Press "Enter" to skip to content

Dr Sasa: Myanmar Ralkap Nih Rammi Cungah An Tuahmi Sualnak Tehte 180,000 CRPH Ah A Phan

Myanmar Ralkap nih Rammi cung ah an Tuahmi Sualnak Tehte 180,000 CRPH ah a Phan tiah Dr. Sasa nih Langhter
————

February 1, 2021 thawk in Myanmar ralkap nih rammi hna cung ah an tuahmi sualnak tehte 180,000 cu CRPH sin ah a phan cang, tiah Dr. Sasa nih nihin ah a chuahmi thawngthanhnak ca ah a langhter.

Tehte 180,000 a um pin ah upadi he aa kalh in Myanmar ralkap nih mi an thahmi 540 an si i, tlaih an ton hnu ah a nunnak a liammi minung 10 an si, tiah a langhter chap.

CRPH nih a sermi upadi thiamsang bu le atulio Myanmar kong hlathlaitu Independent Investigative Mechanism for Myanmar (IIMM) timi bu cu nihin April 7 ah tonnak an ngei lai i hmailei rianttuan tti ning pawl an ceihmai lai, tiah Dr. Sasa nih thawngthanhnak ah a langhter.

Credit: The Chin Journal

Relchap: Myanmar ram a phan mi CNN thawnglatu nih thawng a laak mi an thlah cang
~~~~~~~

Myanmar ram, Yangon ah CNN thawnglatu Clarissa Ward ra in thawng a laak mi cu April 5 ah Live in thawng an thlah cang. Khoika ram thawnglatu hmanh Myanmar ram luhnak nawl pek an si lo lio ah, CNN cu thawng laaknak nawl pek an si i CNN thawnglatu nih Yangon khuachung ah ni zeimawzat chung thawng a laak.

CNN Live ah thawnglatu Clarissa Ward nih, β€œMyanmar ramchung luh ding hi har ngai in kaa zuam hnu ah ka luh khawh mi a si. Yangon ka phan i, keimah kaa thumh duhnak hotel ah umnak nawl an ka pe lo, ka kal duhnak le thawnglaak ka duhnak hmun ah kalnak nawl an ka pe lo i anmah ralkap rikhiah mi chung lawng ah thawng ka la kho.

Thawng ka laak lio ah ralkap le palek motor paruk nih an ka zulh peng. Ka duh mi minung zong biahalnak nawl an ka pe lo. Ralkap nih minung an thimcia mi lawng bia ka hal khawh hna. Cu ti cun thawng an ka laakter nain camera ka hun i chuah le cangka, duhlonak a langhter mi hna cu kan sin ah an rak tli i Myanmar ram sining, an har ning, an temh ning, an tuar ning le zeitluk in dah mizapi harnak an tonzia kha ngaihchia ngai in an chim.

Cun, Myanmar rammi nih atu nakin a tha deuh mi ram ser an duh i a dikfel mi democracy hmuh an duh tuk cangnak vialte zong an chim. Cu vialte chim nakding ah caan tha an rak ngeih lo zia zong an chim. Cu bantuk ka hmuh tik ah zeitluk in dah Myanmar rammi harnak an ton i, thanchonak le thlennak an duh tuk cang ti mi hmuh khawh a si,” tiah a chim.

β€œA ngaingai cu Ralkap nih ramchung luhnak an ka pek mi hi, anmah kong le sining siseh, kum hnih chung ah thimnak tuah than ding in an timh mi kong chim duh ah a si. Asinain, cucu Myanmar rammi nih an zum lo. Interview ka tuah mi pawl hmanh ka mit hmuh ah an tlaih hna. Ralkap nih chimh an ka duh mi le, a taktak i thil a cang mi cu aa dang tuk hringhran. Cucaah, Myanmar ram UN Palai nih a chim bantuk in, Myanmar ram ah ramchung ral a chuah taktak i atu nakin thisen a luan taktak te tik ahcun, cucu ahohmanh nih nan hmuh duh mi a si te lai lo, tiah a chim mi kha tutan ka thilton nih tampi a fianter ko,” tiah Clarissa Ward nih a chimchap.

CNN thawnglatu Clarissa Ward Myanmar ram a phak lio ah soiselnak le mawhchiatnak tampi a ton hnu ah hi bantuk in thawngpang a laak mi a hun thlah hi a si.

Credit: Democratic Voice of Chin- DVC

Be First to Comment

Leave a Reply

Your email address will not be published. Required fields are marked *