Press "Enter" to skip to content

CDM Ah Aa tel mi Upa vialte upat kan pek hna: Ex. Minister Pu Mang Hen Dal

CDM ah aa tel mi vialte upat kan pek hna: Ex. Minister Pu Mang Hen Dal
==============================================================
Ralkap nih nawlngeihnak a lak hnu in nifatin thaba taktak in lam a zawh i Civil Disobedience Movement (CDM) ah aa tel mi nan dihlak upat kan pek hna tiah, Livestock, Forestry and Mines Minister hlun Pu Mang Hen Dal nih February 17 ah a chim.

β€œTampi chim ding ka ngei ko nain chim awk a tha ti lo. Asinain, CDM ah i tel in nihin tiang nan cawlcanghnak, nan thabaatnak, nan caan dihnak, nan chawva dihnak, nan retheihnak vialte ka hmuh tik ah kan upat hna i kan thangthat hna. A lawmh zong kan lawmh hna,” tiah Ex. Minister Pu Mang Hen Dal nih The Hakha Times ah a chim. Cun, Pu Mang Hen Dal nih a peh rih mi cu, β€œKannih kan umnak hi Wifi a tha lo. Zei thawng hmanh kan theih kho lo. Phone in i chawnh ceo hi kan ti khawh mi a si. Inn lengpar zong kan chuak kho fawn lo. Motor khaaltu pakhat le rawlchuangtu pakhat lawng kha mehhaang cawk ah leng an chuak kho. Ngandamnak lei zong ah kanmah lei nih siibawite kan auh hna lo bantuk in anmah lei zong nih an hung kan veh ve lem lo. Hitihin kan um sawhsawh ko,” ti zong a chim fawn.

Pu Mang Hen Dal cu Tedim NLD party in 2015 kum thimnak ah siseh, 2020 kum thimnak ah siseh, teinak a hmu mi a si. Hren an si ca ah zei tuah awk hngal loin inn chung ah an um sawhsawh cio hna. Chief Minister hlun, Hluttaw Speaker hlun, Deputy Speaker hlun, Sipin le Electric Minister hlun, La-Wa-Ka Minister hlun le Thimnak Zung tuanvo ngeitu hna cu Rungtlang Ralkap sakhaan (266) ah hren an si rih, tiah kan theih.

Crd: The Hakha Times

Be First to Comment

Leave a Reply

Your email address will not be published. Required fields are marked *