Press "Enter" to skip to content

India Union Home Minister Cu Myanmar mipi tanpi dingin Mizoram MP pa (2) Nih An Office Ah An Va Nawl Hna Tiah Theih A si

Myanmar Refugee kong ah Mizoram State Cozah palai hna nih India Union Home Minister an ton.
============================================

Myanmar Ralkap nih hramhramin uknak lak duhlonak langhternak cu rampi huapin pehzulh lengmang a si bantukin CDM ah an tel ruangah an sahimnak caah India, Mizoram lei a rak zammi zong an karh chin lengmang.

Mah kong he pehtlaihin Mizoram Chief Minister Village Council le NGO hna nih kan unau pawl harsatnak ah a herhningin kan zohkhenh hna lai tiah thawngthanhnak zong an tuah cio hna.

A sinain, Central Cozah nih a cohlang lo caah, Assam Riffle pawlcu ralzam pawl lutter lo dingin ramri ah acongh ter hna pinah a rak lut cia mi hna zong kuat tthan dingin Mizoram cozah sinah nawl a pek hna.

Mah kong he pehtlaihin Mizoram (Raja Sabha MP) nih Union Home Minister le Parliament House zongah achimh. Central Cozah leiin zeihmanh aw-ang an ngei lo caah ni hin 19.3.2021 ni ah Mizoram Chief Minister Pu Zoramthanga hmalaknakin Mizoram MP pa (2) a si mi Lok Sabha MP Pu Lalrosanga, Raja Sabha MP Pu Vanlalvena hoin State Planning Board Vice Chairman Pu H. Rammawia, MNF Advisor Pu Rosangzuala hna cu Union Minister of State for Home Nityanand Rai zungah an va ton hna i; –

Ralkap hnehsaknak ruangah harsatnak fakpiin atuar lio mi Myanmar mipi tanpi dingin India nih a tu nak fakin a cawlcang a herh ning, India lei a rak lut mi ralzam hna khirh rih loin aherhningin zohkhenh ding leh Mipi an cawlcangnak cungah India nih a tu nakin thlawp deuh aherh tiah Home Minister sinah an chimh tiah Mizoram Government, Department of Information and Public Relations nih achimh.

Atu hi kan ram buainak ruangah Mizoram lei a rak zam mi hi minung 400 renglo an si cang. Cheukhat hna cu chungkhar he an si. Lamhla taktakin a ra mi zong an um. Ramri ah Assam Riffle an um caah lutchuak zong a har ngai, Ralzam kong hi Mizoram cozah nawl ngeihnak a si lo caah NGO le khuami hna nih an si khawh tawkin an zohkhenh hna I, CDM Supporting caah dirhmi bu hna zong nih an phak tawk tein an bawmh ve hna.

Hi kongah ramchung ramleng Chin mi hna zong atu nakin thazaang chuahkhawh I zuam chin hna u sih.

Crd: Chin Post

Be First to Comment

Leave a Reply

Your email address will not be published. Required fields are marked *