Falam Pengchung Ah Bomb hliamhnak in SAC Ralkap 12 An Thi, Tiah CNO/ CNDF Nih An Thanh. Chin ramkulh Falam pengchung bomb puahnak in hliam a tuar mi SAC ralkap 12 an thi i, minung 15 hrawng nih hliam an tuar, tiah CNDF nih May 14 ah an thanh. Tank 2 le SAC ralkap motor run 26 cu May 9 ah Falam in Kalaymyo lei ah an kal i, mengtung 63 ah an i din.
Lamkam hmunhma zohfelnak le thianhhlimhnak an tuah lio ah bomb puah an tong i, SAC ralkap zeimawzat an an thi. An ruak cu Falam peng Parte khua innchung ah an chiah hna i, an khangh hna, tiah an langhter. SAC ralkap hna cu mengtung 55 hmunhma hrawng ah bomb puahhnawh an ton ṭhan caah a thi mi le hliam tuar mi an um rih, tiah an cathanh ah an langhter chih.
Mengtung 45 hrawng an phak ah CNDF nih pa-de-ta bomb puahhnawh in an doh ṭhan hna caah SAC ralkap 4 an thi i, hliamhma pu zong an um. Mi ruak hna cu Zawnglay khua ah an khangh hna, tiah CNDF nih an thanh. CNDF nih mengtung 63 le mengtung 45 kar hmunhma zohfelnak an tuah lio ah SAC ralkap nih an kaltak mi MA kuan 120, 60 mm pakhat, kuanbawm pakhat an laak i,
nu thilri zong hmuh a si caah nu ralkap zong an i tel lai, tiah ruah a si ti in CNDF nih an langhter chih. SAC ralkap nih Falam peng Ramthlo khua inn 10, Tlangzar khua inn 17, Parte khua inn 7, Zawnglay khua inn 5 tiin, inn 39 cu nai hrawng ah an khangh cang. May 15, tiang a hnu bik thawng kan theih ning ah SAC ralkap hna cu Taingen khua an phan cang, tiah CNO/CNDF nih an thanh. Credit; The Chin Post
Thawngdang>>>>>>><<<<<<< India ram khualipi Delhi ah inn dot 4 pakhat cu May 13 ah a kangh caah minung 27 nak tlawm lo an thi i, 12 hliamhma an pu, tiah Emergency Services ṭuanvo ngeitu pakhat nih a chim. Meikangh hram aa thok ah hin Office chung ah minung 70 hrawng an um i Palik pawl nih thlalangawng an bauh i an va chanh hna.
Cu inn kaangmi cu Delhi in a hnulei Mankha vawilei tang tlanglawng dinhnak pawng ah a si i meithat mawṭaw 20 nih an phalh khawh cang. Mei hri a shot ruangah a kaangmi si, tiah theih a si. Inn kanghnak kong he pehtlai in palik nih minung pahnih an tlaih hna. Inn kanghnak in a thimi hna kong ah India Prime Minister Narendra Modi Ji nih a ngaihchiatnak kong a chim.
Cun a thimi hna ca ah minung pakhat dollar 2580 cio kan pek hna lai, tiah a chimchap. Mei cu kan phalh khawh cang ko nain a kaangmi thilri kan fimhlawm hna. A dot hnihnak a kanghmi hna ruak hi a tam bik tiah meithat lei ṭuanvo ngeitu pakhat nih a chim.
Be First to Comment