Press "Enter" to skip to content

Iran scientist Mohsen Fakhrizadeh Thah A Sining Le Israel Sualpuh Khawh A Sining

Chelsea bawi:-Iran scientist Mohsen Fakhrizadeh cu Friday ah khan thah a tong. A sining a thuh peng i, a kum tiang hmanh hin theih fian khawh a si lo. Asinain, caansaupi chung theih a si cang mi a thlithup i nuclear hriamnaam sernak program an tuahmi ah hin amah hi hruaitu a si theu lai, tiah zumh a si.Ballistic missle ah nuclear warhead bunh kho dingin le, nuclear hriamnaam le uranium thehnhnak caah hma a tlakmi hmual a ngei taktak in a puak kho mi thiri pawl test a thlitein test a tuahtu hi amah Fakhrizadeh hi a si theu lai, tiah UN International Atomic Energy Agency (IAEA) nih an lunghrimh.Cu bantuk program cu kan ngeih bal hrimhrim lo, cun bomb tuah hrimhrim zong kan duhmi a si bal lo, tiah Iran nih an i pheh. Nucler hriamnaam sikhawhnak lam a ngeimi program hi an i ngeih bal. Asinain, 2003 ah an maak than, tiah IAEA le US intelligence agencies nih an zumhnak an chim.Hriamnaam sernak program hi Iran nih a vun pehzulh than ko rua, tiin Western an lung a hring ngai. Asinain, a cung i phihkharnak an tuahmi lakpiak than i anih (Iran) zong nih a nuclear sernak rian ngol ve dingin 2015 lio i vawleicung ram thawngthabik pawl he nuclear deal an tuah lio ah khan Western ram pawl an lunghrinmi hi an i hmaitlakbik mi biasu a si.

Cu nuclear deal cu Iran a ral nganbik a si mi Israel nih faktaktak in a doh i, 2018 ah khan Trump nih nuclear deal a chuahtaak colh ve.Fakhrizadeh hi thatein kilven le mipi sinin humzualmi a si ko nain, a tu bantuk i thah a tonmi hi Iran caah cun zatlak ngaingai a si. A zaka a rolhtu ding scientists kan i ngeih rih ko hna, tiin Iran officials nih an chim.“Fakhrizaden thah a tonmi hi phu kan hlampiak hrimhrim lai. Cun Martyr in a thimi Fakhrizadeh nih scientific le technical rian a tlaihmi viatle pehzulh khawhpiak dingin official nih thazaang nan chuah hrimhrim hau,” tiin Saturday ah khan Iran i top authority a si mi Supreme Leader Ayatollah Ali Khamenei nih biakamnak a tuah.2015 nuclear deal US nih a chuahtak hnu in Iran nih a nuclear sernak rian cak emem in kalpi a thok colh ve i, uranium thenhnak le sernak kongah lungtlinnak min an thutmi lonh in a ser. Uranium hi bomb thilri ah hman khawhmi a si. Asinain, 2015 hlan i hriamnaam sernak inn le lo ai ngeihmi zat cu nihin tiangah cun ai ngeih kho rih lo, tiah theih a si.

𝗔 𝗯𝗶𝗮𝗽𝗶𝗯𝗶𝗸𝗺𝗶 𝘁𝘂𝗮𝗻𝘃𝗼: Fakhrizadeh hi vai thupnawk peng ko hmanh sehlaw, AMAD Plan a hruaitu a si theu lai, tiin 2011 ah khan IAEA nih an rak lunghrim diam cang. AMAD Plan an dirhnak hi kum 20 lenglo a si cang i, nuclear hriamnaam ser khawhnak dingah a herhbikmi thilri a tawlreltu phu a si.Cu ralhriamnaam sernak program cu 2003 ah khan an maak diam cang, tiah ruah a si ko nain, IAEA nih 2011 i report an tuah ningah, a cheukhat an rian cu pehzulh a si peng ko rih in an chim. Cu rian i hruaitu dirhmun ai ngeihtu hi Fakhrizadeh a si, tiah an chim.
Cu ti a cheukhat rian an pehzulhmi zong cu 2009 in khan cun an mak than cang, tiah IAEA nih 2015 i a donghnak tahnak (zohfelnak) an tuahmi ah an langhter. 2015 report ah min a langmi scientist cu amah Fakhrizadeh lawnglawng hi a si.Nuclear deal ah an i hmaithlaakbikmi hriamnaam sernak rian pakhat cu Iran nih a tlaihbawh peng ko rih i, nuclear deal an tuah dih hnu kum khat, asiloah thla hnih thum chungah bomb serchuah khawh an i tim. Cu ti serchuah khawhnak dingah cun a zatawk in caan an i ngeih khawh an herh, tiah IAEA report nih a chim.

