Press "Enter" to skip to content

Hakha Ah A Ummi Dr. Lianhmung Sakhong Inn Cu Ralhrang Nih An Chuh

CNF Vice Chairman le NUG i Federal Affairs minister a simi Dr. Lian Hmung Sakhong inn, Hakha ah a ummi cu Oct 30, tuni ah ralhrangbu nih hramhram in an chuh i an khar tiah theih a si.

Dr. Lian Hmung Sakhong nih cun “Hakha i ka inn cu ralhrang nih an lak cang. Kan miphun le kan ram caah kan ngeihmi vialte kan pek. Kan inn le ngeihmi thilri hna cu ralhrang nih an lak khawh ko nain kan chungah a ummi dothlennak lungthin hi cu an fir kho lai lo. Khuachia le khuavang hna cu tih awk an um lo. Kan sinah Pathian a um ko” tiah a facebook ah a tial.

U Kyaw Moe Tun Nih Thantlang Kong UN Ah A Chim Colh: UN ah Myanmar palai a simi U Kyaw Moe Tun nih Thantlang inn a kaangmi kong cu UN ah a chim colh tiah theih a si. Ralhrang nih nawlngeihnak an lak ni in nifatin mipi nih harnak le sunghnak an tong lengmang. Thantlang ah ni nikhat ah inn za renglo an khang. Ralhrang data dingah hin UN hi nan tlai tuk cang tiah lungfak ngai in a chim.

UN le ramkip nih a si khawh chungin Myanmar mipi hna bawmh le kilven ding siseh mipi cungah thatlonak a tuah lengmangtu ralhrangbu dantat zokzok dingin siseh U Kyaw Moe Tun nih cun nawlnak a tuah fawn tiah BBC nih a tial.

Mandalay Ah Ralhrang An Tlaihmi Minung 3 Chungin 2 cu An Nunnak A Liam: Mandalay, Maharawngmay(မဟာအောင်မြေ) peng Tanhliathmaw (သံလျှက်မှော်) sangah ralhrang phu kut in tlaih a tong mi minung 3 chung ah , minung 2 cu October 28 zinglei ah an ruak in an hmuh hna.

October 27, zaan ah ralhrang phu nih Tanhliathmaw(သံလျှက်မှော်) sang Landon haukulh ah ummi U San Lwin, U Kyaw Htay le no.41/87 lam pawng ah a ummi Ko Moe Gyi cu an tlaih hna tiah khuachung mi hna nih an chim.

U San Lwin le U Kyaw Htay hna i an ruak cu khuachung helnak lam no.34/35 lamkar ah hmuh an si, ralhrang kut in nunnak a liammi hna an chungkhar cu ralhrang phu nih an ruak lak ding in thawng an thanh hna tiah theih a si.

“Tlaih a tongmi cu minung 3 an si, zeiruang dah tlaih an si cu theih a si lo, a tu ah minung 2 cu an nunnak a liam cang, a tang mi pakhat hi zeitin dah a um le khoika hmun a um zong theih a si lo” tiah sangchung um mi pakhat nih a chim. Nunnak a liammi U San Lwin le U Kyaw Htay hna i an ruak cung ah hremnak le tukvelhnak hmaneh an tak pum cung ah tamtuk a um tiah theih a si. Source: DVB.

Be First to Comment

Leave a Reply

Your email address will not be published.