Press "Enter" to skip to content

CNDF, PDF le Ralkap Kahdohnak Ah Ralkap Thi Le Hliamtuar An Tam

SAC ralkap pawl cu Kywinchaung le Anohsanthar(ကျွန်းချောင်းနှင့်အနောက်စံသာ) khua in thlanglei ah rallam an sial i, ni nganak ah Chaungkhuah khua pawng an phan. August 12 zing sml 11 hrawng in Kalay PDF le ṭangrual phu hna nih kan kah hna, tiah Kalay PDF nih cathanh an chuah. Cu kahdohnak ah cun Kalay PDF Battalion 1, 2, 5, 6, 7, Pa Kah Pha le CNDF hna i bawm in August 11 zanlei sml 5:00 tiang an kah hna, tiah theih a si.

Kahdohnak ah SAC ralkap 3 an thi i, Kalay PDF bomb ralkap nih bomb an puahhnawh hna caah ralkap tam ngai hliamhma an pu kho, tiah Kalay PDF nih an langhter. Cu zanlei ah SAC ralkap pawl cu, Chaungkhuah khua ah an lut i, inn an khangh caah inn 12 a ciam. August 12 zinglei ah Chuangkhuah in Kalay peng thlanglei ah an lan, tiah theih a si.

Kalay peng thlanglei Tharyarkung khua ah a ummi le Kalay GTI ah umhmun khuarmi SAC ralkap 150 hrawng cu, August 8 ah Kywinchaung le Anohsanthar khua kar ah Kalay PDF Battalion 3, 6, 8, 12 le CNF- KKG nih kan kah hna caah SAC ralkap 4 an thi kho, kanmah lei in a thimi le aa hliammi kan um lo, tiah Kalay PDF nih cathanh an chuah. The Chin Post

Ralbawi Hlun Nay Myo Zin Cu Thonginn In A Chuak Cang. Ralbawi(Captain) hlun Nay Myo Zin cu, thonginn ah kum thum reng lo a um hnu in a chuak cang, tiah theih a si. “Kum thum, thla thum le zarh thum ka um hnu ah ka chuak cang. Nan zapi cung ah kaa lawm,” tiah amah facebook cahmai ah a tar.

Hramhram uknak a huatu ralbawi hlun Nay Myo Zin cu ralkap in a chuah hnu ah ralkap chiatnak le ṭhatlonak kong a chim caah atu le atu tlaih a tong. Rampi limhang a thlak tiin section 505(a) in taza an cuai i, 2019 ah thong an rak thlak.

Monywa ah ralkap uk duhlonak langhter in lamzawhnak ah hruaitu pakhat, Way Moe Naing cu SAC nih kum 10 thong thlak ding in nizan August 12 ah bia an khiahpiak, tiah biaceih zung he naihniam mi pakhat nih a chim. SAC nih Yazatatkyi upadi 505, case panga in taza an cuai i, case pakhat ah kum 2 cio thong thlak ding in bia an khiah i, a diklak ah kum 10 thong thlak ding a si, tiah a chim chap.

Mi thahnak, mi thilri chuhnak, dalan fimhlawmnak telh in case pali bia ceih ding a taang rih, tiah theih a si. “Way Moe Naing cu kum 10 thong thlak ding in bia an ceih piakmi cung ah cunglei biaceih zung ah ceih piak ṭhan ding(Appeal) in halnak tuah a duh lo, zei sualnak ka tuah lo caah cunglei kai a hau lo a ti, tiah biaceih zung he naihniam mi pakhat nih a chim.

Way Moe Naing cu a luancia 2021 April 15 ahkhan SAC ralkap nih motor in a hnulei in an pah i an rak tlaih. August 12 ah a voikhatnak biaceih zung nih bia an khiahpiak i, Way Moe Naing a sihni pa zong aa tel lo, tiah theih a si. Tamu Peng Ah Pyusawhti Nih Tualchung Mi Pakhat An Thah: India-Myanmar ramri, Moreh le Nan Farlung karah Pyusawhti nih.

Min Lwin(kum 38) cu a cycle chuh an timh i, a pek duh hna lo caah an velh i, August 12 ah a nunnak a liam, tiah theih a si. Min Lwin nih cun, ka cycle cu ka laak piak sawh hlah u, ka nupi nih ka fale sianginn an kai ah a thlah, a don lengmang hnanak cycle a si, tiah a nawl ko hna nain Pyusawhti nih cun an chuh i, amah zong faak tuk in an velh.

Min Lwin cu a hliamhma he inn ah a ṭin i, nihnih chung a zawt hnu August 12 chun hnu sml 1:00 hrawng ah a thaw a dih, tiah theih a si. Anih hi mi ngandam lo ngai a si i, a thih ah a nupi le a fale 3 a roh hna. Tamu peng ah Pyusawhti phu nih India rammi pahnih cu an rak thah hna. Anmah kut in tualchung mi a thimi hi 10 leng an si cang, tiah theih a si. The Chin Post

Be First to Comment

Leave a Reply

Your email address will not be published.