Press "Enter" to skip to content

Hinthada ah USDP pawl le khua chung mi NLD tanhtu pawl an buai i minung 14 nih hliamhma fakngai an tuar

Irrawaddy ramthen, Hinthada khuapi ah nizan October 11 ni ah USDP dirpitu pawl khua chung ah an mah leitang minung kawl in an vahveih nak ah NLD ditpitu pawl cu lung le fei in an vuak hna, an den hna i an thuat hna ruangah NLD dirpitu minung 14 hrawng nih hliamhma faktuk in.an tuar tiah thawngtheih a si.

USDP pawl hi minung 2000 hrawng an si i Hinthada khuachung ah an vak thluahmah i Tha Kyuah khua an va phanh tik ah cun NLD angki ai hruktu pawl, NLD min ai tartu pawl an inn cu, USDP lei pawl nih an thin a hang i an va luh hnawh hna thir le fei, lung in an va den hna i minung 14 nih hliamhma faktuk an tuar tiah Hinthada NLD lei nih an chim.

Hinthada NLD party i thawngthanh tu U Kyaw Ziyah Oo nih, “USDP minung pawl nih Hinthada khuachung an tawl nak ah NLD hla a rak chuah tu inn hmai an phanh tik ah an kaa in faktuk in an hro hna cun, a hnu ah lung in an cheh hna minung 14 bak nih hliamhma faktuk an tuar tiah a chim.

USDP dirpitu pawl nih lung i an den mi hna khuachung minung 14 pawl cu an lu kuai, thihnai chuak in hliam an tuar i an inn pawl zong an hrawh piak hna. 2020 i thim nak ah hin, Irrawaddy ramthen ah tu hi a vawi khatnak a si.

Tha Kyuah khuami U Mya Aye nih cun, “Khaw chung hel i a vak mi pawl zoh dingin inn lengah ka va dak, cu bak ah cun USDP pawl nih fung in an rak ka tuk chih len ko tiah a chim.Hliamhma tuar pawl hi NLD chungtel ngaingai zong si loin party dirpitu menmen an si i minung 13 hi hliama an tuar ning ai nin deuh caah Hinthada sizung lei nih cun an thah cang hna. asinain mizawi pa1 lawngte sizung ah zualhma tuk in a um rih,” tiah a chim.

Hinthada USDP thawngthanhtu U Htee Win nih cun, “minung kawl in kan vahnak ah khua 100 renglo ah hin cuticun buainak kan tong bal loh. Tha Kyuah khuami pawl nih hin kut an kan thlak hmasa. Lamphah nak lung a hak mi in an kan den hmasa, nan zumh lo asi ah cun, video file zong kan neih ko. Lung in an kan den hmasa ruang ah kan minung pawl nih an i sum kho ti loh i an thuat ve nak hnana zi tiah a chim ve.

Nizan ahkhan NLD lei i hliamhma a tuar mi minung 14 pawl nih cun Hinthada palik sakhan ah report nak an rak tuah i, palik pawl zong nih hi an buainak hi buaipi ding le tawlrel pi ding in an lung a tling ve ko. Irrawaddy ramthen ah November 8 i i thim nak a neih cang bantuk in, NLD le USDP lei dirpitu pawl thawngpang zong a fak bak i, mipi relcawk lo nih thazang chuah in, minung kawl le thazang chuah in an i chawk zungzal ko tiah theih a si.

Be First to Comment

Leave a Reply

Your email address will not be published. Required fields are marked *