Press "Enter" to skip to content

Kan Thlacamnak Thawngin Kan Ram Uk Naak A Ttha Bal Lai Loh!!!

Kan Thlacamnak Thawngin Kan Ram Uk Naak A Ttha Bal Lai Loh!!! Hi catlaang taar riangmang in ka ttialnak a sullam hi, tampi ka ruah lengmang tikah a tubantuk hin ka ttialnak a si i, hi ka ttial ruang ah hin, Thlacamnak ngeih lo ding ti khi kai tinh mi a si lo ti mi nan ka theih piaknak lai kan nawl hmasa hna.

Kan bia ah ka luut lai: Khrihfa a si mi nih cun kan zumhnak lam a kan hruaitu, Bible hi kan rel cio hrimhrim ka zumh i, kei zong nih ka rel ve i, cu ka relnak thawngin ttial ka timh mi a si i, hi ka ttial mi hi Bible he ai kalh a ti mi nan um ahcun ai kalh nan tinak Bible cacaang te kha cpment ah nan van ttialnak lai kan nawl chih fawn hna.

Kan Bible chung i Biakam hlun kan zoh tikah, Pathian nih,”Ka fa a ti mi hna, Israel miphun hna nih sualnak an tuah lengmang i,”Pathian duhning an nunlo paoh ah a hrem hna i, Miphun dang sal tiang a tlaakter tawn hna i,miphun dang sal an taannak hmun in an,”Pathian cu an kawh i,”Bawipa kan ram ah kan kirter tthan ko tiin an sual an i ngaichih i thla an camnak cu,Pathian nih a theihpi hna i,miphun dang kut chungin a chuah tawn hnanak kong kan hmuh.Hi a chuahnak hna kong i a langsar bik mi,Izip sal i kum 400 renglo tluk sal i an taannak ah khan a chuahtu dingah,Israel mi lila Moses kha ,Pathian nih cun a kawh i,a u Aron he ttangti in Izip ram cun Israel mi cu an chuahpinak hna kong kan hmuh.

A tu Biakamthar chan kan zoh lai.Pathian fapa Jesuh cu Hi vawlei misual a kan tlanhtu dingah ,Pathian nih a rak thlah i,hi vawlei ah hin kum 33 tluk a um i,kha a um lio ah khan kum 3 chung tluk a thlahtu,Pathian rian cu a ttuan i,a thlahtu pa kong a chim lengmang tikah Judah mi lila nih an zumlo i,Pathian a serhsat tiin Rome ralkap hna sinah an chanh i,ngeihlahbu tein Kalvary/Luruhtlang ti mi ahcun Vailam in an tah i a thi.

“Jesuh nih khan,”Ka Pathian Ka Pathian zeicadah na ka kal tak,a ti.A Pathian nih cun a kal taak cang caah thihnak in a luat kho lo i,misual mi hna nih cun Vailam ah an thah bak ko khah.Jesuh nih khan a thih hlan ah a zultu hna sinahMathai 28 chung le Marka 16 chung ah khan tihin a chimh taak hna.”Khuazakip ah kal i,Khrih Thawngtha kha an chim i,an zumh ahcun an nun lainak kong kha nan chim lai tiah a rohtak hna.

“Jesuh cu a thi i nithum hnu ah thihnak nih a tleih khawhlo caah a tho tthan.Jesuh a thawhtthan hnu ah khan a zultu hna sin le nu hanb sinah ai langhnak kong zong Bible ah kan hmuh.Jesuh cu a pa sinah,Van ah a kai cang.Cucaah a zultu hna nih,”Jesuh i a cahtak hna bantuk in Khrih Thawngtha cu chim hram an thawk i,khuazakip ah Thawngha chim ahcun an kal cio hna.

Jesuh thawngtha a chim lengmang mi ,Staven zong kha,Pathian sinah thla a cam lengmang mi a si ko nain,Khrih a zumlo mi hna nih lung bak in thi lak an cheh.Hibantuk in,Jesuh a zumtu paoh kha an dihlak in sar thih in an thi,A cheu cu fei in an thah hna i,a cheu cu,a pittaling hna in vailam an tah hna i an thah hna.

