Press "Enter" to skip to content

Election Kongah I Thlak Lo Dingin Battleground State 4 Nih Faak Taktak In Texas An Phomh

𝐄𝐥𝐞𝐜𝐭𝐢𝐨𝐧 𝐤𝐨𝐧𝐠𝐚𝐡 𝐢 𝐓𝐡𝐥𝐚𝐤 𝐥𝐨 𝐝𝐢𝐧𝐠𝐢𝐧 𝐁𝐚𝐭𝐭𝐥𝐞𝐠𝐫𝐨𝐮𝐧𝐝 𝐒𝐭𝐚𝐭𝐞 𝟒 𝐧𝐢𝐡 𝐅𝐚𝐚𝐤 𝐭𝐚𝐤𝐭𝐚𝐤 𝐢𝐧 𝐓𝐞𝐱𝐚𝐬 𝐚𝐧 𝐏𝐡𝐨𝐦𝐡
=====================================================================
President-elect Biden buan a co ko mi leeter dingin Texas nih tazacuainak a tuahmi hnonpiak dingin Pennsylvania, Michigan, Wisconsin le Georgia i attorney general pawl nih Supreme Court sinah nawlnak an tuah. WASHINGTON — President-elect Biden buan a co ko mi leeter dingin Texas nih tazacuainak a tuahmi hnonpiak dingin Pennsylvania, Michigan, Wisconsin le Georgia i attorney general pawl nih Supreme Court sinah nawlnak an tuah i, a tu bantuk i Republican pawl an tuahsernak ninghgaltuk bia a si i, US democracy le rule of law (a upadi a umkalning) zei ah an rel lo bia a si, tiin an chim.

Republican lei in tazacuainak a tuahtu hna hi Texas Republican attorney general le state 17 ah a ummi a mah a tanhtu a GOP riantuanhawi pawl le Congress memebrs lakin minung 106 an si hna i, hi hna pawl nih hin American tuanbia chungah votepetu pawl an duhnak thlanglamhpiak dingin an cawlcang, ti a lang. Supreme Court nih term hnihnak an ka pehter khawh theu lai, tiin Trump nih ai ruahchan caah, hlangfangtein a sungh ko bu zongah cun, tazacuainak kalpi dingin a forh tualmal hna.

Trump nih tazacuainak a tuahmi vialte lakah tutan Texas tazacuaimi hi a nehhnungbik a si i, cu zong cu an hlawh a tling thiamthiam lo. Tehte pakhat hmanh an chuahpi khawh lo tikah an bia a ceihpiaktu biaceihbawi pawl nih an nihsawh, asiloah anmah lehlam sual an phawt beh hna. Tutan Texas tazacuainak le bang cu ninghngal bia ah ruahpiak a si caah, legal experts pawl zong an nih lehlam a chuak ngai. “US Supreme Court nih hin Deferalism phung ralchanh riangmangin cun maw hlathlainak cu a tuah hnga i, state 5nak nih nawlnak a tuahmi ruangah cun maw a dang state 4 i an election systems vialte cu an pah lai, tiah nan zumh,” tiin an mawhchiat len hna.

State 4 nih lehnak an tuah colh ve. Democratic attorneys 3 le Georgia i Republican attorney general 1 le ti in Texas nih US Supreme Court i tazacuainak a chuahpimi cu thalo in an soisel. Vote million tam taktak hnonpiak dingin tazacuainak an tuahmi a si, tiin an soisel hna. “Judicial (upadi zuul in) ningin rian tuanmi ninghngaltuk lehpek in zeirellonak an tuahmi hi SC nih a cohlanpiak awk a si lo i, hi bantuk mi zeirel lo in cawlcanghnak hi hehhnu hmailei ah midang nih an i cawnchin sual nak hnga lo voice a leenter awk a si,” tiin PA ca biachimnak an ngeih lio ah an chim.

“Fiangpup in chim lawlaw ko u sih law, American mipi an vote hrawhpiak dingin Texas nih SC ai rawih i, US next president hi thim an timh. Hi bantuk Faustian (Khuachia sinah ka nunnak ka pek, a titu German arfizohthiampa a min a si) rawih le sawmnak hi cu fehtein hnonpiak hrimhrim ding an si,” tiin an chim. Georgia’s attorney general Christopher M. Carr ko hi Texas tazacuainak kongah a khuaruah a har khunmi a si. “Tutan election chung vialte ah hin kan US Constitution nih tuahnak nawl a pek ningtein Georgia nih a tuah ko. Election caah cawlcanghnak a kalpi, Covid-19 nih mipi lungthin a tuaitam ngai ko bu ah, election cu thatein a zohkhenh ko, election results vialte zong cu a fehter, namhnehnak a tuah – cun a tu le tu in cu vialte cu a tuahmi an si. Asinain, cu ko bu zongah cun Texas nih cun Georgia cu taza a cuai thotho ko rih,” tiin Carr nih a khuaruahharnak kong a chim.

