Press "Enter" to skip to content

Hakha-CDF Le SAC Ralhrang Kahdohnak Thawng Fiang

Khuabe pawng le Hakhathar pawng Kahdohnak ah SAC Ralhrang 2 an Thi, Hliampu dang zong an Um. Nizaan November 15 zaanlei muika ah Hakha peng Khuabe pawng ah CDF-Hakha le SAC ralhrang karlak kahdohnak a chuak i, ralhrang pakhat a thi, tiah thawng kan theih.

“Nizaan muilai ah khan Khuabe lei ah anmah SAC ralhrang pawl an rak ttum i, kahdohnak a chuak. Ralhrang pakhat a thi i, pahnih fak ngaiin an i hliam,” tiah CDF hruaitu upa pakhat nih The Chin Journal ah a chim. Nizaan Khuabe lei ah a kalmi SAC ralhrang pawl an kir dih tthan cang caah kahdohnak a dai cang.

Nihin zinglein sml. 3:00 hrawng zong ah Hakhathar pawng ah kahdohnak a chuak tthan i SAC ralhrang pakhat a thi, a dang hliam a pumi pathum hrawng an um lai tiah kan zumh, tiah a cunglei CDF upa nih a chim chap. Nihin zinglei ah Thantlang SAC ralhrang sakhaan zong CNA ralkap bu pakhat nih an kal hnawh hna i an vung kah hna, tiah thawngpang kan theih. Crd; The Chin Journal

Hakha um harsa deuhmi bawmhnak tawlrel piak ding ah khrihfabu kip pastor bawmh kan hal hna i an kan cohlang, anmah nih an member lakah harsa deuh an timi an pek hna lai. Pastor hna kut ah bawmhnak ting 100 cu a phan cang. Aho dah an pek timi min cazin keimah sin pek than a hau lai lo, a tha bik nan ti ning in rak kan pek piak hram ko uh tiah pastor hna cu bawmh kan hal hna hi a si.

A kan bawmtu pastor dihlak cung ah ka lawm tuk. IBC le HBC pastor zong bawmh kan hal ve ko hna nain an i relrem deuh lo caah an kan bawm kho lo, an member lakah bawmhnak a cotu nan um lai lo caah kan theihthiam hram ko u tiah kan nawl ko hna, thleidan a si hrimhrim lo. Hmundang in bawmhnak a sawktu tampi nan um rih, bawmh a tlakmi cu a dang tein bawmh khawh ka rak i zuam ko lai. Crd; Salai Lungthli Tum

A vansang tukmi harsa caah bawmhnak ting 100 Kan duh lo tuk ko buin raltuk le virus nih kan miphun a kan den. Hlawhfa chom in ai cawm tawnmi, dawr hmete le sabuti dawrte tuah in paw ai cawmmi hna cu phaisa a luhnak ding a um ti lo. Ram thlennak caah tiah cozah riantha a chuah takmi an vansang cang.

Kei zeidah ka tuah? Mipi nih an ka huat ding le thah an ka duh lai timi ka ruah cia buin raltuk hrial ding ka aupi. Raltuk nih miphun a damter lai ka zum lo, miphun zawtnak a zualter chin lehlam lai tiah ka ruah caah asi.

Zeidah ka tuah rih lai? Pathian nih aka hlanh chungmi chawva chung in ting 100 hi ei awk harsa tukmi kan bawmh hna lai. A harsa hringhranmi chungkhar 200 kan bawmh hna lai, 50,000 cio in. Sawk ning cu keimah pumpak Facebook inbox ah ca nan ka kuat lai, nan harsat ning nan rak tial lai i keimah nih biachahnak ka tuah lai.

Phaisa luhnak a ngei lo i ramdang lei bawmhtu chungkhat zong a ngei bak lomi miharsa u-saa pek asi lai. Na min, na umnak khua le na phone number naka kuat chih lai. Bawmh a tlak tiah ka fehtermi cu ka minung nih na inn ah 50,000 an rak in pek ko lai.

Na pawngkam ah a harsa tuk i bawmh a herh ko tiah na ruahmi an um ahcun inbox ah ka theihter hram ko tiah careltu zaangfah kan nawl ko hna. Facebook ah aka doh lengmangtu nan si zong ah i phuhrung hram hlah u, ka chawn hram ko u, thleidan a um lai lo, miharsa bawmhnak a si. Dohtu le doh lotu thleidannak asi hrimhrim lo.Harsa mi sin a phak khawh nak hnga share ka bawm ve law. Crd; Salai Lungthli tum

Be First to Comment

Leave a Reply

Your email address will not be published.