Press "Enter" to skip to content

Kan Mak Ko : Mizapi Vote Lawng Duh Tung I Harnak Ton Caan Ah Zamtaktu MP MLA

Zingzan in Myannmar ramchung ah Ralkap duhlonak langtertu mizapi cawlcangh ka zoh. Mizapi an cawlcangh tha ngai te. Lung a hmui.Chin state ah mizapi zong nih duhlonak an langter. Upat kan pek hna. Teinak hmu ko hna seh. 2020 thimnak ah NLD le Party dang in MP/ MLA a cuhmi pawl mui a langlo ti a si. Mizapi vote cu an duh tuk nain harnak chung kan luh um lio le kan ton can ah an kan tlau tak dih. Tuphawi eih Cenghngia cu anmah pawl kha an si ko. Ei lawng chuak le tuanza timi cu anmah bak an si. Miphun le ram dawttu si loin mah le chungkhar lawng a dawtu an si. Ram tizu lawng dawp duh tung i harnak ton can ah a ziaphelmi tihnung an si.

Hruaitu tha le miphun le ram a daw taktak mi hna cu ram le miphun nih thatnak hmuh ah an i lawm i harnak le buainak toncan ah harnak le retheih tuar in mizapi hmai ah an kal an dir. Mizapi caah retheih an tuar. Dawtu taktak cu harnak ton can ah an lang tawn.Tutan kawlram buainak hi mizapi uknak le Ralkap umnak a paih lio pi a si. Mizapi nih maw kan tei lai, Ralkap nih dah? Ralkap uknak chiatkhat le thatlo cu ram mizapi nih kan ton tuar tuk cangmi a si. Ralkap nih hram2 in uknak a tleih chungah Ram a tlakchiat ning le mizapi kan retheih ning le sifah ning cu chimpit a si. Tutan ah mizapi uknak le ralkap uknak a paihnak ah Ralkap nih hriammam le thazaang a hman. Mizapi nih lungrualnak kan hman thiam a herh tuk ve.

Mizapi nih zeitin dah kan doh lai.Ralkap uknak a ho hmanh nih cohlan lo ding. Mizapi nih teinak kan hmuhnak ding ah lungrual tein ralkap uknak lakmi doh cio ding. Cozah riantuan department kip nih office kai lo, Ralkap nih uknak ding rian pekmi cohlan lo, dictors le nurses, siang ca chimtu hna nih office kai lo le Actors & Actress, mirum le mizapi hna nih lungrual le raltha tein kan doh ahcun kan tei hrim2 lai. Mizapi nih duhlonak langhter mi Belkheng tum, kutdong pathup hmuhsak le Lamzawh duhlonak langter zong hi a biapi tuk.Ralkap thazaang hmang in uknak hramhram in a la tu Myn Aung Hlian nih rian khihmi kawl le a bik in tlangcungmi nih cohlan bak lo ding a biapi tuk fswn.

Cozah riantuan kip nih rian kan tuan lo ahcun zeiti hmanh in ralkap nih uknak a kalpi kho lai lo. Mizapi lungrual le raltha tein kan i funfom can a tu hi a si. Lungrual tein kan doh ahcun kan tei hrimhrim lai. Mizapi nih kan tei ahcun ralkap sermi 2008 phunghrampi kan hlawt lai i zauk phung hrambunh in rampi phunghrampi kan sir khawh lai zumh a um. Tlangcung mi nih kan duhmi Federal Democracy zong kan hmuh lai tiah zumh a um ngai. Ralkap nih a tei ahcun Ralkap kuttang ah um thai a fawi. Teinak cu Pathian ta a si.Kan ram cu mizapi ta a si. Mizapi nih teinak kan hmuhbak ding ah lungrualte le ralthate in tangti cio hna u sih. Kan ram ah luatnak le deihnak a um khawhnak ding hnga Pathian nih teinak kan pe ko seh. Credit:Mc Dawt

Be First to Comment

Leave a Reply

Your email address will not be published. Required fields are marked *