Chin ramkulh, Matupi khua in a rak chuakmi SAC ralkap mawtaw thluan cu CDF-Mindat nih May 6 zinglei ah bom an puah hnawh hna i a thimi an tam nain a zat bel a fiang in theih a si lo tiah CDF-Mindat nih a thanh. “Tuni kahdohnak cu zinglei sml 8:30am in 9:00am tiang pehzulh in bom kan puah hnawh hna, a thimi an tam lai tiah kan ruahdamh, a fiang in kan thei kho rih lo. Kan hmanhmi bom 22 hrawng a puak lai, a puah dan an tha ngai.
SAC ralkap nih meng 40 ah a ummi khua cu an khangh, inn zeizah a kangh bel a fiang in kan thei rih lo, SAC ralkap mawtaw thluan cu meng 40 in an rak i thawh cang” tiah CDF-Mindat biachimnak nawl a ngeitu Salai Ha Om nih Yangon Khit Thit ah a chim. Matupi khua in a rak chuakmi SAC ralkap mawtaw thluan cu CDF-Matupi hmunhma chungah voi tampi kan kah hna i SAC ralkap 15 nak tlawm lo an thi tiah CDF-Matupi nih a thanh ve.
Tanks 2 a telmi SAC ralkap mawtaw thluan 70 cu ralkap thazang 300 hrawng he Matupi khua in Mindat lei ah April 27 ah an rak i thawh thanmi a si i May 7 ah meng 40 pawngkam hrawng an phak hi a si. Chin ramkulh, Hakha peng, Dokthek le Chunchung khua karlak ah SAC ralkap le CNA/CDF hna May 3 in May 5 tiang a cangmi kahdohnak ruangah mawtaw lam cungah a ummi Chunchung, Dokthek, Ramthlo, Tlangzaar le Taal khuami 4,000 leng in le lo kaltak in himnak hmun ah an zaam tiah theih a si.
“SAC ralkap pawl an rat bak in kan zaam cang, khua pawngah kahdohnak a can tikah kan tih tuk i ram tangah kan zaam. Khua kan zaamtak hnu tlawmpal ah kan inn pawl an khangh colh, ramtang in hmuh khawh a si” tiah khuami pakhat nih RFA ah a chim. SAC ralkap pawl nih an khangh ruangah Ramthlo khua May 4 ah inn 10, May 5 Tlangzaar khua ah inn 16 tiah a zapi te inn 26 a kaang tiah a chim.
Tulio caan hi Chinram ah ruah a sur tawn i ruah khamnak tel loin ramtang ah a zaammi hna caah harnak an tong tiah a khuami hna nih an chim. SAC ralkap nih thongtla 15 phor in mawtaw 27 le tanks 2 he Hakha khua in Kalay lei an kal lioah CNA, CDF phufonh nih an rak kah hna. Kahdohnak chungah SAC ralkap 18 an thi i, mipi hriamtlai minung 10 an nunnak a liam tiah theih a si.
Chin Affairs Federation cazin ning ahcun, SAC ralkap nih hramhram im uknak a lak hnu thok in Chin ramkulh ah a cangmi kahdohnak pawl ruangah khua 313 in khuami 100,000 leng nih inn le lo an zaamtak tiah theih a si. Cu chungah, 60,000 hi ram chungah an zaam i a taangmi 40,000 hi Mizoranm ah an zaam tiah theih a si.
Be First to Comment