Kha lio ah khan,Jesuh a zultu hna nih khan,”Bawipa kan khamh tuah tiah thla an cam ve hrimhrim ko lai.Hi kong ah thil pakhat nan chim ding mi cu,Peter thong a tlak lio ah khan,Nupawl thla an cam i a luat ko kha teh nan ti ka zumh.Cun,Pawl le Sailas zong an luat ki kha teh nan ti men lai.Kha an luat tan kha cu si e,an luat.Asinain a hnu ah sar thih in pei an thih ko kha ti hi lehnak a si ve hnga.

Cucaah ka bia tlaangpi ah kal usilaw,Ram pakhat uknak ttha lo nih a uknak kong te hna ah hin cun,Bawipa hi aithlaak bal lai lo ti hi zumn ko.Hi ram uknak a ttha lo mi cu chim lo,a mah nih chim u tiah a ti taak mi,an chim ko zong ah a chimtu hmanh an taksa khamhlo in,a cheu an thah hna,a cheu thong an thlaak hna,an inn le an lo tiang hmanh in an hrawh piak hna cu mu!,,,,

Kan ram nih luatnak kan hmuh khawhnak ding ah hin cun,kan miphun kan i lungrual i,kan ttantti i,kan hruaitu hna nih miphun dang a tthawng mi kawp le ttuanpi an thiam lawnglawng ah kan ram le miphun nih miphunb dang kut in luatnak cu kan hmuh te ding khi a si.”Bawipa,”Min AUng Hlaing uknak ttha lo khi kan hrawh piak tiah cam leen hmanh law,na thlacamnak thawngin a hrawk lai lo.Mian Aung Hlaing hi a doh kan thiam lawnglawng ah kan luat te ding tu khi a si. Credit: Pu Tin Duh Thang

US Supreme Court nih Roe v. Wade a Khupthal a Leh; Ram Pumpihuap Nauhrawh Khawhnak Nuhrincovo a Donghter1973 lio tein Roe v. Wade timi nunau nih nauhrawh khawhnak nawl.(rights) an i ngeihmi cu Friday ah khan US Supreme Court nih a khupthal an leh, tiah theih a si.

“Tutan karhlannak nih hin America um nunau million tampi hna an nunnak fakpiin a lehthlen te lai, cun thinlung i thentuk cangmi kan ram ah thenhmalnak faak chinchin in a chuahter te lai,” tiin President Biden nih a chimchiat ngaingai.

Zarh 15 a tling cangmi paw chung nau hrawh lo dingin Mississippi phung (law) an sermi cu Reublican nih an dirpi. Roe cu vote 5-4 in Conservative nih an thilh i, Conservative Chief Justice John Roberts zong nih Roe thilhnak dingah a hlei in karhlannak tuah hau ti lo in, Mississipi law dirpi colh dingin capar in a duhnak a langhter, tiah theih a si.

Tutan biachahnak nih hin Supreme Court a himnak a hnuarsuan te ding lawng si lo in, November election ah Biden i a democratic hawile nih Congress an i humzual khawh lai le khawh lai lo lai a reltu zong a si te kho mi a si. Cun cansau pi chung an hman cangmi a dang nihrincovo pawl zong thlen duhnak, i timhnak kutka thar a awngtu hna a si kho mi a si.

Cuhlan i American democractic system caah thialkam khawh lo in suttung bangin a dirmi Supreme Courth a dirhmun kongkau zongah tutan biachahnak nih alhnialnak tampi a chuahpi te khawh mi a si. Asinain, nihin ah cun a kong le lam tampi he pehtlaiin, SC hi faktuk lehpekin tuahmi biachahnak tangah a pil cuahmah cang.

States pawl nih nauhrawh kham khawhnak nawl an i ngeihmi a nunter. State 22 cu nauhrawh an kham lai le kham lai lo an i fiang rih lo. Mississippi telh in a dang state 13 belte nih cun Roe thilh in nauhrawh kham dingin bia an chah.

Nauhrawh he ai pehtlai mi a dang nuhrincovo pawl zong a hnursuan lai phan a um cang caah, naucuanglonak siai, ram pumpi huap in pa le pa thitumhnak nawl pek dingin le pa le pa ihti a khamtu state laws pawl hrawhpiak hna dingin Justice Clarence Thomas nih SC sinah nawlnak a tuah.

