Press "Enter" to skip to content

Donald Trump caah:Thawngpang tha taktak asi cang ne.

Tukum US thimfung (vote) thla cu ai phundang ngai ko. Athlihran ttha set lo kan ti lai cu. Aruang cu Eary voting (cuttin me) thlatu an tam tuk caah sibik ko tiah athiammi hna nih an chim. Early voting cu cakuat bawm in thlak asi. Hihi Donald Trump nih aduh lo caah biaceihnak sangbik ah ka kai lai ati phahnak si. Amawh ve lonak cu Donald Trump hmunhma ah ruah bakmi tiang in Biden nih atei caah lunghrinh lo awk ttha lo. Tutiang ahcun Biden nih atei rih. Nain result fiang ngaingai cu chuak rih lo. Nain US ummi Pa Siang timi nih atanglei avon langhtermi ruah tikah Donald Trump caah hnangam ngai si ko rih.

Battleground state pakhat asimi North Carolina vote hi 94% rel asi cang. Electoral votes hi 15 a um. Popular vote hi 5.5 Millions rel asi cang. President thim fung ah; Donald Trump (R) 50.09% , Joe Biden (D) 48.69% ansi. Donald Trump nih 1.4% in atei. Ateithai cang lai tiah zumh asi. US Senate thimfung ah; Thom Tillis (R) 48.73% , Cal Cunningham( D) 46.94% an si. Thom Tillis (R) nih 1.79% in atei. Governor thimfung ah; Roy Cooper (D) 51.48%, Dan Forest (R) 47.06 ansi. Roy Cooper ( D) nih 4.42% in atei. Catialtu: Pa Siang, Charlotte Theihtlei ah atanglei Ralkap nih democracy phunglam an sermi hi rak rel ve.

Ralkap sermi Democracy hi Democracy Diktak asi maw? ‘Democracy’ biafang cu Greek biafang ‘dēmokratía) in a rami asi i, a sullam cu ‘demo- mipi, kratia- nawlngeihnak’, “Mipi nawlngeihnak or uknak” ti asi. Democracy sullam cu a tak in hmuh khawh nakhnga: zalonnak (Freedom), itluknak (Equality), dinnak (Justice), phung nawlngeihnak (Rule of Law), zalong tein chimrel le ṭial khawhnak (Freedom of expression), thimnak ah zalong tein i tel khawh le thimfung (vote) thlak khawhnak etc.. hna cu aherh tukmi asi. Cun, democracy cu mi tam hruainak in i uk phung asinain, mi tlawm covo le himnak kha a upat i, a runven chih. Hi thil hna um loin Democracy cu a nung kho lo i, sullam a ngei kho lo.

Ralkap Cozah nih Democracy an timhtuah ning: Ralbawi Than Shwe hruaimi ralkap cozah nih Kawlram democracy caah zulh phung phun 7 an ngei. Cu an zulh phung cu General Khin Ngunt nih August 30, 2003 ah vawleipi theih in a rak thanh. Sikaan a ngeimi “Disciplined Democracy” kan ser lai tiah an ti. Cu zulh phung cu kan tlamtlinh cang tiah Than Shwe nih March 30, 2011, ram nawlngeihnak cu President Thein Sein haohami USDP cozah sinah a pek chanh cang. Zulh phung phun 7 ah pakhatnak i ceihhmainak (National Convention) cu 1993 ah an rak thawk. Ralkap upa, tlangcung upa hna le Suu Kyi hruaimi NLD an rak itel hna. Asinain, zalong tein chimrel khawhnak le, diknak le buaktlaknak aum lo. Ralkap nih anmah duhning in an kalpi caah NLD cu 1995 in an chuak.

National Convention cu an kalpi kho tilo. Tikah 1996 in an ngol. 2004 in an thawk ṭhan. NLD party le tlangcung ramkhelbu hna i tel loin, ralkap duhnak in tuahmi phunghrampi cu 2008 May ah ‘Referendum’ an tuah. Referendum ah mizapi nih mah duhnak cu zalong tein vote pek khawh asi lo. Hramhram in “Yes Vote” thlakter asi. Ram mizapi lungtlinpinak vote (92.4 %) kan hmu tiah thawng an thanh. NLD nih phunghram (Constitution) zohremh ṭhan ding, thongthlakmi hna chuah ding, thimnak dik le zalong in tuah khawhnak caah International zohpitu sawm hna dingin Ralkap cozah cu April 29, 2009 ah an hal. Cu an halmi cu UNO le vawleicung cozah US, UK hna zong nih an halmi asi. Asinain, ralkap cozah nih a zul duh lo.

Aung San Suu Kyi cu thimnak ah itel kho lo dingin rap an fawih i, inntong ah an tlak ṭhan. Cu pinah phunghram in an khenkham rih. Cu ruangah NLD nih Election cu lungtlinlonak (Boycoṭ) an tuah. Thimnak cu November 07, 2010 ah an tuah. Election cu, ralkap ṭanhmi USDP nih (76.5%) in teinak kan hmu tiah an thanh ṭhan. Thimnak ah anmah tlin khawhnak caah kum 1993 ah General Than Shwe nih adirh mi USDA cu USDP ah July 6, 2010 an thlen. Hruaitu ah Prime Minister General Thein Sein an chiah i, ralkap bawi tampi an ralkap sinak in an chuak i, USDP an lut. Kawlram uknak cu phunghram ningin ralkap nawlngeihnak tangah um seh ti an saduhthahnak asi ko. Cu an saduhthahnak cu tlamtling tein an tuah khawh cang.

Ralkap Suaimi Democracy uknak phunghram (Constitution): Ram i hruainak a ṭhatnak le chiatnak cu phunghrampi (Constitution) ah aa hngat bikmi asi. Ralkap cozah nih kum 14 chung rau in a suaimi phunghram cu democracy phung ningin si loin, ralkap nawlngeihnak a pemi uknak phunghrampi tu asi. Cucu faing tein phunghram ah alang. Chapter I (b) ah ralkap cu ram uknak kongah biapi bik in hruaitu asi lai tiah ṭial an thawk. Kawlram President cu raltuk lei ah thiamnak a ngeimi asi lai tiah Chapter II Article 59 (b) nih a ṭial fawn. Article 361 nih Buddhist biaknak cu Kawlram biaknak lak ah biapi bik ah chiah asi tiah a ṭial rih. Cun National Defense Security Council (NDSC), ah ralkap bawibik kha nawlngeihnak sangbik a pek i, aherh caan poah ah ram nawlngeihnak lak khawhnak nawl pek asi. (Chapter XI, Article 110-114).

Cun, ram phunghrampi cu Parliament member chungin 75% nih lungtlin lawng ah remh khawh asi (Chapter XII, Article 436). Thimnak tel loin Parliament le State, Region ah seat 25% cu ralkap vo ah an chiah (Chapter IV, Article 74). Phunghrampi cu remh khawh si hlah seh ti an duhnak asi. Ralkap sermi phunghrampi remh ṭhan ding cu thilhar tuk asi cang. Cucaah Kawlram democracy cu ram mipi nawlngeihnak democracy si loin, ralkap nih phunghram onh in an nawlngeihnak le pennak fehternak a pemi phunghrampi a si ning kha fiang tein a lang.

Be First to Comment

Leave a Reply

Your email address will not be published. Required fields are marked *