Press "Enter" to skip to content

CRPH nih a thanh cang bantukin April 1, thaizing ah cozah thar dirh a si cang lai. Cu cozah thar cu a min ah National Unity Government ( Miphun Lunrualnak Cozah) ti a si lai.

April 1: National Unity Government, Federal Democracy Chater Le Federal Army
==========================================================

March 31 in cun cozah hlun caan a dih cang lai i April 1 in cun cozah thar an kai cang lai. Ralhrang nih uknak an firnak thla 2 a tling cang. Minung 500 hrawng an thi cang. Thla 2 chungah kan rampi a ngan a fak tuk, nifatin zantin in a aihram peng ko.

Ralhrang uknak hrawh i mipi thimmi cozah, mipi aiawhtu cozah, mipi caah rian a tuanmi cozah thar dirh ding hi Myanmar mipi vialte nih kan i hngahhlangmi cu a si.

CRPH nih a thanh cang bantukin April 1, thaizing ah cozah thar dirh a si cang lai. Cu cozah thar cu a min ah National Unity Government (အမျိုးသားညီညွတ်ရေးအစိုးရ, Miphun Lunrualnak Cozah) ti a si lai. A min hrimhrim hi uar a um, duh a nung, aa dawh. NUG nih Myanmar ram cu miphun tampi umnak ram a sinak a langhter.

Hi cozah thar ah NLD palai le tlangcungmi an i tel lai. Miphun an tling lai.

Hi cozah hi ralhrang nih uknak an fir cuhamah lioah a chuakmi a si tiah dirh a si ni bak in ral a do colh lai. Cucaah ral a domi cozah a si lai tiah CRPH in chimnak nawlngeitu U Yi Mon @ Maung Tin Thit nih a chim.

Cozah thar dirh a si rual rual in um lo awk a tha lomi cu phunghrampi a si. Ralhrang rual nih anmah duhningin anmah himnak ca i an rak sermi 2008 phunghrampi cu hrawh/hnon/hlawt a si lai i Federal Democracy Chater timi phunghrampi hman chung a si lai.

Hi FDC hi 1990 thimnak lio i teinak a hmumi NLD palai hna nih an rak sermi phunghrampi cherhchan in CRPH nih a sermi a si.

FDC phunghrampi tangah Federal Army cu ser a si lai. Hi Federal Army sernak kongah CRPH le tlangcung hriamtlaibu vialte tonnek le biaruahnak kan ngei i kan zapi in kan lung a tling cang tiah CRPH in chimnak nawlngeitu U Yi Mon @ Maung Tin Thit nih a chim.

Cun cozah thar kan dirhmi cu ramkip nih an kan theih i an kan cohlan nak dingah kan i zuam lai, Federal Army zong ramkip nih a kan bawmh nak dingah kan i zuam lai tiah U Yi Mon nih cun a chim.

Source: Myanmar Now

Crd: Chin Post

Be First to Comment

Leave a Reply

Your email address will not be published. Required fields are marked *