“Zarh 24 in 28 tluk a cang cangmi nau paoh cu an chuah rih lo zongah nu pawchung an um lio tein thah/hrawh khawh an si, tiin Roe biachahnak an tuahmi cu ai palhtukmi thil a si, zeicahtiah nauhrawhnak nuhrincovo (rights) kong US Constitution nih fiangtein a langtermi a um hrimhrim lo,” tiin Justice Samuel Alito nih ca in a tialmi ah a lang.

America chungah duh na lo in nau a cuangmi nunau tampi hna cu online in nauhrawhnak sitlang a zuarmi, asiloah phungkalh in tihnung ngaiin nauhrawhnak a kalpitu state lei vung tlawn an i harh ngaingai cang ko lai.

Nauhrawh a ralchanhtu hna an idea cu Justice Brett Kavanaugh zong nih ai tlaih ve i, karhlannak tuah than te tikah cun nauhrawh hi US Constitution nih a hrawh, tiin thanh ai tim te kho mi a si, tiah zumh a si.

“Constitution nih in nauhrawh hi a uk lo, cun phung zongah a ser fawn lo. Tutan biachahnak nih hin nauhrawh duh ah state dang tlawng lo dingin khenkhamnak a tuah lo, cun nau an hrawh hlan tein nunau pawl hi chimhhrin ding zong in a chim fawn lo,” tiin Kavanaugh nih a chim.

“Ngaichiatnak Ni” Tutan biachahnak hi a cekha in tih a nungtuk mi lam zulh he ai lo, tiin Biden nih a chim. “Nihin hi kan biaceihzung le ram caah ngaihchiatnak ni a si. Cuhlan ah an tuan bal lo mi thil kan zung nih a tuah cang: American mipi tampi hna caah a biapitukmi kan constitutional right cu an hrawh diam ko,” tiin Biden nih a chim.

Naungeihnak nuhrincovo kilvennak kongkau ah, nauhrawh kham dingin states pawl nawl an pek hna thawngin US hi a thangchomi ramdang pawl sinin hauleng an chuah bantuk a si i, tiin Biden nih a chim.

Nauhrawhnak nawl a kilvengtu phung (law) ser dingin Biden nih Congress a forh hna. US Food and Drug Administration nih an cohlanmi naucuan khawh lo nak si siseh, siai hmangin nauhrawh khawhnak lam siseh, cun nauhrawh duh ruang i state dang tlawn khawh lo dingin karhlannak an tuahmi vialte zong ka dohpiak hna lai, tiin Biden nih a chim.

“Minung nunnak he pehtlaiin tutan karhlannak nih vawlei pumpi a dironh” tiin Vatican nih cun a lomhpi ngai ko nain, Britian, France le a dang ram pawl belte nih cun hnungtol in karhlannak tuah bantuk a si, tiin an chimchiat piak ngaingai hna.

“Tutan biachahnak hi kakip ah a ummi nunau pawl caah cun sunghzatlak a si. Nunau nih anmah le an pum ciacung i biachahnak tuah khawhnak nawl an i ngeihmi cuh le uk an tonmi hmuh cu ngaihchia ngai thil a si” tiin New Zealand Prime Minister Jacinda Ardern nih a chim.

“Nauhrawh duh ah state dang tlawn a duhmi kan riantuantu paoh cu an lioheumi kan rin dih hna lai,” tiin Walt Disney Co, AT&T le Facebook parent Meta Platforms Inc nih an chim. Rawlralnak a Chuahpi Dingmi Thil Hna

Roe hi thlak a si chom cang lai, tiin biathli an theihnak hi May tein khan a si cang. Cu lio tein cun Alito nih capar in a cian (draft) a tial bal cang, tiah theih a si. Friday i teinak an comi nih cu lio neh le sul a zulh, ti a lang.

“Constitution nih nauhrawhnak kong a chim lo, zeibantuk constitutional phung hmanh nih cu bantuk nuhrincovo cu fiangtein a dirkamhnak a um lo” tiin Alito nih a tial.

Constitution phung tang te ah pumpak thilri kong i nuhrincovo nih hin nau an pawimi hrawh than khawhnak nawl a pek hna, tiin Roe v Wade nih a namhneh cangmi a si.

