Kawlram Ral Bawi Min Aung Hlaing Nih President Si A Duh Nain A Lam A Um Lo Caah Uknak A Lak

February 1 zing ah ralkap nih nawlngeihnak an lak than mi kong ah Chin ramriantuan (politician) pakhat Pu Richard Zatu nih, Gen. Min Aung Hlaing hi President si a duh, a lam um fawn lo, atu a riantuannak in pension lak a hauh fawn tik ah a ti awk theihlo ah nawlngeihnak a lak, tiah a zumh ning February 3 ah a chim.

“Senior General Min Aung Hlaing hi President si a duh. A lam a um fawn lo. Atu a rian Ralkap Lutlai sinak hin pension lak a cu tuk cang fawn. Um awk a hngal lo. Aa tengtele i 2008 phunghram phungrelnak caang 417 kha i char in lakhruak thil a si, tiin nawlngeihnak a lak mi a si, tiah ka ruah. A ngaingai cu lakhruak caan (emergency-azipawkala) a si hrimhrim lo. Nawlngeih an duh tuk bia khi a si ko,” tiah Ramkheel lei ngiathlaitu Pu Richard Zatu nih The Hakha Times ah a hmuhning a chim.

Pu Richard Zatu nih a peh rih mi cu, “President U Win Myint kha a thanalo in min an thutter nain a duhlo. Ralkap in Vice President-1 U Myint Swe tu kha caankar President an pek. Amah U Myint Swe zong nih cun Gen. Min Aung Hlaing sin ah nawlngeihnak a pek lila fawn.

Anmah nih cun, 2008 phunghram hi an i tlaih nain a zuul lotu cu anmah thiamthiam an si. Kum 1 hnu ah thimnak kan tuah lai, an ti mi zong hi Ralkap cu zumh ding an si lo. An duh ahcun thla 6 an sauh khawh. Cun, thla 6 baak an sauh khawh rih thiamthiam tik ah kum 2 hmanh a rau kho mi a si,” tiah a chimchap.

Hi kong hi UN Security council zong ah an chuahpi cang. Anmah lawng an si lo, Russia le Tuluk nih Vito power an hman than. Zeiti a va si hmanh ah thimnak an tuah than tik ah NLD nih a tei than thiamthiam lai i nawlngeihnak cu a pek duh zong duhlo zong ah a pek te ko lai, ti zong a cunglei upa nih a chim fawn! Credit: The Hakha Times/ Pu Richard Zatu