Election ah aa cuh mi pawl zong ralkap nih uknak hramhram an lak mi duhlonak langhter mi ah i tel ve hna sehlaw ka duh
Tutan ralkap nih uknak an lak mi duhlonak langhternak ah ram pumpi thimnak ah aa cuh mi vialte hna zong i tel kho ve hna sehlaw a tha lai, tiah Salai Van Bawi Lian a nih chim. Thantlang Peng CNLD in aa cuh mi Salai Van Bawi Lian nih, “Atu duhlonak kan langhter mi ah hin mino lawngte kan i tel, upa pawl zong kan ram thlen nakding ah i tel ve hna seh ti ka duh. Biaknak lei zong nih rawl ulh thlacamnak in siseh, cozah riantuantu pawl zong nih CDM in siseh, MP ah kan thim mi hna le MP aa cuh mi vialte zong si hna seh i tel hna seh law ka duh,” tiah The Hakha Times ah a chim.
“Myanmar ram pumpi ah ralkap nih uknak an lak mi duhlonak kan langhter ahcun teinak kan hmuh pin ah hmailei zong ah ralkap nih uknak la kho ti lo ding dirhmun zong a phan kho mi a si. Atu duhlonak kan langhter mi hi kaa lung hmuih tuk ko nain ni cheu hrawng cu duhlonak langhter si sehlaw a tha hnga tiah ka ruah,” tiah Salai Van Bawi Lian nih The Hakha Times a chimchap.
Duhlonak an langhter lio ah tlaihkhih a um sual a si ahcun Myanmar ram UN zung pehtlainak phone number 09786465405 le pehtlaihnak nawlngeitu U Ngunt Ung -ICRC – 095065195 le U San Kun Khan – 09254179623 hna ah pehtlaihnak tuah khawh a si ti mi zong duhlonak a langhter mi pawl sin ah na chim hna maw tiah The Hakha Times nih Salai Van Bawi Lian cu kan hal tik ah, “Kei ka damlo ca ah nizan (February 9) meeting ah an chimh ko hna lai tiah ka zumh ko.” tiah a chim. Salai Van Bawi Lian
