Kahdohnak Thawngpang

Sagaing ramthen, Swebo peng ah January thlachung ah ralhrang le mizapi vengtu ralkap karlak kahdohnak ah ralhrang 43 an thi i tamlakte hliam an tuar, tiah Snake Eyes mizapi vengtu ralkap phu nih an chim. January thlachung ah ralhrang phu hna cu mizapi vengtu ralkap a si mi SNAKE EYE-PDF ( SHWEBO )C& T(SHWEBO ),

Pah-khah-Phah phu hna nih hmaitonh in voi 2 le bomb in voi 2 kan kah hna, tiah Snake Eyes mizapi vengtu ralkap phu in chimphuannak nawlngeitu nih a chim. Bomb puah ruangah January 19 ah ralhrang 10 an thi i, January 20 ni ah 15, January 24 ah 15, January 28 ah 3 an thi, tiah theih a si. January thlachung ah ralhrang a thi mi dihlak hi 43 an si, tiah a chim.

January 28 kahdohnak ah mizapi vengtu ralkap lei in minung 1 hliam a tuar i, a nunnak caah thinphan ding um lo tiah a chim. Ralhrang nih khuate chungah aa dor mi le aa thup mi mipi hna cu an tlaih hna i an thah hna. Shwebo peng Yua Soe (ရွာစိုး) khua i khua mi 2 le Pauh Chai (‌ေပါက်ချိုင်) khua ah khua mi 2 zong ralhrang kut in an thi. Khuachung mizapi hna cu ralhrang hna nih an tlaih i an thah hna,

mipi inn hna cu an hrawh i an duah hna caah Shwebo peng chung khua 20 hrawng mipi cu a himnak hmun ah an zaam, tiah tleih a si. Shwebo peng January kandohnak hna ah ralhrang a thi mi le a hliam mi kong he pehtlai in ralhrang phu lei nih thawng an thanh mi um rih lo . DVB, The Chin Post

Rakhine ramkulh, Sittwe khua ah nihin January 31, zingka 9:00am hrawng ah ralhrang in pension a la cang mi hna le ralhrang chungkhar hna i fonh in ralhrang cohlannak lam an zawh. Cu ralhrang cohlannak lam a zawh mi cu minung 500-1000 kar an si i Sittwe khua, Vanlawng tual in lamzawhnak an thawk i Waybali(ဝေဘာလီ) tiang, May-Yuh lam hrawn in lam an zawh, tiah theih a si.

Ralhrang cohlannak lamzawhnak ah aa tel mi Sittwe khua, Aungmingalar sang ah a um mi U Khin Hlaing nih, “Nizan ah kan sang chung ah loud speaker in thaizing lamzawh a si lai, tiah thawng an kan thanh i lam kan zawh. Kanmah ralkap in pension a la cang mi pawl le ralhrang chungkhar mi cheukhat zong lamzawh ah an i tel,” tiah a chim. Tu bantuk in ralhrang cohlannak lamzawhnak ah NUG le PDF kan herh hna lo, tiah lamzawh mi nih lam thluan ah an au, tiah theih a si. Crd; The Chin Post