Press "Enter" to skip to content

CDM lawngcun ralkap doh a har cang lai, CRPH nih phundang deuh in khua akhan colh a herh (Rolian)

CDM lawngcun ralkap doh a har cang lai, CRPH nih phundang deuh in khua akhan colh a herh (Rolian)
====================================================================
Tutan hi CDM cawlcanghnak thazaang a van thawng i ralhrang ralkap thazaan zong khat lei cun a van thawng chin ve. Hriamnam ngei hrat cu vawlei in siti loin van in tuk hnik aa kan timh cang.

CDM nih zeitiang a nguh lai chim chung khawh a si lo. Athi mi milu cu akarh lei a si fawn cang. Nihin ni tiang a thi mi hna hi, kum upa an um tuk lo. Mino tete ramkheel zong a ruat tuk rih lo mi, hmailei kan ram caah keeng ruang le shut tung bantuk a site ding mi deuh in an nunnak a liam. A cheu hliam an tuar, pumtling lo dirhmun hna an phak sual ahcun an nih caah hi vawlei nun hi ahar tuk an ti sual te lai ruah lo awk a tha lo.

CDM cu pehzulh a herh, asinain CDM lawng in theipar taktak zun awk a um lai lo. UN le ramcang hna nih le anmah policies ning tein rian an tuan ve fawn lai. UN zong nih, ICC le ICJ biachah ning zoh hmasa in rian a tuan te hnga. ICC le ICJ cawlcangh ning zong nihin mipi nih kan duh ning hoih zulh lo in anmah rikhiah mi chung in an cawlcang lai. Cu hnu ah UN nih a tha a rem a ti ning in a hei cawl te hnga. Hi karlak caan ah nunnak zeizatdah adih rih lai i hliam tuar ruang ah pumtling lo dirhmun zeizat dah an um te hnga ruah ah ngaih a chia.

Atha bik tiah ka ruah mi cu, CRPH nih hin a rannak in tlangcung hriamtlai le mipi he khua khang colh hna seh, ramchung ral (civil war) hi van chuak lawlaw sehlaw kan lam caan atawi deuh hnga.CDM lawng cun, caan tampi a dih, phaisa thazaang a dih, nunnak tamtuk a liam manh, harnak tong le hliam tuar an kar manh tuk lai i a donghnak ahcun mipi kan lung a dawng sual te hnga maw ruah a herh ngai.

CRPH nih direct in UN lei lawng a chawnh mi hna hi a lam sideuh rua lo ee, Ramchung miphun tling he tan lakti ding kan tuanvo sersiam dih hnu ah tuah tuan i a pin lei ca tu khi UN lei hna ah lanhter ding asi hnga lo maw? ram inn pa si mi Asia ram nih le an kaa lawng in khua an khang, zumh awk an tha lo, nihin ni tiang ralhrang ralkap nih thil sual tuah an tih lonak hi Asia ram mi nih that hi in an thloh hna lo caah le kan ram buainak biapi ah an chiah lo caah nihin tiang thil sual an tuah ngam nak a si.

Cucaah ram mi nih raltha te lawlaw in civil war chuak lak in kan nor a herh. Ramchung mipi, Hriamtlai hna he kan tnti ahcun civil war a si hnga i UN zong leklak tiah aa hnawh ko lai. Civil war cu kar khat te lawng aa duh ti awk a si ko cang. Thil har tuk zong a si lo. Civil war a chuah hnu lawng ah hin kan lam caan a tawi bik lai, kan can hman ning a rang deuh lai, kan hlawh tlinnak lam zong a si deuh lai tiah ka ruah.

Crd: Ro Lian

RF: The Voice Of Democracy

Be First to Comment

Leave a Reply

Your email address will not be published. Required fields are marked *