Press "Enter" to skip to content

Kawlram Ah Kahdohnak Pehtlai In A Um Cang

Nihin November 2, 2021 ah CNF/A le CDF-Matupi i bawm in Matupi peng chung ah ralhrang an kah hna tiah kan theih. Nihin zing thawngpang kan theih ning ahcun SAC ralhrang nih lam cawh nak ah an hman mi JCB zong CDF-Matupi nih an khangh piak khawh hna ti asi.

Cun nihin suimilam 11:00AM hrawng zongah khan CDF-Matupi le CNF/A i bawm in Matupi peng, Valangpi khua le Kaisi karlak, meng 9 nak zawn pawngah SAC ralhrang an phomh than hna ti asi.

Nihin kahnak ah kaphnih lei a thi le hliamtuar kong zeihmanh theih asi rih lo. SAC ralhrang hi motor tam ngai le minung thazaang tam ngai an si tiah an chim. CNF/A le CDF-Matupi i bawm in an kah hna hnu ah an thazaang rak rak chap nolh dawh in an chim.

Atu tiang ah kaphnih karlak dirhmun, hliamtuar le a thi mi kong theih a si rih lo nain CDF-Matupi le CNF/A lei cu an him tiah zumh cu a si rih. Pathian nih CDF-Matupi le CNF/A him tein a chiah hna i an raldoh mi ah hlawhtlinnak an hmuh khawh nak lai thlacam bawm hna usih.

RElCHAP; Ralhrang Phu hriamnaam zuarh ti lo ding UN ah biatung dirhtu nih Thantlang inn kaang kong ah a nolh than. Thantlang inn kaang sining zoh tik ah Ralhrang Phu hriamnaam zuarh ti lo ding UN nih tlangtlak a herhning a lang chinchin tiah Nuhrin Covo kong UN ah biatung dirhtu Thomas H. Andrews nih a chim than.

“Chin Ramkulh ah an ralkap le hriamnaam ngan phuntling an chiah hnu ah Thantlang cu mei in an khangh. Min Aung Hlaing (MAH) te phu tangkalut le hriamnaam cawkzuarhnak kong hi UN nih direct in dan a tat i a phihkhar awk a si,” tiah Thomas H. Andrews nih a chim.

Aluancia June thla lio UN meeting ah MAH te phu hriamnaam zuarh ti lo ding in bia an rak chah. Asinain, UN General Assembly biachahnak lawng a si i Security Council nih bia a chah mi kha UN chungtel ram nih an zulh ding a si i Security Council nih biachahpiak ding cu Thomas H. Andrews le ramchung ramleng Phu dangdang hna nih biatung an rak dirh.

October 29 zing in zaantim tiang Thantlang khua cu Ralhrang nih an khangh i Biakinn 2, Quarter pakhat tel in inn 164 an rak khangh. Crd; The Hakha Times

Be First to Comment

Leave a Reply

Your email address will not be published.