Press "Enter" to skip to content

GZ Nih Ralkap An Tei Kho Lai Maw? GZ nih nan tei hrimhrim lai, GY nih kan in zuan hnawh hna, GX nih an in dirkamh hna.

𝗚𝗭 𝗡𝗶𝗵 𝗥𝗮𝗹𝗸𝗮𝗽 𝗔𝗻 𝗧𝗲𝗶 𝗞𝗵𝗼 𝗟𝗮𝗶 𝗠𝗮𝘄? | Si Bawimang Lian (Hmuhning)
_________
Ralkap nih uknak an lak ni in Kawlram pumpi mino hna nih hriamnam la lo tein “You messed with the wrong generation” timi ca tar tu i ken in lam ah an chuak, cun social media in ralkap cu an doh hna. Mirang sin in luatnak hmuh hnu Ramkomh bu Kawlram kan zoh tikah ralkap nih uknak voi hnih 1962 le 1988 ah an rak lak le mipi nih an chut ṭhan kho hna lo. Hriam tlaih a rak chuak, nain an thleng kho lo. Generation Z (GZ) nih teh ralkap hi an tei lai maw?

GZ (1995-2010 kar chuak) pawl hi kanmah GY (1980-1994) pawl he kan idannak cu kum hra leng Democracy an tep manh, zalonnak timi an i ziak cang, technology he ai ṭhen kho ti lo ding tluk in an i ziak cang. Social Media le a zalenmi pehtlaihnak a thawtnam an thei tuk. Nunphung, biaknak le poliṭik, chawlehnak lei zong ah kaudeuhpi (Liberals) in khua a ruat kho deuh cangmi an si.

Cu tikah ralkap nih uknak an lak tikah an zalennak, a biapi ah an chiahmi thil, sining, ruahnak tibantuk caah dohduhnak he an herh bak ti lomi ralkap i uknak an lakmi hi an zohsawh kho ti lo. An hani ah zalonnak ai neh cang. Zalennak nakin man a ngeideuhmi sungh ding a um lo ti an i fiang.

GX le GY nih kan rak tonmi tuanbia pawl kha kum hra chung ai ongmi kar ah an rel, an hmuh, an theih cang. Cu tikah an fimdeuh hrimhrim. Lam an zawh zong ah an i timhtuah a ṭha, daihnak tein duhlonak an langhter ning an thiam tuk. VPN hmang in social media an hmanning, an lung ai rual tuk lio ah Kawlram i minthang minta-mintami hna nih an dirkamh hna. Ramchung-leng i bawm in ralkap an tuahsernak vawleipi an hmuhsak khawh.

GZ an hlawh tling lai tiah biahalnak hi fekte in ka leh. Zei can dah an dir khawh lai timi le zeitluk dah an tuar khawh lai timi hi a biapimi biahalnak cu a si. Atu ah palek le ralkap nih meithal puah an thawk, minung zong an thi cang. Mi tampi an tlaih cuahmah hna. Mi tampi an von con, a bik in GY le GX hi an con tiah ruah a si. Amahbelte ralkap hi ṭanpitu an ngei lo chin lengmang timi a langhtertu a si ve.

Tuchun hi uknak an lak ni 22nak a van si, le ram pumpi #CDM22222 hruainak in ralkap duhlonak an langhter rih lai tiah theih a si. A har ko lai, ṭih a nung ko lai. Asinain atu nakin ralkap nih uknak fekte in an tlaih khawh i a ralaimi kum 20 leng khi ruah ah ṭih a nungdeuh ti fiangte in an hmuh caah hluhchuah lakin an doh ko lai.

Culio i “2008 phunghram remh kan duh lo, kanmah party nih kan remh te lai.” ti te hna pumpak le political party min hler in rak aukhuan hi hnahnawk taktak a si. Hmailei poliṭik ca lam i serh chung men a si. Kawlram Myanmar kong ka ṭial tikah “Ramkomh Bu” ti hi ka telh lengmang: miphun, nunphung le biaknak fonh in sermi ram a si hi philh lo a herh. Atu ah Ralkap uknak kan doh i kan tei ko lai, cu tikah ramkomh bu miphun (mipi) hna lungtlinmi phunghram he Democracy ram cu kan ser ding a si ko timi theih a biapi.

GZ nih nan tei hrimhrim lai, GY nih kan in zuan hnawh hna, GX nih an in dirkamh hna.
Pathian nih in veng cio ko hna seh.

Crd: Teirial Catialtu
Foto/illustrate: GraphicMyanmar

Be First to Comment

Leave a Reply

Your email address will not be published. Required fields are marked *