Press "Enter" to skip to content

Chinram tlangpar thlitu sin in tihnung thawng a ra lai, cu thawng nihcun thinphang le lungdong in a tuah hna lai I an I thek lai

Khi Tlangbo pinte ahkhin
=========
Kan tlangval tha le kan nungak tha hna upatnak sangbik kan pek hna. Pumrua le muisam ah a silo, ram le miphun ca nun aa siangmi hna, nan ttaam le nan baat kan hngalh ko. I hne ko rih u. A hla tilo. Khi tlangbo pinte ahkhin a si ko.

MAH hi Chinmi caah Goliath (1Sam.17) le Ahab (2Chan.18) bantuk a si. Siria siangpahrang (2Siang.7) le Assiria siangpahrang (2Siang.19) hna bang in a ralkap cu an tam. An hriamnam a tha. Kannih Chinmi tei ding ahcun a ngan in a thawng tuk hringhran. Sihmanhsehlaw a donghnak can amah nih aa ser cang. Thahding I hruaimi cawtum bantuk a si. Goliath, Ahab, Siria le Asiria hna bang in a rawhnak ding lam a zawh cuahmah lio. A hriamnam aa bochan.

Tluang a khawn hnawhmi le a sersatmi hi a hodah a si ti a hngallo. A zomhtaih mi hi Bawipa a si. A hriamnam nih, Goliath thirphaw bang, a khamh kho lailo. Bawipa nih Jerusalem cung ah serhsat tu Assiria thal tlak a sianglo. Anmah le anmah tu an I that dih. Ahab nih kaa thup kho lai tiah a rak ruah sual. Ruah sasailo in thlahmi thal nih a thirphaw nih a huh khawhlonak zawn a zak ah a khen I a tlu. Siria ralkap bu sin ah Bawipa nih thawng tihnung a thanter. An lau I an I thek dih.

Chinram tlangpar thlitu sin in tihnung thawng a ra lai, cu thawng nihcun thinphang le lungdong in a tuah hna lai I an I thek lai. Ka hmal cikcek lai tiah aa ruahmi Chinram hi amah dihdonghnak a si lai. Hitler nih Russia a rak luh hnawh, thukpi tiang a lut na in a chuak than kho tilo. Cu bantuk cu a si lai. Siangpahrang David hrawhnak ding ah Ahithophel khuakhan thiamnak cu Husai hmang in Bawipa nih a hrawh (2Sam.17) bang MAH fimchimtu hna khuakhan thiamnak cu thli nih a choih lai.

Kan miphun ralkap hna can tawite chung cu ba in ttam rih hmanh ulaw Bawipa nih teinak an pek hna lai. MAH hriamngan nih an hrawk hna lailo. David bang tlangval no mente hmanh silaw Goliath teinak caah chai na ngei. Na lung thawng ko. Vawleipi nih dawh an cuanh hih. Chin ralkap hna nih dahkaw Kawlram hi an rak khamh. Kawl nih an I theihter duhlo. Tutan ah tuanbia thar na tial than cang lai. Cucu thlau piak khawh a si ti lailo. Hi buainak hi na tuanbia tharchuah thannak caah a si. Tlolh sual hlah. A hab nih amah rawhnak pei aa ser. Goliath nih amah donghnak ding pei aa kawh!

Ramtha phan Chinmi vialte I hmuh terlo in um hlah u – Kan ram a tap lio. Tulio bawmhnak pek hi a loral dingmi a silo. Kan ram ca hramvurh (invest tuah) a si. Ram a that than tik ahcun chungkhar vialte bawmh an hau ti lailo. Cu ding ca thawhchung mi a si. Ram sernak ah na kut aa tel velo ahcun na ning a zak te lai.

Ralzam vialte lungthawng te in rak um u. Nan ttam, nan temtuar. Himnak kawlnak ca lawng sihlahseh. A rauhhlan ah a chuak dingmi ramthar NUN nan cawn chungnak caah siseh. Neih rak I hrawm u. Uktu umlo in, uk haulo in nawl rak ngai u. Fial le hnek haulo in thiltha tuah itim u. NUN cawnnak Harnak sianghleirun nan kai lio hih. Kan kokek tlangzamh nun hrawmnak, dingthlu lairel khuakhan upatnak le nuhrin covo upatnak NUN chung ah kan lut lio.

Cu tik ahcun biacaih piak haumi nih biacaihtu thutdan ah an thu ti lailo. Mipi vengtu a simi nih mi an that in an kap ti lailo. Tuanvo langhtertu thuamkhat hruk (uniform) kan hmuh hna tik ah kan tih ti hna lailo. Zeizong te nih anmah le sining ding an hlam cang lai caah minung holh phunkhat thiam paoh ahcun nun man a um cang lai. Chanhngak nonawn hna nih fimcawnnak ah an can dihlak an pek khawh cang lai.

Tar le semcawi nu hna mitkuh thaw in an it kho cang lai. Phaisa hi bawi a si ti lailo. Dinnak tu a bawi cang lai. Thluak tha le ramdawmi mino hna hruaitu dirhmun ah kan hmuh khawh cang hna lai. A rau ti lailo. Kan pin khi tlangbo pin te ah khin a um ko. Credit: Rev. M Thawng Kam

Be First to Comment

Leave a Reply

Your email address will not be published.