Press "Enter" to skip to content

Georgia i Biden nih buan a co mi a khupthal leh ter than dingin state legistlator an lungthin lak khawh vun i zuam

𝐆𝐞𝐨𝐫𝐠𝐢𝐚 𝐢 𝐁𝐢𝐝𝐞𝐧 𝐧𝐢𝐡 𝐁𝐮𝐚𝐧 𝐚 𝐂𝐨 𝐦𝐢 𝐚 𝐊𝐡𝐮𝐩𝐭𝐡𝐚𝐥 𝐋𝐞𝐡 𝐚𝐰𝐤𝐚𝐡 𝐁𝐚𝐰𝐦𝐜𝐡𝐚𝐧 𝐡𝐧𝐚, 𝐭𝐢𝐢𝐧 𝐓𝐫𝐮𝐦𝐩 𝐧𝐢𝐡 𝐆𝐞𝐨𝐫𝐠𝐢𝐚 𝐆𝐨𝐯𝐞𝐫𝐧𝐨𝐫 𝐚 𝐇𝐧𝐞𝐞𝐤
========================================================================================
Georgia i Biden nih buan a co mi a khupthal leh ter than dingin state legistlator an lungthin lak khawh vun i zuam, tiin Georiga Gov. Brian Kemp cu Saturday ah khan Trump nih phone in a hei hneek. Cu thawngpang a theitu source pakhat nih CNN ah a hei thanh chin. “Keimah a vun ka dirkamh te dingmi electors pawl thim hna dingin state legislator pawl special tonnak ngeihpi hna law, an lungthin laak khawh vun i zuam,” tiah Trump nih Kemp cu a hal. Cun, absentee ballot signatures zong audit tuah dingin nawl vun chuah lawlaw, tiah a chimh.

Cu bantuk audit tuah dingin nawlpeknak nawl ka ngei lo, cun, special tonnak tuah a ka fialmi zong ka tuah kho lai lo, tiah Kemp nih fianternak a tuah. Hi an i chonhnak thawngpang hi The Washington Post nih a thanh hmasami a si. Hi kong he pehtlaiin White House lei nih comment an tuah duh lo. Saturday ah khan Trump nih phone call conference a tuah i, cu lio ah cun Kemp le Georgia Secretary of State Brad Raffensperger cu faak takin a mawhchiat hna i, Georiga i absentee ballot cabawm pawl audit tuah dingin a fial hna. Hi kongah hin a hmanlo mi lawngte a chim. Signatures audit tuah dingin voi 3 khengte ka duhnak ka langhter bal cang, tiin tweeter in Kemp nih a hei leh ve. State legislators pawl special in tonnak tuahpiak dingin Trump nih Kemp a fial hi voihnih a si cang.

Kemp le Trump phone in an i chonhmi cu Kemp a aiawhbiachimtu Cody Hall nih fehternak a tuah ko nain, an biaruahmi kong an hal mi kong belte ah, Loeffler campaign staffer Harrison Deal a thihnak kong i Trump nih hnemhnak a tuahmi kong lawng a chim. January i Senate hmunhma a lawng dingmi a si cang caah, senate election ah Republican Sens. David Perdue le Kelly Loeffler dirkamh dingin Georgia lei panh in Trump ai thawh hlan deuh te ah a tu bantukin 2020 lecton results hnahnawhpek dingin Kemp a chonh hi a si. Election results cohlanpiak lo i a khupthal lehter than dingin Republican a si mi Kemp le Raffensperger hi President Trump nih zapi theih bakin a hneek hna, tiah tuan ah khan US media pawl nih a thanh bal cang.

State election an kalpi ning hnahnawhpek dingin Trump nih Kemp cu a hneek len ko nain, cu bantukin state governor pakhat nih electons hnahnawh pek cu Georgia law nih a onh lo, tiah tutan zarh ah Hall nih CNN ah a chim.
Zeibantuk a liannganmi order zong nih a khupthal lehpiak khawh a si ve lo mi elections cu elected constitutional officer a si mi Secretary of State nih a conghkhalhmi a si. Governor zong nih tu le tu a chim bangin, law hnung a zul peng ko rih lai i, cun ai tlak ningin karhlannak tuah dingin Scretary of State zong thazaang a pek ko rih lai. Khat le khat karlak ah i zumhraihnak nunter than dingah le ai buaipituk cangmi thil biapihla pawl tawlrel dingin le signature audit tuah dingin karhlannak tuah dingin a forhfial.

An party leader nih heh tiah a phomh len ko hna nain, Goergia GOP election officials nih cun Trump nih vote firnak a um, timi ralchanh in hmai an suang ko rih. Georgia ah hin Biden nih Trump hi vote 12,000 tlukin a thlau i, kum 30 chungah Democratic presidential nominee lakah amah hi Peach State ah bua a co hmasabik a si. State pumpi ah vote nemhnehnak an tuah mi zulh in, Nov. 20 ah khan Kemp zong nih cun Biden buan a co mi a phichuak namhnehpiaknak a tuah ve. State pumpi i audit an tuahmi ah hin 5 million ballots hrawng hi kut bakin an rel dih than hna.

Kemp hi Trump a thanh ngai tu a si ko nain, nai ah khan Trump nih Kemp cu “Mi hrut, nichuak minung” tiin phone in an i chonh lio ah a auh. “Kemp ka dirkamh mi hi ka ning lei a zak” tiin tutan zarh zongah, Fox News i interview an tuah lio ah Trump nih a chim. A hawikom tha a thih ruangah, Saturday zan i Valdosta, Georgia i Trump nih mipi tonnak a tuahmi ah Kemp hi tel ai tim lo, tiah Hall nih a chim. Georgia i mipi a ton lio hna i a chim deuh peng mi cu election a teinak kong le, Kemp a remlo nak kong a chim i, Senate thimnak zong hi fir a si te ko la, tiin a chim.

Trump nih Georgia election system hi a chimchiat peng i Kemp hi a doh peng ah cun, amah minung lila hi an thin a phawh te sual te khawhmi a si, tiah tuan ah khan CNN nih a chim bal. An chim bangin cun mipi tonnak ah cun Trump nih a tuah taktak. Supreme Court ah mah le minung tamter, phung kham chungnak an tuahmi donghter, second amendment rights hrawh, Congress ah Democatic votes tamdeuh in i tonenh khawhnak dingah Washington, DC le a dang state pawl ah hmunhma laa khawh ai timmi Democrat-controlled Senate hi Trump nih a saduhthah bangin a tuahto kho ti hna lo. Georiga i Senate thutdan pahnih co hi America khamh khawh nak dingah a nehhnungbik kuanfang a si, tiah Trump nih a ti mi zoh tikah, a lungchung tein election a sunghmi a cohlan, ti a lang. Chelsea Bawi

Be First to Comment

Leave a Reply

Your email address will not be published. Required fields are marked *