Chin ramkulh, Falam peng, Thlanrawn khua pawng ah nihin February 28, zing sml 8:00 hrawng in SAC ralhrang le Chin ralkap bu fonh karlak kahdohnak a chuak, tiah kan theih. Kalay in Chin ram lei ah riahcaw chaan ding in a kalmi ralhrang mawṭaw 20 hrawng cu February 26 ah Falam ah an riak.
Falam an phanh hlan Kalay- Falam kar ah CDM-Siyin le CNDF nih bomb voihnih an puah hnawh hna. Nizaan February 27, zing in Falam in Hakha lei ah an kal i Falam khua Lungpi ah hriamngan le meithal an puah thluahmah i Biakinn chung ah an riak. “Ralhrang pawl cu Lungrang Baptist Biakinn chung ah an riak i lamkam inn poh an baoh pah thluahmah.
Dawr khan zong an bauh i thilri an lak hna, fiang tein kan chim kho lo nain inn 10 cu an bauh ko lai, tiah zumh a si. Tuzing ah ke in Thlanrawn lei ah an kal i mawṭaw nih duhsah tein a zulh hna,” tiah tualchungmi pakhat nih a chim. SAC ralhrang pawl nihcun Falam khua i an camp ah raltuknak tank pakhat an vai lak ṭhan i zahan zong ah Falam camp in mawṭaw pakhat in ralkap thazaang an chap, tiah kan theih.
“Nizaan ahkhan cun kan va kap hna lo, Tuzing belte ah padeta bomb pakhat in kan puahhnawh hna i kahdohnak tlawmpal a chuak,” tiah CNDF in chimphuannak nawlngeitu pakhat nih a chim. SAC ralhrang hi 200 hrawng an si i Falam le Hakha karlak lamkam khua- Lungpi, Thlanrawn, Ṭaal, Tlangzar le Ramthlo khua mi hna cu nizaan te khan a himnak ah an zaam cang, tiah theih a si. Credit: The Chin Post
Brazil President Bolsonaro Nih Ukraine President A Thangchiat!: Brazil President, Bolsonaro nih cun Russia phihkhar le dantat ding timi cu a cohlang duh lo i “Ukraine mipi nih an ram hmailei caah capo lemcang thiam simi pa an zumh” tiah a soisel hna. Brazil President Jair Bolsonaro nih cun Ukraine President Zelensky cu a soisel hnu ah Brazil nih Ukraine cung ah kap/ hrap ngei lo in ka dir i Russia cung ah dantatnak le phihkharnak ka tuah lai lo, tiah a chim.
Brazil cu Russia ram sin ah Non a la peng mi kan si caah Russia/Moscow phihkharnak ka tuah ahcun Brazil cinthlaknak tamtuk kan sungh lai caah Brazil caah a ṭha lo mi thil tuah kai tim lo, tiah a chim chih.
Cun, Brazil President Bolsonaro nihcun, “Ukraine rammi Russia nih a bubu in a thahnawn hna timi hi an perhhlei mi a si pin ah Russia lei ṭang mi Ukraine ramchung Luhanks le Donetsk ramṭhen hna dirpi in Russia nih a tuah mi cu a phung si ko, tiah Russia a dirpi. Brazil president Bolsonaro cu Russia president Putin he February 16 ah khan Moscow ah tonnak an rak ngei. Credit: The Chin Post
Be First to Comment