Trump White House a phaak i Iran nuclear deal doh dingin biakamnak a tuah hnu in khan, Iran nih a liamcia caan chung i a nuclear sernak vialte kongah lih a chim, tiah Israel nih campaign a vun thok colh ve.“Cuhlan i kan theih tawnmi nakin a let tam in Tehran hi rian tamtuk a rak tuan. Cu a tuanmi vialte an tialmi Iran capar pawl an hmanthlak tor le cheng Israel nih kan tlaih,” tiah 2018 ah khan Israel Prime Minister Benjamine Netanyahu nih thawng a thanh.A tlaihmi hmanthlaak pawl tamdeuh cu IAEA le an hawikom a hei hromh chin ve hna. Israel nih an tlaihmi hmanthlaak ah hin 2000 detka hrawnghrang i Fakhrizadeh nih a hruaimi AMAD Plan nih an tuanmi kongah tampi theihchapmi an um, tiah Diplomats pawl nih an chim.“Fakhrizadeh, timi min hi vun i cinken u,” tiin 2018 lio i capar in langhternak a tuahmi ah Netanyahu nih a chim.

𝗩𝗮𝘄𝗹𝗲𝗶𝘁𝗮𝗻𝗴 𝗰𝗮𝘄𝗹𝗰𝗮𝗻𝗴𝗵𝗻𝗮𝗸:Cu hnu thokin cun, AMAD Plan he pehtlaihnak an ngei theu lai, tiin an lunghrimmi hmunhma tamial cu IAEA nih a vung zoh colh ve hna i, tuan i Iran nih thawng a thanhmi le IAEA nih an hmuhchapmi thawngpang ai dannak tete a um. Asinain, nihin tiangah cun hriamnam an sernak biapimi hmunhma thar kong IAEA nih an langhter rih lo, tiah Diplomats nih an chim.“Iran nih nuclear hriamnaam ser dingin i tim taktak sehlaw teh, zeican dah ai rauh lai?” timi biahalnak hi theihfian khawh a si lo.Iran nih uranium thenhnak ah an hmanbikmi hmun Natanz hi vawlei tangah a si i, cunglei in kah khawh lo dingin an sakmi a si. Nuclear deal an tuah ruangah 2015 hlan i hriamnaam serchuah khawhnak thazaang an i ngeihmi chungin tlawmte lawng hi Natanz ah pehzulh in an kalpi khawh cang. Asinain, a tu hi a dang hriamnaam sernak le dirhmun niam deuh vak in an thenhmi uranium chiahnak inn le lo a dirh chap lio pi a si.Uraniam a thenh khotu seh tam chinchin in vawleitang sehzung lei ah a thial cang hna. “Fakhrizadeh a thihmi hi Iran caah zatlak ngai a si. January lio i US drone nih an top commander Soleimani a thahpiak hna bantuk tlukin a faak lai dah,” tiin German Marshall Fund le Columbia University ah Middle East research a tuahtu Ariane Tabatabia nih a chim.“Iran nuclear rian dihtoh dingin nuclear sernak inn le lo a dirhpiak mi hna hi a hram a fehtuk cang caah, Fakhrizadeh a thihnak nih hin Iran i nuclear ser ai timhmi rian hi a hnuarsuang hlei lai lo,” tiin a chim.Cu bantuk tein cun Iran officails zong nih an chim ve. “Fakhrizadeh nih hin a rian pehzultu ding sceintists pawl phu a ser manh hna,” tiah Fereydoon Abbasi nih a chim. Anih hi Iran nuclear scientist le cun Iran’s Atomic Energy Organization hruaitu hlun a si i, 2010 lio ah assassination in a luatmi a si. Credit: Chelsea bawi.

Be First to Comment

Leave a Reply

Your email address will not be published. Required fields are marked *