State dang nih an election an tawlrel ning kongah Texas hi i thlaknak nawl a pelte hmanh a ngei lo. Tazacuainak capar a tinmi zong hi lihfangfaak lawngte a si, tiin an chim.
“Election hi US Constitution nih state pakhat cio kutchungah a chiahmi rian a si ko nain, Wisconsin le a dang taza an cuai chihmi state pawl an i election hi Texas nih hranhraam lo in luhhnawh le tuaitam ai tim. Wisconsin nih a state chung election hi amah tein a tuah ko cang, a state chung khuasa votepetu zong nih an state caah candidate an thim ko cang. Cu bantukin anmah le duhthimnak te an tuahmi Texas nih hrawhpiak a timhmi hi phung (law) hram he zong ai kalh i, thil sining he zong ai kalhmi a si,” tiin Winconsin i biachimnak an ngeih lio ah an chim.
A ra lai mi Monday ah khin Biden vote pek dingin Electoral College majority nih timhlamhnak an i ngeih hlan ni tlawmte lawng caan an i ngeihmi chungah election a khupthal leh dingin Supreme Court ah Republcan pawl nih tazacuainak an tuah. Tazacuainak a tuahtu pawl hi Trump a politics nih a chuahpimi theipar a tlaantu pawl an si i, “Kan pu Trump hi zomhteih a tong” tiin a titu pawl an si.
Texas tazacuainak hi Texas attorney general Ken Paxton nih a tuahmi a si. Paxton hi security he pehtlaiin dehhlennak a tuah, tiin taza an cuai lio mi pa a si. Cun, a office nih political donor ningcang lo in a tuahto, tiin sual an phawtmi pa a si. Cu ti sual an phawtmi vialte cu a cohlanpiak hna lo. Biden nih buan a co ko cang. Cucaah, hi kong hi Supreme Court he a pelte hmanh ai seng ti lo, tiin state 4 nih an chim. State pakhat le pakhat karah alhnialnak a um ah cun an biatheihpiaknak tuah (hearing) dingin Sumpreme Court kut ah US Constitution nih nawl a pek ko nain, tii (water) rights le ramri rights he ai pehtlaimi buaibainak kong lawngah sungrengtein le buaktlak in i thlaak kho ding ceu khi a si.

Texas nih hin cu bantuk thil kongah zeihmanh buainak a tonmi a um lo caah, tazacuainak zong a tuah khawh awk a si lo, tiin new brief an tuahmi ah an chim. “Hliamtuar (midang hnursuan) tonnak kong i Texas nih ai hmanmi khuaruahnak (theory) hi cohlanpiak a si ah cun, zeibantuk election asiloah vote rights hmanh hi fawitein a lang le tlangin dorh le rengh khawh a si hnga i, cu in cun Supreme Court nih ai ngeihmi original law hi fawitein remhsiam khawh a si hnga. Misual lainawng pawl an tuahtonak policy he pehtlaiin NY asiloah California nih Texas asiloah Alabama hi taza an vun cuai ve hna hnga. Mah le dumhau chung cio (state cio) ah tuahmi election kong i buaibainak vialte cu a hunghung in biaceihzung ah phaakpi lulh an vun si hnga,” tiin Wisconsin brief an tuahnak ah an chim.

“Texas hi zeibantuk event kongkau hmanh ah caansau pi hngahngam a hmangmi a si. “PA nih a election results a namhneh hnu i votepetu minung million tampi zelrello in tuahto sual ah cun kan electoral system mipi nih an zumhraihnak hi an sawksaam dih lai i, kan democracy phung zong an hrawh phah lai. Nikhua tlai i caan riangmang in a lentecelhthiamnak ngian, thluak a hmangtu Texas hi laksawng an chuah bantuk a si lai,” tiin PA brief nih a chim.

“Election results pawl siseh, Texas state nih ai hmanmi phung votepetu minung million tampi nih an i bochan ta hi Texas nih a bawh ziar mi a si. Texas nih a tanhdeuh mi candidate an thim lo ruangah votepetu pawl hi dantat keel va si hlah. Cun a tu bantuk i nikhua a dinden hngak riangmang in Texas nih cawlcanghnak a tuahmi hi vocuanter rai zong a si fawn lo,” tiin brief an tuahnak ah an chim. Votepetu minung million a sawmsawm zeirello riangmangin, tlanhnak (remedy) tuah dingin Texas nih a lam a firhkhoihmi hi justice pawl nih an hnonpiak hna ah a tha, tiin state tamial nih an duhnak an langhter.

“Texas nih a tu bantuk i Supreme Court ah a duhnak a langhter mi hi hrih le hram pakhat hmanh a ummi lo mi sual kawlnak le cohlan awk a tlaklo mi tazacuianak a si. Cu ko bu zongah cun, votepetu minung million tam taktak nih an ngamdamnak zawn hmanh ruat hin lo in biatakthlak tein vote an pek i election an kalpi. Cu election kongkau i state cio nih an i ngeihmi phung merhsanpiak dingin Texas nih Supreme Court a tuuk tualmal ko rih” tiin PA brief nih a chim. Nikum ah khan, federal courts pawl nih hin kapkhat party lawng tanh riangmang in biangeihpiaknak (hearing) nan tuah lai lo, tiah nawl chuah a si bal. Political kong biabuai kongah federal biaceihbawi pawl nih an thlaak awk a si lo, tiin Supreme Court nih a chim. “US ah party nganbik pahnih (Republican le Democratic) karlak i political power a ummi kongkau ah federal biaceihbawi pawl an i thlaak ve dignin licence a ngeimi an si lo.

