Press "Enter" to skip to content

Civil Disobedience Movement hi zeitluk in dah hmual a ngeih?

Civil Disobedience Movement hi zeitluk in dah hmual a ngeih? By: Salai Joel Van KL. Civil Disobience Movement (CDM) ti mi cu ram pakhat ah hruaitu a si mi an duhlo i, an bia ngai lo le an kuttang ah riantuan duh lo, an nawlngeihnak tang ah um duhlo, a bik in Cozah riantuantu hna khi an si i, CDM an tuah ahcun zung kai lo khi a si ko. Hi bantuk CDM tuahnak in ram tampi ah hruaitu thalo rak thlak an si tawn.

Civil Disobedience Movement aa thok ning mi dang tial mi cherhchanh in tlawmpal ka van langhter lai. Henry David Thoreau (1817-1862) nih, “Civil Disobedience Movement” cu 1849 ah a rak thok i, a chim mi cu, “Disobedience of Unjust Law” a si. Hi a chim duh mi cu, a dik lo mi hruainak, mizapi hremnak le sal zuatnak a hrawktu ca ah tuah mi a si. Chim duh mi cu, rampi phunglam le upadi vialte kha zulh lo, buai ding, zung kai lo ding, ngunkhuai pek lo ding, kan duhlo mi ram hruaitu kuttaang ah um lo ding tibantuk khi a si.

American ram ah minak le mirang thleidannak a rak um lio ah Martin Luther King nih minung cio kan si tlukrualnak a um a herh a rak ti i, “Disobedience Right Movement” in a rak dirpi ve. Cucu, nuhrin covo khi a si ko. Kan hmuh ding kan covo hmuh ding kha si. Cucu, Myanmar rampi ah kan kum 70 leng kan buai mi Tlangcungmi hna nih kan covo a dihlak in kan hmuh lo ruang ah Kawl he kan buai peng mi khi a si.

Cu a si tik ah, CDM tuah cang hnu ahcun, Cozah nih a ser mi zulhphung, upadi le nawl kha zulh lo a si ko. An uknak kuttang ah um lo kha a si ko. Hi bantuk tuahnak nih zeitluk in dah hmual a ngeih ti ahcun, Cozah riantuantu hna rian an tuan ti lo. Cu tik ah rian hma a kal kho ti lo. Cutik, tangka kal ning a dir cang i, Bank ah lakhruak in tangka an chuah tawn. Naihrawng Cozah riantuan CDM ah tampi an vun i tel tik ah, February 15 ah Myanmar Economic Bank 1,2 i tangka zong ralkap nih tangka an chuah ti kha kan theih dih mi a si. Zei ruang ah dah an chuah i, zeizatdah an chuah ti cu a fiang lo.

Cun, Bank riantuantu hna Zung an kai lo tik ah, Bank tangka umkal ning a dir cang i, Bank he aa pehtlai mi Zung le rian vialte tuan khawh a si ti lo. Cun, pakhat a biapi bak mi cu, mizapi nih kan pek tawn mi ngunkhuai, ti man, mei man, vawlei man tibantuk pek kan ngol tik ah, rampi ngunkhuai zung a hnursuan cang. Ngunkhuai zung in a kalpi rian le tangka hman awk a um ti lo.

Hi a cunglei vialte nih a chuahpi mi cu, Cozah Bank riantuannak kha a dirter i, nawlngeitu hna tangka lei a hnursuan cang. A fawinak cun tangka hman ding an ngei ti lo. Cozah riantuan thlahlawh pek ding zong a um ti lai lo. Nawlngeitu hna tangka a hnursuan ahcun, Palek nih hman mi tangka kha a hnursuan cang i, hman ding an ngei ti lai lo. Ralkap nih hman mi tangka lei zong khi a va hnursuan cang. Cu tik ah, ram hruaitu (hramhram uknak) kha chawlehthalnak lei ah a hnursuan cang hna. Hi vialte i, a donghnak cu ralkap uknak kha caan sau a kal kho ti lo i, mizapi nih thim mi sin ah nawlngeihnak pek lawng kha a taang cang. Hi bantuk tiang a can i, mizapi sin ah nawlngeihnak a pek lo ahcun ram sifak taktak, kutdok in a va mi ram ah kan cang ko lai.

Cucaah, Civil Disobedience Movement hi hramhram in, hriamnam tlaih in doh a si lo. Dai tein in tuah mi a si. Violence siloin Non-Violence tu a si. Hihi hriamnaam i tlaih in doh mi nakin hmual a ngei deuh. Hriamnaam, thing le lung in kan ralkap uknak hi kan doh ahcun mizapi nunnak le thisen tampi a chuak kho mi a si. Mizapi nunnak le thisen chuak loin ralkap cozah doh nakding ah a tha bik mi cu CDM cawlcanghnak hi a si ko. Atulio Myanmar rampi nih kan ton mi zong hi hramhram in ralkap uknak doh nakin dai tein kan duhnak le kan duhlonak langhter ah hin hmual a ngei deuh lai. A bik in Cozah riantuantu hna hi, CDM cawlcanghnak ah i tel dih hna sehlaw a rauh hlan ah kan ram hi aa thleng kho ko lai. Hramhram in dohnak cun dai tein kan duhlonak langhter hi ramdang zong nih an duh mi a si. (Ref: Lian Hmung Sakhong tial mi zohchih) The Hakha Times

Be First to Comment

Leave a Reply

Your email address will not be published. Required fields are marked *