Press "Enter" to skip to content

Khua Pi Ningin Inn Tamtuk An Khangh Tu Ralhrang 36 Hrawng an kir Lei ah An Thi

Sagaing ramṭhen, Myinmu (မြင်းမူ) peng Watjah(ဝက်ကျ), Ganyin(ကန်ရင်း) le Malayta(မလဲသာ) khua hna luhhnawh in a khangtu SAC ralkap hna cu tualchung hriamtlai phufonh nih an kahdoh hna caah SAC ralkap 21 an thi, tiah People’s Defence Force – South Monywa sin in theih a si.

Nihin May 3, ah SAC ralkap hna cu Myinmu peng Padatthai(ပဒတ်ထိုင်း) khua an phak lio ah tualchung hriamtlai phufonh nih an kahdoh hna. Rallam a sialtu SAC ralkap hna cu Black Dragon Special Task Force, Golden Eagle Force – Monywa, Black Dragon Special Task Force, Golden Eagle Force Monywa, Ayadaw tualchung hriamtlai phu hna le Monywa Fighter Group (MFG) phufonh hna nih an doh hna, tiah theih a si.

Cun, Yangon ramṭhen Gawhmu peng Hngatawsan(ငှက်အော်စမ်း) khua pawng ah SAC ralkap motor ruun cu tualchung hriamtlai phu nih nihin May 3, chunhnu suimilam 3:30 ah bomb puahhnawh in an doh hna caah ralbawi bo 3 pakhat telh in minung 2 an thi i, 2 nih hliamhma an tuar. Hliamh a tuar mi hna cu Yangon lei ah an kalpi hna, tiah theih a si.

SAC ralkap 100 hrawng cu nizan, May 2 zaan ah Sagaing ramṭhen KhinOo peng Inpat (အင်းပတ်) khua luhnak lam ah bomb puahhnawh an ton caah SAC ralkap 15 an thi i, midang 7 cu fak ngai in hliamhma an tuar, tiah theih a si. Bomb puahnak ah SAC ralkap motor 2 cu kan hliamh, tiah KhinOo tualchung hriamtlai phu in ṭuanvo ngeitu bu Tan Ma Nih nih The 74 Media ah a chim.

“SAC ralkap cu motor 3 he minung thazaang 100 hrawng an si. KhinOo pengchung um mi khua 3 an ṭawl hnu an kirlei ah bomb puahhnawh in kan doh hna i, motor 2 cu kan hliamh,” tiah a chim. Bomb puahhnawh in doh a tong mi SAC ralkap hna nih Inpat (အင်းပတ်) khua, Tayatpin (သရက်ပင်) khua le Gyapinai(ကြာပင်အိုင်) khuachung mei in an khangh hnu, an kir lei ah bomb puahhnawh an ton hi a si, tiah a chim chap.

Atu tiang ah KhinOo pengchung SAC ralkap nih an khangh mi inn hi 1,000 tluk an si cang i, ralzaam dirhmun in a um mi hi minung 10,000 hrawng an si cang caah eiding le herhhai bawmhchanh an herh ngai tiah theih a si. A luancia April 30 ah KhinOo peng Pinthawng(ပျဥ်ထောင်) khua pyusawthi le tualchung hriamtlai phu kar kahdohnak ah tualchung hriamtlai phu lei in minung 5 an nunnak a liam, tiah theih a si. The Chin Post

Be First to Comment

Leave a Reply

Your email address will not be published. Required fields are marked *