Cun US Constitution kong zongah cu ti ngaingai in nawl an ngei fawn lo. Cun, an biachahmi kalpinak le rikhiahpiaknak kong zongah dirhmun an ngei fawn lo,” tiin Chief Justice John G. Roberts Jr. nih majority caah capar in a tial. “Texas khuakhaanmi cohlan a si sual ah cun, kan Constitution le a tungtlang viatle buan ah a cang lai i, American politic life ah Supreme Court hi kahkhat party lawng a tanhbikmi biaceihzung ah chiah a si cang lai” tiin PA brief nih biatlaangkamnak an tuahmi ah an langhter. Texas biasu ngaihpiak dingin biachahnak an tuahmi hmanh nih hin democracy cung i kan chiahmi zumhfehnak hi a chiatchuah ding khi a si, tiin Wisconsin nih ralrin a pek hna. Election cung i kan zumhnak fehternak dingah Supreme Court ai thlaak a herh, tiah Texas nih a chim ve.

“Asinain, state pakhat a si mi Texas nih a dang states pawl i election results a khupthal lehpiak dingin biaceihzung ah tazacuainak tuah dingin onh a si mi tlukin kan democracy cung i zumhnak kan ngeihmi a sawksaam deuh tu ding thil dang pakhat hmanh a um ti tung lo,” tiin brief an tuahmi ah an chim. A phichuak zei bantuk a va si ko bu zongah, Texas an bia ngaihpiak i timhmi vial hmanh nih hin mipi lung a tuai lai i, rampumpi ah cohlan awk tlak lo in biaceihbawi nih an fehter cangmi biasuu pawl cu dotla (tazavuan) bantuk in a siamremh bantuk ah a cang hnga i, lihfangfaak in an chuahpimi biasuu hi thazaang a vun ngeihter ding lawng khi a tang cang, tiah brief nih an chim.

Texas biasuu an ngaihpiak hna hlan ah, Thursday i biachimnak an ngeih tikah khin Supreme Court nih an kong hi a chim pah theu lai, tiah zumh a si. Cu bantuk biachimnak an tuah tikah caan tawite lawng caan an hmang theu. Cu in cun Friday tal ah khin an bia ngaihpiak cold ding an si le si lo biaceihbawi pawlnih biachahnak an tuah te ding khi a si. Theory ningah cun, SC nih duhthim ding tampi ai ngeih ko. Texas biasuu ceih a si chung cu Biden vote pek rih lo dingin state electors pawl hi a kham rih chung hna lai maw, asiloah, an biasuu hi a ran khawh chungin dah a ceihpiak colh lai dah. Nihin tiang i an zumh bikmi cu Texas biasuu hi ngaihpiak lo dingin SC nih khua khaan theu lai, ti a si.

Texas nih capaar a tin hnu in SC hi voi 10 lenglo biachimnak an ngei cang i, Red le Blue states sinin siseh, amah Trump sinin siseh, politicians le scholar pawl sinin rak i telhvaih ve nak um lo dingin biakaa an lenter. Hi hna pawl an i telhvaih te lai, ti cu chimchung khawh a si. Texas hi punghman in rian a tuan lo mi a si, tiin Thursday i biachimnak a ngei lio ah Ohio attorney general, Republican, Dave Yost nih a chim. President a thimtu electors pawl thim khawhnak nawl hi US Constitution nih states kut ah a chiahmi a si. Cu kongah Legislature pawl nih an kutrit hna awk a si. Cucaah, cu Constitution ning tein, state chung election tuahmi vialte kongah state biaceihbawi pawl hi a donghnakbik biangeitu an si awk a si, tiin Red states nih an duhnak an langhter.

“Punghmantein cawlcangh hi a thabik ko. Ohio nih Electors Clause a sullam kan zoh tikah, tlanhnak caah Texas nih nawlnak a tuahmi hi Electors Clause nih a dirpi kho lo,” tiin Yost nih a chim.
“Constitution he ai tlaak in electors pawl thim awkah state biaceihbawi pawl Texas nih rian a fial hna. Cu bantuk rianfialnak, nawlchuahnak nih cun kan Electors Clause hi upat a pek si lo in, a buar lehlam,” tiin Yost nih a chim. Cucaah, 2024 election hlan hrimhrim ah Elector Clause a sullam hi Supreme Court nih thatein nan fianter ta a hau cang lai, tiin Yost nih SC sinah forhfialnak bia a chim. Absentee ballots cohlannak nithla pehsauh dingin PA Supreme Court nih biachahnak an tuahmi kongah Clause a sullam hi nan hman ah a tha, tiin SC sinah nawlnak a tuah. Chelsea Bawi

Be First to Comment

Leave a Reply

Your email address will not be published. Required fields are marked *