Press "Enter" to skip to content

Dr. Sasa nih UN Ralkap Myanmar ah Thlah Ding R2P A Hal Hna>>>>>>>>>>>>>

Nihin Myanmar ah a Cangmi Thawngpang Biapi Pawl
======================================================
-Dr. Sasa nih UN Ralkap Myanmar ah Thlah Ding in a Hal
-Youtube nih Myanmar Ralkap Thawngzamhnak Channel Pali a Hloh
-2008 Phunghrampi Hrawh Ding in CRPH nih Cathanh Chuah
-Rammi That Ti Hna Hlah tiah UN nih Myanmar Ralkap a Fial
-USDP Chungtel Misual Bu nih NLD Minung Pahnih Nam in an Thah Hna
-Dr. Sasa nih UN Ralkap Myanmar ah Thlah Ding R2P a Hal

CRPH nih Myanmar aiawhtu UN Special Envoy rian a khinhmi Dr. Sasa nih Myanmar rammi hna runvennak ca ah UN ralkap thlahpiak ding in UN Security Council ah halnak ca a ttial, tiah theih a si.

R2P (Responsibility to Protect) timi UN upadi ning ah ram pakhatkhat ah minung a bubu in Thahnawnnak (Genocide), Ralram Sualtuahnak (War Crime), Miphun Cihmih Lainawnnak (Ethnic Cleaning) le Minung hawi cung tuksum sualtuahnak (Crime Against Humanity) pawl a can a si ahcun UN ralkap pawl thlah i runvennak lak a si tawn.

Dr. Sasa nih R2P a halmi hi UNSC nih zeitik ah dah a ceih lai timi fiang in theih a si lo.

Youtube nih Myanmar Ralkap Thawngzamhnak Channel Pali a Hloh

Google nih a ngeihmi vawleicung video platform ngan bik a simi Youtube nih Myanmar ralkap he aa pehtlaimi thawngzamnak account pali a hlonhpiak hna, tiah theih a si.

β€œYoutube phunglam buar in video an tar lengmang caah kan hlohpiak hna,” tiah Youtube nih phungning in thawngthanhnak zong a tuah.

Youtube nih a hlohmi Myanmar ralkap thawngzamhnak channel lak ah MRTV le MWD zong an tel. Facebook zong nih Myanmar ralkap thawngzamhnak Page le Account pawl kan hnu zarh ah khan a thahpiak dih ve hna.

2008 Phunghrampi Hrawh Ding in CRPH nih Cathanh Chuah

Committee Representing Pyidawngsu Hluttaw (CRPH) nih nihin ah cathanh a chuah i, 2008 phunghrampi hrawh ding in an i hmaithlakmi an langhter chih.

Cu cathanh ah cun:

Rialdip uknak dihdonghter ding
President U Win Myint le Daw Aung San Suh Kyi telh in tlaihmi vialte thlah dih ding
Democracy uknak phung ser tthan ding
2008 phunghrampi hrawh ding le Federal phungphai cung ah a hngetmi Phunghrampi serchuah ding timi pawl an i tel hna.
Rammi That Ti Hna Hlah tiah UN nih Myanmar Ralkap a Fial

March 3 ah Myanmar ralkap le palik kut in lamzawhtu Myanmar rammi 38 an nunnak a liam tthan hnu ah UN nih Myanmar rammi that ti hna hlah, tiah Myanmar ralkap a fial.

UN nuhrin covo luzik Michelle Bachelet nih, β€œDai tein lam a zawhmi rammi hna ruru hranghrang in tthenhmal hi ngol uh. Myanmar ralkap nih lamzawhtu thahnawnnak le thongthlak hi an ngol hrimhrim a hau. Dai tein lam a zawhmi rammi pawl kha meithal kuanfang taktak in kah hi tuksum a si pin ah fihnung zong a si,” tiah fak ngaiin a chim.

March 3 i Myanmar ramchung tuksum thilcang ruang ah US zong nih, β€œVawleicung ram kip nih awaan khat in Myanmar ralkap tuahsernak cung ah duhlonak kan langhter cio a herh,” tiah a chim. (Reuters)

USDP Chungtel Misual Bu nih NLD Minung Pahnih an Thah Hna

March 5 ah Sagaing ramtthen, Mongywa peng chung ah USDP chungtel misual bu nih NLD chungtel minung pahnih lampi ah an thah hna, tiah theih a si.

Thahnawnnak a cannak hmun hi Kyaung Gone Gyi khua ah a si. Zinglei ah Kyaung Gone Gyi khua NLD Chairman U Htway Naing (kum 53) le a tupa Mg Nan Wai Aung (kum 17) cu a dang minung 6 he khuachung lampi in an rak ttin.

Cu lio ah cun USDP chungtel misual bu minung 25 hrawng an rak chuak i β€œThat dih hna u!” tiah au pah buin nam in an tuk hna.

Nam in an tuk hnanak ah U Htway Naing le a tupa Mg Nan Wai Aung cu an nunnak a liam i, a dang minung 5 zong hliamhma an pu hna.

USDP misual bu nih atu bantuk in thahnawnnak an tuah hlan ah hin kap hnih karlak bia elnak le i siknak zong a um lo, tiah Myanmar Now nih a ttial.

RF; The Chin Journal

Be First to Comment

Leave a Reply

Your email address will not be published. Required fields are marked *