Planned Parenthood of Southeastern Pennsylvania v. Casey tiin 1992 lio i SC nih biachahnak an tuahmi nih hin nauhrawhnak nawl a fehter than i, nauhrawhnak lam a khamtu karhlannak paoh cu a kham dih. The Casey phung zong cu Friday ah an thilh chih ve, tiah theih a si.

“Roe hi a hramthoktein ai palh cikcekmi a si. A khuaruahnak hi ai ningcang lo i, a biachahnak nih thatlonak tamtuk a chuahpi. Rampumpi huapin nauhrawhnak nawl a chuahpi cu chim hlah, Roe le Casey phung nih alhnialnak an chuahpi lawng si lo in, thenhmalnak an zualter chinchin,” tiin Alito nih a chim.

Liberal lei in biaceihbawi 3 a si mi Stephen Breyer, Sonia Sotomayor le Elena Kagan nih tutan biachahnak an pomlonak kong ca in an chuah colh ve.

“Hmailei serchom dingmi phung (laws) hi zeibantuk an va si hmanh ah, nihin biachahnak a biachuak pakhat a fiangmi cu: nunau hna an nuhrincovo rii an khiahpiak hna, ai ruangmi le a luatmi rammi an sinak zong rii an khiahpiak hna, tinak a si” tiin ca in an tial.

Friday biachahnak ruangah, nunau pawl hi nau an pawi hlan tein holhnak nawl an ngei ti lo, tinak a si. A pumpak phaisa dih ding a va si ko hmanh ah, nau pawi kongah a umnak state nih deiret a chanh khawh cang, tinak a si, tiin liberal justices nih an chim.

Meithal kennak nawl kham lo dingin conservative majority nih biachahnak an tuah a theizing bakah a tu bantukin nauhrawh kham dingin states pawl cungah nawl an chuah hi a si.

Miphun le vote thlaknak nawl kong telh in, tutan i nauhrawh le meithal kongkau i biachahnak an tuahmi nih hin thil tampi kongkau ah America mipi an lung an i khah lo zia an langhter.

Roe phung hrawh hi Conservative Khrihfa le Republican lei in office a tlaimi upa tampi hna an chungmang a sinak a hlan ngaingai cang. 2016 lio tein khan Roe phung hi SP nih a hrawh te lai, tiin Donald Trump hrimhrim nih khan bia a rak i kam cang. President a tuan lio ah khan SC ah a minung 3 hmunhma a halhpiak manh hna i, tutan i biachahnak zongah an pathum ningtein an i tel, tiah theih a si.

“Tutan biachahnak an tuahmi ah upatpek awk na si hnga maw?” tiin Trump cu Fox News interview ah an hal i, “Pathian nih biachahnak a tuah,” tiin a leh hna.

Biaceihzung lenglei ah cun mipi an i bu hna. Baichahnak an tuah le cangka, nauhrawh a ralchanhtu pawl tlang an tlir colh ve. Nauhrawh a dirpitu phu belte mithli rialret he an i ciah.

“Ka lunglomhnak a liam in a liam. Nauhrawh hi kan chan chungah a chiakhabikmi thil a si. A liamcia kum 50 kan conh a si ah cun, kum 50 lengluang chung ningzak mualpho in Roe v. Wade phung tangah khua kan rak sa” tiah San Francisco in Nun Tanh (Pro Life) Emma Craig, 36, nih a chim.

Biachahnak ruangah a thin a hungmi mipi cheukhat cu biacheihnak lenglei ah suimilam saupi chung an um hna. NY, Atlanta, Chicago, Denver, LA le Seatle hei ti bantuk khuapi nganngan zongah mibu tampi thinhung in an i bu hna.

“Tutan biachahmi hi ka hnon. Naungeihnak kong i nunau nih nuhrincovo an i ngeihmi lakpiak, chuh dingin an i tinhmi cu a takin Republican an ukmi SP nih a tlam a tlinter taktak ko cang,” tiin Speaker Nancy Pelosi nih a chim.

US ram chung nauhrawh a zat hi kum 30 chung a tum lei a panh ko nain, 2020 hlan kum 3 chung belte ah khan 8% tiang a kai, tiah nauhrawh a dirpitu Research Group a si mi Guttmacher Institute nih June 15 khan ca an chuah. Credit: Chelsea Bawi

Be First to Comment

Leave a Reply

Your email address will not be published.