Press "Enter" to skip to content

Hakha palek sakhaan in Palekbawi Tha Chin Sung le Dar Vang CDM an tuah, Chin Ramkulh ah palek CDM tuah mi 900 leng an si cang

Hakha palek sakhaan in Palekbawi Tha Chin Sung le Dar Vang CDM an tuah, Chin Ramkulh ah palek CDM tuah mi 900 leng an si cang
=============================
October 21, Hakha palek sakhaan in Deputy Chief of Police (Du-Ye-Oh) Tha Chin Sung le Police Sergeant (Ye-Tatkyat) Dar Vang cu CDM an tuah, tiah kan theih. “Atu cu a himnak hmun kan phan cang. Chin Ramkulh Peng 9 chung ah hin Paletwa dah ti lo Peng 8 chung in palek minung 900 renglo CDM a tuah cang mi kan si,” tiah Palekbawi Tha Chin Sung nih The Hakha Times ah a chim. Palekbawi Tha Chin Sung le Dang Van cu a luancia September 18 lio ah CDM a tuah mi an si i a himnak hmun an phan. The Hakha Times

thawngpang dang relchap : Falam-Hakha Kar A Zammi 3000 Leng An Si, Thutdirnak Tawlrel Piak An Herh Tuk

Falam-Hakha kar i SAC ralkap le mipi vengtu ralkap kahdohnak ruangah ramlak ah a tlizammi 3000 leng hna caah thutdirnak tawlrel piak an herh tuk tiah theih a si. Tuanvo ngeitu hna nih a raknak in hmunhma le umnak tawlrel piak dingin timhtuahnak an ngei cuahmah.

Oct 11 ah Kalaymyo in Chin ramkulh lei a kaimi SAC ralkap hna le CNA, CDF, CNDF kahdohnak fak ngai in a chuak. Oct 19 kahdohnak hnuah SAC ralkap nih an dh paoh in hriamngan an kah caah kahdohnak kiangkap ah a ummi Rialti, Thlanrawn, Taal, Tlangzar, Ramthlo, Dokthek le Chuncung khuami hna cu khuami dihlak ti awk in ramlak ah an tlizam hna. Cu Rih kalnak lam pawng i a ummi khau cheukhat hna zong khuami dihlak in an zam hna tiah theih a si fawn.

Falam in a tlizammi hna bawmchantu pakhat nih cun ”Lampi kam i a ummi khua 4 nih an tuar. An khua 4 ningin an zam dih. Ramlak ah harsa ngai in an um. Muka an i chinh i cuticun an um hna. Cuti an ummi cu CDF sakhan ah a ruah sual ahcun pakhat khat a cang khomi a si. Milu 3500 hrawng an si” tiah a chim.

Lam lak ah a taangmi SAC ralkap hna cu Oct 20, nizan zanlei ah Hakha ah an lut. Rialti, Thlanrawn le Taal khua hna ah inn zeimawzat an khangh. Cu pinah Tlangzar le Ramthlo khua inn cheukhat cu an baoh i thilri an lak tiah theih a si.

Falam-Hakha kar kahdohnak ah CNA/CDF/CNDF nih SAC ralkap 20 an thah hna i an mawtaw 16 an hrawhpiak hna. CNA lei in Sergeant Aung Lin Tin nih ram le miphun caah a nunnak a pek ve. By. Salai CP Lian

Be First to Comment

Leave a Reply

Your email address will not be published.