hram lo in thil an phorh ter hna lawng si lo in KIA nih an kah sual hna ah cun ralhmai terh ding ah an kalpi hna. Khuami 3 hna cu thil rit phorh bu in cho chia an kai. Caan rem a um cangka tlik ding in mithmai an i hmuhsak hna.

Zanlei pafa hmel palh hrawng ah khin lam kilkawi an phan i Maru Dau Lum nih a mit a ṭheh hna i cheng palang ah an zuang hna. Meithal zun 4 hrawng a puak. Sumlut Roi Ja hi a tli kho lo i Kawl ralkap pawl nih an rak tlaih ti hi pafa hna nih khua an phak hnu lawng ah an theih. Khua an phak ah cun zan ṭim a si cang. Maru Ze Dau le a fapa Maru Dau Lum lawng an him.

A thaizing ah khuami hna he an i bawm i Kawl ralkap pawl kalnak cho thluangthluan ah Sumlut Roi Ja cu an kawl. Ramlak chung ah an au i an kawl. Ni 4 chung hrawng an kawl nain an hmu hlei lo. Cu caah, Mu Bum ralbuuk he meng 1 hrawng aa hlatnak tlangbo ah an kai i ralbuuk cu lam hlat zohnak durbing he an bawh.

Ni 2-nak ah ralbuuk i deu pakhat chung in Sum Lut Roi Ja aa hrukmi angki muici hruk in nu pakhat a hung chuah khi an hmuh. A hmai fiang tein an hliah kho lo nain cu minu cu Hkai Bang khua lei hoih in a dir khi an hmuh. A roh hlan ah Kawl ralkap pakhat a hung pawt i deu chung ah a luhpi khi an hei hmuh. Khuami hna nih hin ni fatin ti awk in durbing in an bih lengmang. Ni fatin ti awk in cu minu cu ralbuuk chung ah cun a dir i khua lei a cuanh cu an hmuh lengmang.

Khua chel ah cun minu cu Kawl ralkap pawl nih an rawt i aa chan khi an hmuh. A hnu ah cun a thil aa thleng (ralkap thilthuam a si men lai). Voi dang tawn bantuk in Hkai Bang khua lei cu a cuan lengmang ko. Zarh khat hnu hrawng ah khin durbing chung i minu muithlam cu a tlau. An hngah len zong ah an hmu ṭhan ti lo.

Sumlut Roi Ja a tlaunak konglam hi ram dang thawngzamhnak zong nih an hun chimphuan. A chungkhar pawl he tonbiaruahnak tuahmi zong TV thawngthanhnak ah an hun zamh. Ramchung thawnghlattu pawl zong nih Sumlut Roi Ja tlaunak kong biahalnak an tuah. Kawl ralbawi pawl nih, Mu Bum ralbuuk ah cu bantuk thil dangdai a um lo tiah an al hna (Vawleipi theih a hung si tik ah Kawl rakbuuk i Sumlut Roi Ja hi an hloh a si lai tiah zapi nih an zumh).

Kachin CSO pawl le Sih Ni pawl bomhnak in Sumlut Roi Ja a vapa nih hin Sumlut Roi Ja tlaunak kong ah hlathlainak tuah piak ding in biacaih zung a dot dot ah ca a ṭial nain Kawl ralkap nih cun pheh thlorh in an i pheh. Sumlut Roi Ja kong cu a si taktak le si taktak lo hlathlainak kan tuah piak hna lai tiah Kawl ralkap Bu Hmu pakhat hi China ramlei in a kal i Mu Bum ralbuuk cu a hlathlai bantuk in aa um ter. Tehte a ummi vialte a hloh dih.

Sumlut Roi Ja a tlaimi Kawl ralkap pawl kha China ram lei in a chuahpi hna i ralkap dang he a tlennawn hna. Mu Bum ralbuuk ah thil sual tuahmi a um lo tiah Bu Hmu nih cun cunglei ah a langh ter. Cu tik ah, Sumlut Roi Ja tlaunak kong hlathlai piak ding in biacaih zung i caṭialmi kha let ṭhan ding in an hnek. Ṭat Ma Daw limhang zorternak upadi in tazacuai ding in Ṭat Ma Daw nih kar a hlan caah Sumlut Roi Ja kong cu cu vial cun a taap.

A tlaumi Sumlut Roi Ja nih hin kum 1 ṭhi [fanute] a ngeih. A tu cu kum 11 a tling cang. A pi zohkhenhnak tang ah har ngai in a ṭhangmi ngakchia nih hin hringtu a nu cu a kawl i a hal lengmang ko hna. Caan a zat tik ah cun hringtu a nu tlaunak [lungfak]fihnung sining kong hi a [fanu] nih a theih ve hrim hrim a herh.

A chungkhar pawl zong nih zanlei nitlak lai poh ah cun Mu Bum tlang lei ah sian lo bu le lungkuai bu in an cuan lengmang rih ko. A tu ah cun Mu Bum tlang ah Kawl ralbuuk an um ti lo. KIA nih lam an phihmi hna an celh ti lo i an buuk cu an kaltaak cang.

Khah Mah Yah 321 ralkap pawl nih an tlaih i an i ṭhennak hi 2021 kum October 28 ah cun kum 10 khengte a tling cang nain Kachin miphun hna nih cun hi lungfah ngaihchiatnak hi nizan tihni te i a cangmi thil bantuk in an ruah lengmang rih ko. An lung a fak lengmang rih ko. Lung si lo in an um lengmang rih ko. Sumlut Roi Ja hi an ngai leng mang rih ko.

Khuami hna chimning ah cun, Minmei a thian zawn chun caan ah khin minung umtilonak Mu Bum tlangpar i ralbuuk hlun ah khin minu pakhat bantuk an hmuh ṭheo tawn. Sumlut Roi Ja hmuh ṭhan lai aa ruahchan rihmi khuami hna nih an i hmuh palh hoi hna a si hnga maw ti cu chim awk a ṭha lo.

Mu Bum tlang ramlak ah vak in si ai sernak ah thinghram a kawlmi khuami hna zong nih, lam hlat hmung king ah khin a ik lengmangmi minu ṭah thawng an theih tawn i khua chel ah cun hla sak thawng te zong khi an theih tawn tiah an chim.

Khua caan i thleng ko hmanh seh ruru hranghrang ziaza ah hram bunh in derhmi le lungput a chiakhami Kawl ralkap pawl kut ah a ruhro te hmanh hmu kho lo in a tlaumi Sumlut Roi Ja thlarau hi thil dik a langhnak hnga tiah lung si lo ngai in Mu Bum tlangtlhuan ah a ṭap leng mang rih ko.

(Hi ca hi Maru Na Li Shawng nih 28/10/2021 ni ah fb ah a tarmi a si. Kachin ka hawinu hnatlaknak in Lai ca in ka hun lehmi a si. Tuan deuh ah khan ka leh cang nain ka pa nih a kan kal taak ruang ah tuan ah ka tar kho lo. Pehtlaihnak ngai ngai cu a um lo nain, ka pa philhlonak ah ka hun tar. Youtube i an bia hi tlin deuh dawh a si. Na Li Shawng nih cun ‘fapa’ a ti nain youtube i Calvin McLeod bia ah cun ‘fanu’ tiah a langhter. A hmanthlak zoh tik ah fanu si dawh a si. Fanu le fapa hi cu holh lehnak ah lehsualmi a si ko lai dah). Crd#

Be First to Comment

Leave a Reply

Your email address will not be published.